kāmyāni te'dhunā vacmi śrāddhāni pṛthivīpate
bhartṛyajña uvāca
kāmyāni te'dhunā vacmi śrāddhāni pṛthivīpate ||
yaiḥ kṛtaiḥ samavāpnoti martyo hṛdayasaṃsthitam
||1||काम्यानि तेऽधुना वच्मि श्राद्धानि पृथिवीपते ॥
यैः कृतैः समवाप्नोति मर्त्यो हृदयसंस्थितम्
yo nārīṃ vāṃchate kṣmāpa rūpāḍhyāṃ śīlamaṇḍanām ||
iha loke pare caiva tasyārhaṃ prathamaṃ dinam
||2||यो नारीं वांछते क्ष्माप रूपाढ्यां शीलमण्डनाम् ॥
इह लोके परे चैव तस्यार्हं प्रथमं दिनम्
śrāddhīyapretapakṣasya mukhyabhūtaṃ ca yannṛpa ||
ya icchetkanyakāṃ śreṣṭhāṃ suśīlāṃ rūpasaṃyu tām ||
dvitīyādivase tena śrāddhaṃ kāryaṃ mahīpate
||3||श्राद्धीयप्रेतपक्षस्य मुख्यभूतं च यन्नृप ॥
य इच्छेत्कन्यकां श्रेष्ठां सुशीलां रूपसंयु ताम् ॥
द्वितीयादिवसे तेन श्राद्धं कार्यं महीपते
yo vāṃchati naro'śvāṃśca vāyuvegasamāñjave ||
tṛtīyādivase śrāddhaṃ tena kāryaṃ vipaścitā
||4||यो वांछति नरोऽश्वांश्च वायुवेगसमाञ्जवे ॥
तृतीयादिवसे श्राद्धं तेन कार्यं विपश्चिता
yo vāṃchati paśūnmukhyānkupyākupyadhanāni ca ||
caturthyāṃ tena kartavyaṃ śrāddhaṃ pitṛpratuṣṭaye
||5||यो वांछति पशून्मुख्यान्कुप्याकुप्यधनानि च ॥
चतुर्थ्यां तेन कर्तव्यं श्राद्धं पितृप्रतुष्टये
putrānvāṃchati yo'bhīṣṭānsuśīlānvaṃśamaṃḍanān ||
pañcamyāṃ tena kartavyaṃ sadā śrāddhaṃ narādhipa
||6||पुत्रान्वांछति योऽभीष्टान्सुशीलान्वंशमंडनान् ॥
पञ्चम्यां तेन कर्तव्यं सदा श्राद्धं नराधिप
yaḥ śrāddhaṃ vaṃśajairdattaṃ paralokagato nṛpa ||
vāṃchate tena kartavyaṃ ṣaṣṭhyāṃ śrāddhaṃ vipaścitā
||7||यः श्राद्धं वंशजैर्दत्तं परलोकगतो नृप ॥
वांछते तेन कर्तव्यं षष्ठ्यां श्राद्धं विपश्चिता
kṛṣisiddhiṃ ya iccheta graiṣmikīṃ śāradīmapi ||
saptamyāṃ yujyate tasya śrāddhaṃ kartuṃ na saṃśayaḥ
||8||कृषिसिद्धिं य इच्छेत ग्रैष्मिकीं शारदीमपि ॥
सप्तम्यां युज्यते तस्य श्राद्धं कर्तुं न संशयः
ya icchetpaṇyasaṃsiddhiṃ vyavahārasamudbhavām ||
aṣṭamyāṃ yujyate śrāddhaṃ tasya kartuṃ narādhipa
||9||य इच्छेत्पण्यसंसिद्धिं व्यवहारसमुद्भवाम् ॥
अष्टम्यां युज्यते श्राद्धं तस्य कर्तुं नराधिप
navamyāṃ śrāddhakṛnnānā catuṣpadagaṇāllam̐bhet ||
saubhāgyaṃ roganāśaṃ ca tathā vallabhasaṃgamam
||10||नवम्यां श्राद्धकृन्नाना चतुष्पदगणाल्लँभेत् ॥
सौभाग्यं रोगनाशं च तथा वल्लभसंगमम्
daśamīdivase śrāddhaṃ yaḥ karoti samāhitaḥ ||
tasya syādvāṃchitā siddhiḥ sarvakṛtyeṣu sarvadā
||11||दशमीदिवसे श्राद्धं यः करोति समाहितः ॥
तस्य स्याद्वांछिता सिद्धिः सर्वकृत्येषु सर्वदा
ekādaśyāṃ dhanaṃ dhānyaṃ śrāddhakartā labhennaraḥ ||
tathā bhūpaprasādaṃ ca yaccānyanmanasi sthitam
