rudrakoṭimāhātmyavarṇanam
sūta uvāca
umāmaheśvarau tatra sthāpitau tena bhūbhujā ||
prāsādaṃ paramaṃ kṛtvā sādhudṛṣṭisukhapradam
||1||उमामहेश्वरौ तत्र स्थापितौ तेन भूभुजा ॥
प्रासादं परमं कृत्वा साधुदृष्टिसुखप्रदम्
tasyāgrataḥ śubhaṃ kuṃḍaṃ tatra caiva vinirmitam ||
svacchodakena sampūrṇaṃ padminīkhaṃḍamaṃḍitam
||2||तस्याग्रतः शुभं कुंडं तत्र चैव विनिर्मितम् ॥
स्वच्छोदकेन सम्पूर्णं पद्मिनीखंडमंडितम्
snātvā tatra naro bhaktyā tau paśyedyaḥ samāhitaḥ ||
māghaśuklacaturdaśyāṃ na sa bhūyo'tra jāyate
||3||स्नात्वा तत्र नरो भक्त्या तौ पश्येद्यः समाहितः ॥
माघशुक्लचतुर्दश्यां न स भूयोऽत्र जायते
tasyaiva pūrvadigbhāge'gastyakuṇḍasamīpataḥ ||
asti vāpī mahāpuṇyā sarvapātakanāśinī
||4||तस्यैव पूर्वदिग्भागेऽगस्त्यकुण्डसमीपतः ॥
अस्ति वापी महापुण्या सर्वपातकनाशिनी
tasyāṃ yaḥ kurute snānaṃ māsi vai phālgune naraḥ ||
sopavāsaḥ sitāṣṭamyāṃ vāṃchitaṃ labhate ca saḥ
||5||तस्यां यः कुरुते स्नानं मासि वै फाल्गुने नरः ॥
सोपवासः सिताष्टम्यां वांछितं लभते च सः
tasyā dakṣiṇadigbhāge tatrāsti kapilā nadī ||
kapilo yatra saṃprāptaḥ siddhiṃ sāṃkhyasamudbhavām
||6||तस्या दक्षिणदिग्भागे तत्रास्ति कपिला नदी ॥
कपिलो यत्र संप्राप्तः सिद्धिं सांख्यसमुद्भवाम्
kapilāyāśca pūrveṇa siddhakṣetraṃ prakīrtitam ||
yatra siddhiṃ gatāḥ siddhāḥ purā śata sahasraśaḥ
||7||कपिलायाश्च पूर्वेण सिद्धक्षेत्रं प्रकीर्तितम् ॥
यत्र सिद्धिं गताः सिद्धाः पुरा शत सहस्रशः
yo yaṃ kāmamabhidhyāya tapastatra samācaret ||
ṣaṇmāsābhyaṃtare nūnaṃ sa tamāpnoti mānavaḥ
||8||यो यं काममभिध्याय तपस्तत्र समाचरेत् ॥
षण्मासाभ्यंतरे नूनं स तमाप्नोति मानवः
tasyādhastācchilā viprā vidyate vaiṣṇavī śubhā ||
bhramantī caturasrā ca sarvapātakanāśinī
||9||तस्याधस्ताच्छिला विप्रा विद्यते वैष्णवी शुभा ॥
भ्रमन्ती चतुरस्रा च सर्वपातकनाशिनी
sadā mahānadītoyakṣālitā muktidā nṛṇām ||
gaṃgāyamunayormadhye saṃniviṣṭā sarasvatī
||10||सदा महानदीतोयक्षालिता मुक्तिदा नृणाम् ॥
गंगायमुनयोर्मध्ये संनिविष्टा सरस्वती
triveṇī vahate tasyāḥ purato bhuktimuktidā ||
tasyāmupari dagdhānāṃ brāhmaṇānāṃ viśeṣataḥ
||11||त्रिवेणी वहते तस्याः पुरतो भुक्तिमुक्तिदा ॥
तस्यामुपरि दग्धानां ब्राह्मणानां विशेषतः
nūnaṃ muktirbhavetteṣāṃ citā bhasmani goṣpadam ||
dṛśyate tatra tajjñātvā saṃskāryā brāhmaṇā mṛtāḥ
||12||नूनं मुक्तिर्भवेत्तेषां चिता भस्मनि गोष्पदम् ॥
दृश्यते तत्र तज्ज्ञात्वा संस्कार्या ब्राह्मणा मृताः
tasyaivottaradigbhāge rudrakoṭirdvijottamāḥ ||
asti saṃpūjitā viprai rdākṣiṇātyairmahātmabhiḥ
||13||तस्यैवोत्तरदिग्भागे रुद्रकोटिर्द्विजोत्तमाः ॥
अस्ति संपूजिता विप्रै र्दाक्षिणात्यैर्महात्मभिः
mahāyogisvarūpeṇa dākṣiṇātyā dvijottamāḥ ||
camatkārapure kṣetre śrutvā svayamumāpatim
||14||महायोगिस्वरूपेण दाक्षिणात्या द्विजोत्तमाः ॥
चमत्कारपुरे क्षेत्रे श्रुत्वा स्वयमुमापतिम्
tataḥ kautūhalāviṣṭāḥ śraddhayā parayā yutāḥ ||
koṭisaṃkhyā drutaṃ jagmustasya darśanavāṃchayā
||15||ततः कौतूहलाविष्टाः श्रद्धया परया युताः ॥
कोटिसंख्या द्रुतं जग्मुस्तस्य दर्शनवांछया
ahaṃpūrvamahaṃpūrvaṃ vīkṣayiṣyāmi taṃ haram ||
iti śraddhāsamo petāścakruste śapathaṃ gatāḥ
