brāhmaṇacitraśarmaliṃgasthāpanavṛttāṃtavarṇanam
ṛṣaya ūcuḥ
aṣṭaṣaṣṭiriyaṃ proktā yā tvayā sūtanandana ||
kṣetrāṇāṃ devadevasya kathaṃ sā tatra saṃsthitā ||
etatsarvaṃ samācakṣva paraṃ kautūhalaṃ hi naḥ
||1||अष्टषष्टिरियं प्रोक्ता या त्वया सूतनन्दन ॥
क्षेत्राणां देवदेवस्य कथं सा तत्र संस्थिता ॥
एतत्सर्वं समाचक्ष्व परं कौतूहलं हि नः
sūta uvāca
praśnabhāro mahāneṣa yo bhavadbhiḥ prakīrtitaḥ ||
tathāpi kīrtayiṣyāmi namaskṛtvā pinākinam
||2||प्रश्नभारो महानेष यो भवद्भिः प्रकीर्तितः ॥
तथापि कीर्तयिष्यामि नमस्कृत्वा पिनाकिनम्
camatkārapure'vāsītpūrvaṃ brāhmaṇasattamaḥ ||
vatsasyānvayasaṃbhūtaścitraśarmā mahāyaśāḥ
||3||चमत्कारपुरेऽवासीत्पूर्वं ब्राह्मणसत्तमः ॥
वत्सस्यान्वयसंभूतश्चित्रशर्मा महायशाः
tasya buddhiriyaṃ jātā pātāle hāṭakeśvaram ||
atrānīya tato bhaktyā pūjayāmi divāniśam
||4||तस्य बुद्धिरियं जाता पाताले हाटकेश्वरम् ॥
अत्रानीय ततो भक्त्या पूजयामि दिवानिशम्
evaṃ sa niścayaṃ kṛtvā tapaścake tataḥ param ||
niyato niyatāhāraḥ parāṃ niṣṭhāṃ samāśritaḥ
||5||एवं स निश्चयं कृत्वा तपश्चके ततः परम् ॥
नियतो नियताहारः परां निष्ठां समाश्रितः
tasyāpi bhagavāñchaṃbhuḥ kālena mahatā tataḥ ||
saṃtuṣṭo brāhmaṇa śreṣṭhāstataḥ provāca sādaram
||6||तस्यापि भगवाञ्छंभुः कालेन महता ततः ॥
संतुष्टो ब्राह्मण श्रेष्ठास्ततः प्रोवाच सादरम्
varaṃ prārthaya viprendra yatte manasi vartate ||
api trailokyarājyaṃ te tuṣṭo dāsyāmyasaṃśayam
||7||वरं प्रार्थय विप्रेन्द्र यत्ते मनसि वर्तते ॥
अपि त्रैलोक्यराज्यं ते तुष्टो दास्याम्यसंशयम्
tasmātprārthaya te nityaṃ yatra citte vyavasthitam ||
durlabhaṃ sarvadevānāṃ manuṣyāṇāṃ viśeṣataḥ
||8||तस्मात्प्रार्थय ते नित्यं यत्र चित्ते व्यवस्थितम् ॥
दुर्लभं सर्वदेवानां मनुष्याणां विशेषतः
citraśarmovāca
yadi tuṣṭosi me deva varaṃ cenme prayacchasi ||
tadatrāgaccha pātālālliṃgarūpī sureśvara
||9||यदि तुष्टोसि मे देव वरं चेन्मे प्रयच्छसि ॥
तदत्रागच्छ पातालाल्लिंगरूपी सुरेश्वर
yatpātāle sthitaṃ liṃgaṃ brahmaṇā saṃpratiṣṭhitam ||
hāṭakeśvarasaṃjñaṃ tu tadihāyātu satva ram
||10||यत्पाताले स्थितं लिंगं ब्रह्मणा संप्रतिष्ठितम् ॥
हाटकेश्वरसंज्ञं तु तदिहायातु सत्व रम्
śrībhagavānuvāca
acalaṃ sarvaliṃgaṃ syātsarvatrāpi dvijottama ||
ki punaḥ prathamaṃ yacca brahmaṇā nirmitaṃ svayam
||11||अचलं सर्वलिंगं स्यात्सर्वत्रापि द्विजोत्तम ॥
