etatpurāṇamakhilaṃ purā skandenabhāṣitam
sūta uvāca
etatpurāṇamakhilaṃ purā skandenabhāṣitam ||
bhṛgave brahmaputrāya tasmāllebhe tathāṃgirāḥ
||1||एतत्पुराणमखिलं पुरा स्कन्देनभाषितम् ॥
भृगवे ब्रह्मपुत्राय तस्माल्लेभे तथांगिराः
tataśca cyavanaḥ prāpa sa ṛcīkastato muniḥ ||
evaṃ paraṃparāprāptaṃ sarveṣu bhuvaneṣvapi
||2||ततश्च च्यवनः प्राप स ऋचीकस्ततो मुनिः ॥
एवं परंपराप्राप्तं सर्वेषु भुवनेष्वपि
skāṃdaṃ purāṇametacca kumāreṇa puroddhṛtam ||
yaḥ śṛṇoti satāṃ madhye naraḥ pāpātpramucyate
||3||स्कांदं पुराणमेतच्च कुमारेण पुरोद्धृतम् ॥
यः शृणोति सतां मध्ये नरः पापात्प्रमुच्यते
idaṃ purāṇamāyuṣyaṃ varṇānāṃ ca sukhāvaham ||
nirmitaṃ ṣaṇmukheneha niyataṃ sumahātmanā
||4||इदं पुराणमायुष्यं वर्णानां च सुखावहम् ॥
निर्मितं षण्मुखेनेह नियतं सुमहात्मना
evametatpurā khyātamākhyānaṃ bhadramastu vaḥ
||5||एवमेतत्पुरा ख्यातमाख्यानं भद्रमस्तु वः
hāṭakeśvarakṣetrasya māhātmyaṃ śṛṇute naraḥ ||
na tasya puṇyasaṃkhyānaṃ kartuṃ śakyeta kenacit
||6||हाटकेश्वरक्षेत्रस्य माहात्म्यं शृणुते नरः ॥
न तस्य पुण्यसंख्यानं कर्तुं शक्येत केनचित्
ya idaṃ dharmamāhātmyaṃ brāhmaṇāya prayacchati ||
svargaloke vasettāvadyāvadakṣarasaṃkhyayā
||7||य इदं धर्ममाहात्म्यं ब्राह्मणाय प्रयच्छति ॥
स्वर्गलोके वसेत्तावद्यावदक्षरसंख्यया
yathā hi varṣato dhārā yathā vā divi tārakāḥ ||
gaṃgāyāṃ sikatā yadvattadvatsaṃkhyā na vidyate
||8||यथा हि वर्षतो धारा यथा वा दिवि तारकाः ॥
गंगायां सिकता यद्वत्तद्वत्संख्या न विद्यते
yo naraḥ śṛṇuyādbhaktyā dināni ca kiyaṃti vai ||
sarvārthasiddho bhavati ya imāṃ paṭhate kathām
||9||यो नरः शृणुयाद्भक्त्या दिनानि च कियंति वै ॥
सर्वार्थसिद्धो भवति य इमां पठते कथाम्
putrārthī labhate putrāndhanārthī labhate dhanam ||
labhate patikāmā yā patiṃ kanyā manoramam
||10||पुत्रार्थी लभते पुत्रान्धनार्थी लभते धनम् ॥
लभते पतिकामा या पतिं कन्या मनोरमम्
samāgamaṃ labhaṃte ca vāṃdhavāśca pravāsibhiḥ ||
skāṃdaṃ purāṇaṃ śrutvā tu pumānā pnoti vāṃchitam
||11||समागमं लभंते च वांधवाश्च प्रवासिभिः ॥
स्कांदं पुराणं श्रुत्वा तु पुमाना प्नोति वांछितम्
śṛṇvataḥ paṭhataścaiva sarvakāmapradaṃ nṛṇām ||
mahīṃ vijayate rājā śatrūṃścāpyadhitiṣṭhati
||12||शृण्वतः पठतश्चैव सर्वकामप्रदं नृणाम् ॥
महीं विजयते राजा शत्रूंश्चाप्यधितिष्ठति
puṇyaṃ śrutvā purāṇaṃ vai dīrghamā yuśca viṃdati ||
vedavicca bhavedvipraḥ kṣatriyo rājyamāpnuyāt
||13||पुण्यं श्रुत्वा पुराणं वै दीर्घमा युश्च विंदति ॥
वेदविच्च भवेद्विप्रः क्षत्रियो राज्यमाप्नुयात्
dhanaṃ dhānyaṃ tathā vaiśyaḥ śūdraḥ sukhamavāpnuyāt ||
yaḥ ślokapādaṃ śṛṇuyādviṣṇulokaṃ sa gacchati
||14||धनं धान्यं तथा वैश्यः शूद्रः सुखमवाप्नुयात् ॥
यः श्लोकपादं शृणुयाद्विष्णुलोकं स गच्छति
śrutvā purāṇametaddhi vācakaṃ yastu pūjayet ||
tena brahmā ca viṣṇuśca rudraścaiva prapūjitaḥ
||15||श्रुत्वा पुराणमेतद्धि वाचकं यस्तु पूजयेत् ॥
तेन ब्रह्मा च विष्णुश्च रुद्रश्चैव प्रपूजितः
ekamapyakṣaraṃ yastu guruḥ śiṣye nivedayet ||
pṛthivyā nāsti taddravyaṃ yaddattvā hyanṛṇī bhavet
||16||एकमप्यक्षरं यस्तु गुरुः शिष्ये निवेदयेत् ॥
पृथिव्या नास्ति तद्द्रव्यं यद्दत्त्वा ह्यनृणी भवेत्
ataḥ saṃpūjanīyastu vyāsaḥ śāstropadeśakaḥ ||
gobhūhiraṇyavastrādyairbhojanaiḥ sārva kāmikaiḥ
||17||अतः संपूजनीयस्तु व्यासः शास्त्रोपदेशकः ॥
गोभूहिरण्यवस्त्राद्यैर्भोजनैः सार्व कामिकैः
ya evaṃ bhaktiyuktastu śrutvā śāstramanutamam ||
pūjayedupadeṣṭāraṃ sa śaivaṃ padamāpnuyāt
||18||य एवं भक्तियुक्तस्तु श्रुत्वा शास्त्रमनुतमम् ॥
पूजयेदुपदेष्टारं स शैवं पदमाप्नुयात्
purāṇaśravaṇādeva anekabhavasaṃcitam ||
pāpaṃ praśamamāyāti sarvatīrthaphalaṃ labhet
||19||पुराणश्रवणादेव अनेकभवसंचितम् ॥
पापं प्रशममायाति सर्वतीर्थफलं लभेत्
iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe śrīhāṭakeśvarakṣetramāhātmye purāṇaśravaṇamāhātmyavarṇanaṃnāmaikonāśītyuttaradviśatatamo'dhyāyaḥ || 279 ||
iti śrīskāṃde mahāpurāṇe ṣaṣṭhaṃ nāgarakhaṇḍaṃ samāptam
||6||इति श्रीस्कांदे महापुराणे षष्ठं नागरखण्डं समाप्तम्