||16||अहंपूर्वमहंपूर्वं वीक्षयिष्यामि तं हरम् ॥
इति श्रद्धासमो पेताश्चक्रुस्ते शपथं गताः
eteṣāṃ madhyato yastaṃ mahāyoginamīśvaram ||
caramaṃ devamīkṣeta bhaviṣyati sa pāpakṛt
||17||एतेषां मध्यतो यस्तं महायोगिनमीश्वरम् ॥
चरमं देवमीक्षेत भविष्यति स पापकृत्
tatasteṣāmabhiprāyaṃ jñātvā devo maheśvaraḥ ||
bhaktiprīto hitārthāya koṭirūpairvyavasthitaḥ
||18||ततस्तेषामभिप्रायं ज्ञात्वा देवो महेश्वरः ॥
भक्तिप्रीतो हितार्थाय कोटिरूपैर्व्यवस्थितः
helayā darśanaṃ prāptaḥ sarveṣāṃ dvijasattamāḥ ||
tataḥ prabhṛti tatsthānaṃ rudrakoṭītiviśrutam
||19||हेलया दर्शनं प्राप्तः सर्वेषां द्विजसत्तमाः ॥
ततः प्रभृति तत्स्थानं रुद्रकोटीतिविश्रुतम्
tadarthaṃ paṭhitaḥ śloko nāradena purā dvijāḥ ||
rudrāvartaṃ samālokya prahṛṣṭena dvijottamāḥ
||20||तदर्थं पठितः श्लोको नारदेन पुरा द्विजाः ॥
रुद्रावर्तं समालोक्य प्रहृष्टेन द्विजोत्तमाः
āṣāḍhīṃ kārtikīṃ māghīṃ tathā caitrasamudbhavām ||
dhanyāḥ pṛthivyāṃ lapsyaṃte rudrāvarte caturdaśīm
||21||आषाढीं कार्तिकीं माघीं तथा चैत्रसमुद्भवाम् ॥
धन्याः पृथिव्यां लप्स्यंते रुद्रावर्ते चतुर्दशीम्
ājanmaśatasāhasraṃ kṛtvā pāpaṃ naraḥ kṣitau ||
rudrāvartaṃ samālokya vipāpmatvaṃ prapadyate
||22||आजन्मशतसाहस्रं कृत्वा पापं नरः क्षितौ ॥
रुद्रावर्तं समालोक्य विपाप्मत्वं प्रपद्यते
rudrāvartte naro gatvā dṛṣṭvā yogeśvaraṃ haram ||
śuklapakṣe caturdaśyāṃ vipāpmā jāyate dhruvam
||23||रुद्रावर्त्ते नरो गत्वा दृष्ट्वा योगेश्वरं हरम् ॥
शुक्लपक्षे चतुर्दश्यां विपाप्मा जायते ध्रुवम्
yastatra kurute śrāddhaṃ mahāyogipure dvijāḥ ||
rudrāvarte sa cāpnoti phalaṃ śatamakhodbhavam
||24||यस्तत्र कुरुते श्राद्धं महायोगिपुरे द्विजाः ॥
रुद्रावर्ते स चाप्नोति फलं शतमखोद्भवम्
upavāsaparo bhūtvā yaḥ kuryādrātrijāgaram ||
kāmagena vimānena sa svarge yāti mānavaḥ
||25||उपवासपरो भूत्वा यः कुर्याद्रात्रिजागरम् ॥
कामगेन विमानेन स स्वर्गे याति मानवः
tatra yaḥ kapilāṃ dadyādbrāhmaṇāyāhitāgnaye ||
sa gaṇaḥ syānna saṃdeho harasya dayitastathā
||26||तत्र यः कपिलां दद्याद्ब्राह्मणायाहिताग्नये ॥
स गणः स्यान्न संदेहो हरस्य दयितस्तथा
ṣaḍakṣaraṃ japedyastu mahāyogipuraḥ sthitaḥ ||
maṃtraṃ tasya bhavecchreyaḥ ṣaṅguṇaṃ rājasūyataḥ
||27||षडक्षरं जपेद्यस्तु महायोगिपुरः स्थितः ॥
मंत्रं तस्य भवेच्छ्रेयः षङ्गुणं राजसूयतः
yastasya purato bhaktyā japedvā śatarudriyam ||
caturṇāmapi vedānāṃ so'dhītānāṃ bhajetphalam
||28||यस्तस्य पुरतो भक्त्या जपेद्वा शतरुद्रियम् ॥
चतुर्णामपि वेदानां सोऽधीतानां भजेत्फलम्
gītaṃ vā yadi vā nṛtyaṃ tatpuraḥ kurute naraḥ ||
sa sarveṣāṃ bhajecchreyo makhānāṃ nātra saṃśayaḥ
||29||गीतं वा यदि वा नृत्यं तत्पुरः कुरुते नरः ॥
स सर्वेषां भजेच्छ्रेयो मखानां नात्र संशयः
evamuktvā dvijaśreṣṭhāḥ sa munirbrahmasaṃbhavaḥ ||
virarāma tato hṛṣṭastīrthayātrāṃ gato drutam
||30||एवमुक्त्वा द्विजश्रेष्ठाः स मुनिर्ब्रह्मसंभवः ॥
विरराम ततो हृष्टस्तीर्थयात्रां गतो द्रुतम्
iti śrīskāṃde mahāpurāṇa ekāśīti sāhasryāṃ saṃhitāyāṃ ṣaṣṭhe nāgarakhaṃḍe hāṭakeśvarakṣetramāhātmye rudrakoṭimāhātmyavarṇanaṃnāma dvipañcāśattamo'dhyāyaḥ || 92 ||