कि पुनः प्रथमं यच्च ब्रह्मणा निर्मितं स्वयम्
tasmātthāpaya liṃgaṃ taddhāṭakena dvijottama ||
hāṭakeśvarasaṃjñaṃ tu loke khyātaṃ bhaviṣyati
||12||तस्मात्थापय लिंगं तद्धाटकेन द्विजोत्तम ॥
हाटकेश्वरसंज्ञं तु लोके ख्यातं भविष्यति
somavāre catudaśyāṃ śuklāyāṃ śraddhayānvitaḥ ||
yastadbhaktisamāyuktaḥ pūjayiṣyati mānavaḥ
||3||सोमवारे चतुदश्यां शुक्लायां श्रद्धयान्वितः ॥
यस्तद्भक्तिसमायुक्तः पूजयिष्यति मानवः
ādyaliṃgodbhavaṃ śreyaḥ pūjayā lapsyate dvija ||
evamuktvā'tha bhagavāṃstataścādarśanaṃ gataḥ
||4||आद्यलिंगोद्भवं श्रेयः पूजया लप्स्यते द्विज ॥
एवमुक्त्वाऽथ भगवांस्ततश्चादर्शनं गतः
citraśarmā'pi kṛtvātha prāsādaṃ sumanoharam ||
tatra hemamayaṃ liṃgaṃ sthāpayāmāsa bhaktitaḥ
||15||चित्रशर्माऽपि कृत्वाथ प्रासादं सुमनोहरम् ॥
तत्र हेममयं लिंगं स्थापयामास भक्तितः
śāstroktena vidhānena pūjāṃ cakre ca nityaśaḥ ||
tatastrailokya vikhyātaṃ talliṃgaṃ tatra vai dvijāḥ
||16||शास्त्रोक्तेन विधानेन पूजां चक्रे च नित्यशः ॥
ततस्त्रैलोक्य विख्यातं तल्लिंगं तत्र वै द्विजाः
dūrādabhyetya lokāśca pūjayaṃti tataḥ param ||
atha tatra dvijā ye'nye saṃsthitā guṇavattarāḥ
||17||दूरादभ्येत्य लोकाश्च पूजयंति ततः परम् ॥
अथ तत्र द्विजा येऽन्ये संस्थिता गुणवत्तराः
teṣāṃ spardhā tato jātā dṛṣṭvā tasya viceṣṭitam ||
ekasthānaprasūtānāṃ sarveṣāṃ guṇaśālinām
||18||तेषां स्पर्धा ततो जाता दृष्ट्वा तस्य विचेष्टितम् ॥
एकस्थानप्रसूतानां सर्वेषां गुणशालिनाम्
ayaṃ guṇavihīno'pi prakhyāto bhuvanatraye ||
harārādhanamāsādya yasmāttasmādvayaṃ haram ||
tadarthe toṣayiṣyāmaḥ sāmyaṃ yena prajāyate
||19||अयं गुणविहीनोऽपि प्रख्यातो भुवनत्रये ॥
हराराधनमासाद्य यस्मात्तस्माद्वयं हरम् ॥
तदर्थे तोषयिष्यामः साम्यं येन प्रजायते
aṣṭaṣaṣṭiḥ smṛtā loke kṣetrāṇāṃ śūlapāṇinaḥ ||
yatra sānnidhyamabhyeti trikālaṃ parameśvaraḥ
||20||अष्टषष्टिः स्मृता लोके क्षेत्राणां शूलपाणिनः ॥
यत्र सान्निध्यमभ्येति त्रिकालं परमेश्वरः
aṣṭaṣaṣṭiśca gotrāṇāmasmākaṃ cātra saṃsthitā ||
etena mūḍhamanasā sārdhaṃ sāmānyalakṣaṇā
||22||अष्टषष्टिश्च गोत्राणामस्माकं चात्र संस्थिता ॥
एतेन मूढमनसा सार्धं सामान्यलक्षणा
tasmādanena cārādhya bhagavantaṃ trilocanam ||
tacca liṃgaṃ samānītamatra pātālasaṃsthitam
||22||तस्मादनेन चाराध्य भगवन्तं त्रिलोचनम् ॥
तच्च लिंगं समानीतमत्र पातालसंस्थितम्
tathā sarvaiśca sarvāṇi kṣetraliṃgāni kṛtsnaśaḥ ||