||12||एकादश्यां धनं धान्यं श्राद्धकर्ता लभेन्नरः ॥
तथा भूपप्रसादं च यच्चान्यन्मनसि स्थितम्
yaḥ karoti ca dvādaśyāṃ śrāddhaṃ śraddhāsamanvitaḥ ||
putrāṃstu pravarāṃścaiva sa paśūnvāṃchitāllam̐bhet
||13||यः करोति च द्वादश्यां श्राद्धं श्रद्धासमन्वितः ॥
पुत्रांस्तु प्रवरांश्चैव स पशून्वांछिताल्लँभेत्
yo vāṃchati naro muktiṃ pitṛbhiḥ saha cātmanaḥ ||
asaṃtānaśca yastasya śrāddhe proktā trayodaśī
||14||यो वांछति नरो मुक्तिं पितृभिः सह चात्मनः ॥
असंतानश्च यस्तस्य श्राद्धे प्रोक्ता त्रयोदशी
saṃtānakāmo yaḥ kuryāttasya vaṃśakṣayo bhavet ||
na saṃtānavivṛddhayai ca tasya proktā trayodaśī
||15||संतानकामो यः कुर्यात्तस्य वंशक्षयो भवेत् ॥
न संतानविवृद्धयै च तस्य प्रोक्ता त्रयोदशी
śrāddhakarmaṇi rājeṃdra śrutireṣā purātanī ||
api naḥ sa kule bhūyādyo no dadyāttrayodaśīm
||16||श्राद्धकर्मणि राजेंद्र श्रुतिरेषा पुरातनी ॥
अपि नः स कुले भूयाद्यो नो दद्यात्त्रयोदशीम्
pāyasaṃ madhusarpirbhyāṃ varṣāsu ca maghāsu ca ||
maghātrayodaśīyoge pāyasena yajetpitṝn
||17||पायसं मधुसर्पिर्भ्यां वर्षासु च मघासु च ॥
मघात्रयोदशीयोगे पायसेन यजेत्पितॄन्
pitarastasya necchaṃti tadvarṣaṃ śrāddhasatkriyām ||
puṇyātiśayabhītena piṃḍadānaṃ nirākṛtam
||18||पितरस्तस्य नेच्छंति तद्वर्षं श्राद्धसत्क्रियाम् ॥
पुण्यातिशयभीतेन पिंडदानं निराकृतम्
śakreṇa taddine putramaraṇaṃ darśitaṃ bhayam ||
yeṣāṃ ca śastramṛtyuḥ syādapamṛtyurathāpi vā
||19||शक्रेण तद्दिने पुत्रमरणं दर्शितं भयम् ॥
येषां च शस्त्रमृत्युः स्यादपमृत्युरथापि वा
upasargamṛtānāṃ ca viṣamṛtyumupeyuṣām ||
vahninā tu pradagdhānāṃ jalamṛtyu mupeyuṣām
||20||उपसर्गमृतानां च विषमृत्युमुपेयुषाम् ॥
वह्निना तु प्रदग्धानां जलमृत्यु मुपेयुषाम्
sarpavyālahatānāṃ ca śṛṃgairudbandhanairapi ||
ekoddiṣṭaṃ prakartavyaṃ caturdaśyāṃ narādhipa
||21||सर्पव्यालहतानां च शृंगैरुद्बन्धनैरपि ॥
एकोद्दिष्टं प्रकर्तव्यं चतुर्दश्यां नराधिप
teṣāṃ tasminkṛte tṛptistatastatpakṣajā bhavet
||22||तेषां तस्मिन्कृते तृप्तिस्ततस्तत्पक्षजा भवेत्
sarve kāmāḥ puraḥ proktā yuṣmākaṃ ye mayā nṛpa ||
amāvāsyādine śrāddhāttānāpnoti na saṃśa yaḥ
||23||सर्वे कामाः पुरः प्रोक्ता युष्माकं ये मया नृप ॥
अमावास्यादिने श्राद्धात्तानाप्नोति न संश यः
etatte sarvamākhyātaṃ kāmyaśrāddhaphalaṃ nṛpa ||
yacchrutvā vāṃchitānkāmānsarvānāpnoti mānavaḥ
||24||एतत्ते सर्वमाख्यातं काम्यश्राद्धफलं नृप ॥
यच्छ्रुत्वा वांछितान्कामान्सर्वानाप्नोति मानवः
iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye śrāddhakalpe kāmyaśrāddhavarṇanaṃnāmaikonaviṃśottaradviśatatamo' dhyāyaḥ || 219 ||