ānetavyāni cārādhya tapaḥśaktyā maheśvaram
||23||तथा सर्वैश्च सर्वाणि क्षेत्रलिंगानि कृत्स्नशः ॥
आनेतव्यानि चाराध्य तपःशक्त्या महेश्वरम्
eteṣāṃ sarvagotrāṇāmāneṣyati ca śaṃkaraḥ ||
yadgotraṃ kṣetrasaṃyuktaṃ yaccānyadvā bhaviṣyati
||24||एतेषां सर्वगोत्राणामानेष्यति च शंकरः ॥
यद्गोत्रं क्षेत्रसंयुक्तं यच्चान्यद्वा भविष्यति
tataste śarmasaṃyuktāḥ sarva eva dvijottamāḥ ||
cakrustapaḥkriyāṃ sarve duṣkarāṃ sarvajantubhiḥ
||25||ततस्ते शर्मसंयुक्ताः सर्व एव द्विजोत्तमाः ॥
चक्रुस्तपःक्रियां सर्वे दुष्करां सर्वजन्तुभिः
japairhomopavāsaiśca niyamaiśca pṛthagvidhaiḥ ||
balipūjopahāraiśca snānadānādibhistathā
||26||जपैर्होमोपवासैश्च नियमैश्च पृथग्विधैः ॥
बलिपूजोपहारैश्च स्नानदानादिभिस्तथा
liṃgaṃ saṃsthāpya devasya nāmnā khyātaṃ dvijeśvaram ||
manoharatare procce prāsāde parvatopame
||27||लिंगं संस्थाप्य देवस्य नाम्ना ख्यातं द्विजेश्वरम् ॥
मनोहरतरे प्रोच्चे प्रासादे पर्वतोपमे
tyaktvā gṛhakriyāḥ sarvāstathā yajñasamudbhavāḥ ||
anyāśca lokayātrotthāstoṣayaṃti maheśvaram
||28||त्यक्त्वा गृहक्रियाः सर्वास्तथा यज्ञसमुद्भवाः ॥
अन्याश्च लोकयात्रोत्थास्तोषयंति महेश्वरम्
evamārādhyamāno'pi santoṣaṃ parameśvaraḥ ||
nābhyagacchatparāṃ tuṣṭiṃ kathaṃcidapi sa dvijāḥ
||29||एवमाराध्यमानोऽपि सन्तोषं परमेश्वरः ॥
नाभ्यगच्छत्परां तुष्टिं कथंचिदपि स द्विजाः
tato varṣasahasrāṃte samārādhya maheśvaram ||
na ca kiñcitphalaṃ prāptā yāvatkruddhāstato'khilāḥ
||30||ततो वर्षसहस्रांते समाराध्य महेश्वरम् ॥
न च किञ्चित्फलं प्राप्ता यावत्क्रुद्धास्ततोऽखिलाः
asya mūrkhatamasyā'pi tvaṃ śūliṃścitraśarmaṇaḥ ||
sustokenā'pi kālena santoṣaṃ paramaṃ gataḥ
||31||अस्य मूर्खतमस्याऽपि त्वं शूलिंश्चित्रशर्मणः ॥
सुस्तोकेनाऽपि कालेन सन्तोषं परमं गतः
vayaṃ vārdhakyamāpannā bālyātprabhṛti śaṃkaram ||
pūjayanto'pi no dṛṣṭastathā'pi parameśvara
||32||वयं वार्धक्यमापन्ना बाल्यात्प्रभृति शंकरम् ॥
पूजयन्तोऽपि नो दृष्टस्तथाऽपि परमेश्वर
tasmātsarve prakartavyaṃ havyavāhapraveśanam ||
asmābhirniścayo hyeṣa tavāgre sāṃprataṃ kṛtaḥ
||33||तस्मात्सर्वे प्रकर्तव्यं हव्यवाहप्रवेशनम् ॥
अस्माभिर्निश्चयो ह्येष तवाग्रे सांप्रतं कृतः
tataścāhṛtya kāṣṭhāni sarve te dvijasattamāḥ ||
īśvaraṃ manasi dhyātvā citāścakruḥ pṛthagvidhāḥ
||34||ततश्चाहृत्य काष्ठानि सर्वे ते द्विजसत्तमाः ॥
ईश्वरं मनसि ध्यात्वा चिताश्चक्रुः पृथग्विधाः
tathā sarvaṃ kriyākalpaṃ snānadānādikaṃ ca yat ||
kṛtvā te brāhmaṇāḥ sarve susamiddhahutāśanam
||35||तथा सर्वं क्रियाकल्पं स्नानदानादिकं च यत् ॥
कृत्वा ते ब्राह्मणाः सर्वे सुसमिद्धहुताशनम्
yāvatkṛtvā sutaiḥ sārdhaṃ praviśaṃti samāhitāḥ ||
tāvatsa bhagavāṃstuṣṭasteṣāṃ saṃdarśanaṃ yayau
||36||यावत्कृत्वा सुतैः सार्धं प्रविशंति समाहिताः ॥
तावत्स भगवांस्तुष्टस्तेषां संदर्शनं ययौ
abravīcca vihasyoccairmeghagambhīrayā girā ||
sarvāṃstānbrāhmaṇaśreṣṭhānmṛtānsaṃjīvayanniva
||37||अब्रवीच्च विहस्योच्चैर्मेघगम्भीरया गिरा ॥
सर्वांस्तान्ब्राह्मणश्रेष्ठान्मृतान्संजीवयन्निव
bho bho brāhmaṇaśārdūlā mā maivaṃ sāhasaṃ mahat ||
yūyaṃ kuruta madvākyātsaṃtuṣṭasya viśeṣataḥ
||38||भो भो ब्राह्मणशार्दूला मा मैवं साहसं महत् ॥
यूयं कुरुत मद्वाक्यात्संतुष्टस्य विशेषतः
tasmādvadata yaccitte yuṣmākaṃ caiva saṃsthitam ||
yena dattvā pragacchāmi svameva bhuvanaṃ punaḥ
||39||तस्माद्वदत यच्चित्ते युष्माकं चैव संस्थितम् ॥
येन दत्त्वा प्रगच्छामि स्वमेव भुवनं पुनः
brāhmaṇā ūcuḥ
asminkṣetre suraśreṣṭha purasyāsya ca saṃnidhau ||
kṣetrāṇāmaṣṭaṣaṣṭiryā dhanyā saṃkīrtyate janaiḥ
||40||अस्मिन्क्षेत्रे सुरश्रेष्ठ पुरस्यास्य च संनिधौ ॥
क्षेत्राणामष्टषष्टिर्या धन्या संकीर्त्यते जनैः
sadābhyaitu samaṃ liṃgaistairādyaiḥ surasattama ||
yenāmarṣapraśāṃtirnaḥ sarveṣāmiha jāyate
||41||सदाभ्यैतु समं लिंगैस्तैराद्यैः सुरसत्तम ॥
येनामर्षप्रशांतिर्नः सर्वेषामिह जायते
eṣa saṃspardhate'smābhiḥ sarvairguṇavivarjitaḥ ||
tvalliṃgasya prabhāvena tasmādetatsamācara
||42||एष संस्पर्धतेऽस्माभिः सर्वैर्गुणविवर्जितः ॥
त्वल्लिंगस्य प्रभावेन तस्मादेतत्समाचर
sūta uvāca
etasminnaṃtare vipro jñātvā taṃ varadaṃ haram ||
uvāca spardhayā yuktaścitraśarmā maheśvaram
||43||एतस्मिन्नंतरे विप्रो ज्ञात्वा तं वरदं हरम् ॥
उवाच स्पर्धया युक्तश्चित्रशर्मा महेश्वरम्
citraśarmovāca
etaiḥ prāṇaparityāgamārabhya tadanataram ||
tuṣṭiṃ nīto'si devaśa kṛtvā ca sumahattapaḥ
||44||एतैः प्राणपरित्यागमारभ्य तदनतरम् ॥
तुष्टिं नीतोऽसि देवश कृत्वा च सुमहत्तपः
mayā sparddhamānaiśca kevalaṃ guṇagarvitaiḥ ||
tasmādeṣo na dātavyatvaṃ tvayā kiṃcitsureśvara
||46||मया स्पर्द्धमानैश्च केवलं गुणगर्वितैः ॥
तस्मादेषो न दातव्यत्वं त्वया किंचित्सुरेश्वर
yadi tvaṃ māmatikramya saṃpradāsyasi vāṃchitam ||
etaiḥ putrakalatraiśca sārdhaṃ pratyakṣatastava ||
pāvakaṃ sādhayiṣyāmi tasmādyuktaṃ samācara
||46||यदि त्वं मामतिक्रम्य संप्रदास्यसि वांछितम् ॥
एतैः पुत्रकलत्रैश्च सार्धं प्रत्यक्षतस्तव ॥
पावकं साधयिष्यामि तस्माद्युक्तं समाचर
sūta uvāca
tasya tadvacanaṃ śrutvā bhagavāñchaśiśekharaḥ ||
cintayāmāsa cittena kimatra sukṛtaṃ bhavet
||47||तस्य तद्वचनं श्रुत्वा भगवाञ्छशिशेखरः ॥
चिन्तयामास चित्तेन किमत्र सुकृतं भवेत्
ete brāhmaṇaśārdūlā vināśaṃ yāṃti matkṛte ||
eṣo'pi sarvasaṃsiddho gaṇatulyo dvijottamaḥ
||48||एते ब्राह्मणशार्दूला विनाशं यांति मत्कृते ॥
एषोऽपि सर्वसंसिद्धो गणतुल्यो द्विजोत्तमः
tasmāddvābhyāṃ mayā kāryaṃ kṣetre saukhyaṃ yathā bhavet ||
brāhmaṇānāṃ viśeṣeṇa tathā cātra nivāsinām
||49||तस्माद्द्वाभ्यां मया कार्यं क्षेत्रे सौख्यं यथा भवेत् ॥
ब्राह्मणानां विशेषेण तथा चात्र निवासिनाम्
mamāpi sarvadā citte kṛtyametaddhi vartate ||
eka sthāne karomyeva sarvakṣetrāṇi yāni me
||50||ममापि सर्वदा चित्ते कृत्यमेतद्धि वर्तते ॥
एक स्थाने करोम्येव सर्वक्षेत्राणि यानि मे
bhaviṣyati tathā kālo raudraḥ kalisamudbhavaḥ ||
tatra kṣetrāṇi tīrthāni nāśaṃ yāsyaṃti bhūtale
||51||भविष्यति तथा कालो रौद्रः कलिसमुद्भवः ॥
तत्र क्षेत्राणि तीर्थानि नाशं यास्यंति भूतले
sattīrthaistadbhayātsarvaiḥ kṣetrametatsamāśritam ||
ānayiṣyāmyahamapi svāni kṣetrāṇi kṛtsnaśaḥ
||52||सत्तीर्थैस्तद्भयात्सर्वैः क्षेत्रमेतत्समाश्रितम् ॥
आनयिष्याम्यहमपि स्वानि क्षेत्राणि कृत्स्नशः
tatastaṃ citraśarmāṇaṃ prāha cedaṃ maheśvaraḥ ||
śṛṇu madvacanaṃ kṛtsnaṃ kuruṣva tadanaṃtaram
||53||ततस्तं चित्रशर्माणं प्राह चेदं महेश्वरः ॥
शृणु मद्वचनं कृत्स्नं कुरुष्व तदनंतरम्
atra kṣetrāṇi sarvāṇi madīyāni dvijottama ||
samāgacchaṃtu viprāśca prabhavaṃtu praharṣitāḥ
||54||अत्र क्षेत्राणि सर्वाणि मदीयानि द्विजोत्तम ॥
समागच्छंतु विप्राश्च प्रभवंतु प्रहर्षिताः
tavāpi yogyatāṃ śreṣṭhāṃ kariṣyāmi mahāmate ||
yadi me vartase vākye muktvā sparddhāṃ dvijodbhavām
||55||तवापि योग्यतां श्रेष्ठां करिष्यामि महामते ॥
यदि मे वर्तसे वाक्ये मुक्त्वा स्पर्द्धां द्विजोद्भवाम्
turīyamapi te gotraṃ vedoktena krameṇa ca ||
ādyatāṃ cāpi te sarve kīrtayiṣyaṃti te dvijāḥ
||56||तुरीयमपि ते गोत्रं वेदोक्तेन क्रमेण च ॥
आद्यतां चापि ते सर्वे कीर्तयिष्यंति ते द्विजाः
tathānyadapi sanmānaṃ tava yacchāmi ca dvija ||
ācandrārkamasaṃdigdhaṃ putrapautrādikaṃ ca yat
||57||तथान्यदपि सन्मानं तव यच्छामि च द्विज ॥
आचन्द्रार्कमसंदिग्धं पुत्रपौत्रादिकं च यत्
tvadanvaye bhaviṣyaṃti putrapautrāstathā pare ||
kṛtye śrāddhe tarpaṇe vā kriyamāṇe vidhānataḥ
||58||त्वदन्वये भविष्यंति पुत्रपौत्रास्तथा परे ॥
कृत्ये श्राद्धे तर्पणे वा क्रियमाणे विधानतः
ādyasya vatsasaṃjñasya nāma uccārya gotrajam ||
tato nāmāni cāpyevaṃ kīrtayiṣyaṃti bhaktitaḥ
||59||आद्यस्य वत्ससंज्ञस्य नाम उच्चार्य गोत्रजम् ॥
ततो नामानि चाप्येवं कीर्तयिष्यंति भक्तितः
tataḥ saṃtarpayiṣyaṃti pitṝnatha pitāmahān ||
tathānyānapi baṃdhūṃśca suhṛtsaṃbaṃdhibāṃdhavān
||60||ततः संतर्पयिष्यंति पितॄनथ पितामहान् ॥
तथान्यानपि बंधूंश्च सुहृत्संबंधिबांधवान्
tvadanvaye vinā nāmnā tvadīyena vimohitāḥ ||
ye pitṝṃstarpayiṣyaṃti teṣāṃ vyarthaṃ bhaviṣyati
||61||त्वदन्वये विना नाम्ना त्वदीयेन विमोहिताः ॥
ये पितॄंस्तर्पयिष्यंति तेषां व्यर्थं भविष्यति
śrāddhaṃ vā yadi vā dānaṃ tarpaṇaṃ vā tvadudbhavam ||
tasmādahaṃkṛtiṃ muktvā māmārādhaya kevalam
||62||श्राद्धं वा यदि वा दानं तर्पणं वा त्वदुद्भवम् ॥
तस्मादहंकृतिं मुक्त्वा मामाराधय केवलम्
yena siddho'pi saṃsiddhiṃ parāmāpnoṣi śāśvatīm ||
evaṃ saṃbodhya taṃ vipraṃ kṛtvādyamapi paścimam
||63||येन सिद्धोऽपि संसिद्धिं परामाप्नोषि शाश्वतीम् ॥
एवं संबोध्य तं विप्रं कृत्वाद्यमपि पश्चिमम्
tatastānbrāhmaṇānāha prāsādaḥ kriyatāmiti ||
gotraṃgotraṃ puraskṛtya sthāpyaṃ liṃgamanuttamam ||
yena saṃkramaṇaṃ teṣu mama saṃjāyatedvijāḥ
||64||ततस्तान्ब्राह्मणानाह प्रासादः क्रियतामिति ॥
गोत्रंगोत्रं पुरस्कृत्य स्थाप्यं लिंगमनुत्तमम् ॥
येन संक्रमणं तेषु मम संजायतेद्विजाः
atha te brāhmaṇāstatra bhūmibhāgānmanoharān ||
dṛṣṭvādṛṣṭvā pracakruśca prāsādānharṣasaṃyutāḥ
||65||अथ ते ब्राह्मणास्तत्र भूमिभागान्मनोहरान् ॥
दृष्ट्वादृष्ट्वा प्रचक्रुश्च प्रासादान्हर्षसंयुताः
aṣṭaṣaṣṭimitāndivyānkailāsaśikharopamān ||
teṣu saṃsthāpayāmāsu liṅgāni vividhāni ca ||
kṣetrekṣatre ca yannāma tattatsaṃjñāṃ pracakrire
||66||अष्टषष्टिमितान्दिव्यान्कैलासशिखरोपमान् ॥
तेषु संस्थापयामासु लिङ्गानि विविधानि च ॥
क्षेत्रेक्षत्रे च यन्नाम तत्तत्संज्ञां प्रचक्रिरे
atha teṣāṃ punardṛṣṭiṃ gatvā devastrilocanaḥ ||
provāca madhuraṃ vākyaṃ kasmiṃścitkālaparyaye ||
ārādhitastapaḥśaktyā liṃgasaṃsthāpanādanu
||67||अथ तेषां पुनर्दृष्टिं गत्वा देवस्त्रिलोचनः ॥
प्रोवाच मधुरं वाक्यं कस्मिंश्चित्कालपर्यये ॥
आराधितस्तपःशक्त्या लिंगसंस्थापनादनु
śrībhagavānuvāca
parituṣṭo'smi vipreṃdrā yuṣmākamahamadya vai ||
etanmama kṛtaṃ kṛtyaṃ bhavadbhirakhilaṃ tataḥ
||68||परितुष्टोऽस्मि विप्रेंद्रा युष्माकमहमद्य वै ॥
एतन्मम कृतं कृत्यं भवद्भिरखिलं ततः
asmadīyāni liṃgāni kṣetrāṇi ca kalerbhayāt ||
tato mānyāśca me yūyaṃ nānyairetadbhaviṣyati
||69||अस्मदीयानि लिंगानि क्षेत्राणि च कलेर्भयात् ॥
ततो मान्याश्च मे यूयं नान्यैरेतद्भविष्यति
tasmāccittasthitaṃ śīghraṃ prārthayaṃtu dvijottamāḥ ||
saṃprayacchāmi yenāśu yadyapi syātsudurlabham
||70||तस्माच्चित्तस्थितं शीघ्रं प्रार्थयंतु द्विजोत्तमाः ॥
संप्रयच्छामि येनाशु यद्यपि स्यात्सुदुर्लभम्
brāhmaṇā ūcuḥ
yadi deva prasannastvamasmākaṃ ca sureśvara ||
paścimaścitraśarmā ca yathādyo bhavatā kṛtaḥ
||71||यदि देव प्रसन्नस्त्वमस्माकं च सुरेश्वर ॥
पश्चिमश्चित्रशर्मा च यथाद्यो भवता कृतः
asmadīyaṃ sadā nāma kīrtanīyamasaṃśayam ||
śrāddhakṛtyeṣu sarveṣu yathā tena samā vayam ||
bhavāmastvatprasādena sāṃprataṃ citraśarmaṇā
||72||अस्मदीयं सदा नाम कीर्तनीयमसंशयम् ॥
श्राद्धकृत्येषु सर्वेषु यथा तेन समा वयम् ॥
भवामस्त्वत्प्रसादेन सांप्रतं चित्रशर्मणा
śrībhagavānuvāca
yuṣmākamapi ye kecidvaśaṃ yāsyaṃti mānavāḥ ||
yuvānaḥ śāstrasaṃyuktā vedavidyāviśāradāḥ
||73||युष्माकमपि ये केचिद्वशं यास्यंति मानवाः ॥
युवानः शास्त्रसंयुक्ता वेदविद्याविशारदाः
ānayiṣyatha tānyūyamāmuṣyāyaṇasaṃjñitān ||
nityaṃ sthitāśca te kṣetre śrāddhasyākṣayyakārakāḥ
||74||आनयिष्यथ तान्यूयमामुष्यायणसंज्ञितान् ॥
नित्यं स्थिताश्च ते क्षेत्रे श्राद्धस्याक्षय्यकारकाः
evamuktvātha deveśastataścādarśanaṃ gataḥ ||
te'pi viprāḥ susaṃtuṣṭāstatra sthāne vyavasthitāḥ
||75||एवमुक्त्वाथ देवेशस्ततश्चादर्शनं गतः ॥
तेऽपि विप्राः सुसंतुष्टास्तत्र स्थाने व्यवस्थिताः
evaṃ tatra samastāni kṣetrāṇyāyatanāni ca ||
kalibhītāni vipreṃdrā nivasaṃti sadaiva hi
||76||एवं तत्र समस्तानि क्षेत्राण्यायतनानि च ॥
कलिभीतानि विप्रेंद्रा निवसंति सदैव हि
evaṃ te brāhmaṇāḥ prāpya siddhiṃ ceśvarapūjanāt ||
khyātāḥ sarvatra bhuvane śrāddhasyākṣayyakārakāḥ
||77||एवं ते ब्राह्मणाः प्राप्य सिद्धिं चेश्वरपूजनात् ॥
ख्याताः सर्वत्र भुवने श्राद्धस्याक्षय्यकारकाः
iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetra māhātmye brāhmaṇacitraśarmaliṃgasthāpanavṛttāṃtavarṇanaṃnāma saptottaraśatatamo'dhyāyaḥ || 107 ||