rūpatīrthotpattipūrvakaprathamayajñadivasavṛttāntavarṇanam
sūta uvāca
evaṃ patnīṃ samāsādya gāyatrīṃ caturānanaḥ ||
saṃprahṛṣṭamanā bhūtvā prasthito yajñamaṇḍapam
||1||एवं पत्नीं समासाद्य गायत्रीं चतुराननः ॥
संप्रहृष्टमना भूत्वा प्रस्थितो यज्ञमण्डपम्
gāyatryapi samādāya mūrdhni tāmaraṇiṃ mudā ||
pratasthe saṃparityajya gopabhāvaṃ vigarhitam
||2||गायत्र्यपि समादाय मूर्ध्नि तामरणिं मुदा ॥
प्रतस्थे संपरित्यज्य गोपभावं विगर्हितम्
vādyamāneṣu vādyeṣu brahmaghoṣe divaṃgate ||
kalaṃ pragāyamāneṣu gandharveṣu samaṃtataḥ
||3||वाद्यमानेषु वाद्येषु ब्रह्मघोषे दिवंगते ॥
कलं प्रगायमानेषु गन्धर्वेषु समंततः
sarvadevadvijopetaḥ saṃprāpto yajñamaṇḍape ||
gāyatryā sahito brahmā mānuṣaṃ bhāvamāśritaḥ
||4||सर्वदेवद्विजोपेतः संप्राप्तो यज्ञमण्डपे ॥
गायत्र्या सहितो ब्रह्मा मानुषं भावमाश्रितः
etasminnaṃtare cakre keśanirvapaṇaṃ vidheḥ ||
viśvakarmā nakhānāṃ ca gāyatryāstadanaṃtaram
||5||एतस्मिन्नंतरे चक्रे केशनिर्वपणं विधेः ॥
विश्वकर्मा नखानां च गायत्र्यास्तदनंतरम्
audumbaraṃ tato daṇḍaṃ pulastyo'smai samādade ||
eṇaśṛṃgānvitaṃ carma mantravadvijasattamāḥ
||6||औदुम्बरं ततो दण्डं पुलस्त्योऽस्मै समाददे ॥
एणशृंगान्वितं चर्म मन्त्रवद्विजसत्तमाः
patnīśālāṃ gṛhītvā ca gāyatrīṃ maunadhāriṇīm ||
mekhalāṃ nidadhe cānyāṃ kaṭyāṃ mauṃjīmayīṃ śubhām
||7||पत्नीशालां गृहीत्वा च गायत्रीं मौनधारिणीम् ॥
मेखलां निदधे चान्यां कट्यां मौंजीमयीं शुभाम्
tataścakre paraṃ karma yaduktaṃ yajñamaṃḍape ||
ṛtvigbhiḥ sahito vedhā vedavākyasamādṛtaḥ
||8||ततश्चक्रे परं कर्म यदुक्तं यज्ञमंडपे ॥
ऋत्विग्भिः सहितो वेधा वेदवाक्यसमादृतः
pravargye jāyamāne ca tatrāścaryamabhūnmahat ||
jālmarūpadharaḥ kaściddigvāsā vikṛtānanaḥ
||9||प्रवर्ग्ये जायमाने च तत्राश्चर्यमभून्महत् ॥
जाल्मरूपधरः कश्चिद्दिग्वासा विकृताननः
kapālapāṇirāyāto bhojanaṃ dīyatāmiti ||
niṣedhyamāno'pi ca taiḥ praviṣṭo yājñikaṃ sadaḥ ||
sa kṛtvā'ṭanamanyāyyaṃ tarjyamāno'pi tāpasaiḥ
||10||कपालपाणिरायातो भोजनं दीयतामिति ॥
निषेध्यमानोऽपि च तैः प्रविष्टो याज्ञिकं सदः ॥
स कृत्वाऽटनमन्याय्यं तर्ज्यमानोऽपि तापसैः
sadasyā ūcuḥ
kasmātpāpasametastvaṃ praviṣṭo yajñamaṇḍape ||
kapālī nagnarūpo yo yajñakarmavivarjitaḥ
||11||कस्मात्पापसमेतस्त्वं प्रविष्टो यज्ञमण्डपे ॥
कपाली नग्नरूपो यो यज्ञकर्मविवर्जितः
tasmādgaccha drutaṃ mūḍha yāvadbrahmā na kupyati ||
tathā'nye brāhmaṇaśreṣṭhāstathā devāḥ savāsavāḥ
||12||तस्माद्गच्छ द्रुतं मूढ यावद्ब्रह्मा न कुप्यति ॥
तथाऽन्ये ब्राह्मणश्रेष्ठास्तथा देवाः सवासवाः
jālma uvāca
brahmayajñamimaṃ śrutvā dūrādatra samāgataḥ ||
bubhukṣito dvijaśreṣṭhāstatkimarthaṃ vigarhatha
||13||ब्रह्मयज्ञमिमं श्रुत्वा दूरादत्र समागतः ॥
बुभुक्षितो द्विजश्रेष्ठास्तत्किमर्थं विगर्हथ
dīnāṃdhaiḥ kṛpaṇaiḥ savairstarpitaiḥ kraturucyate ||
anyathā'sau vināśāya yaduktaṃ brāhmaṇairvacaḥ
||14||दीनांधैः कृपणैः सवैर्स्तर्पितैः क्रतुरुच्यते ॥
अन्यथाऽसौ विनाशाय यदुक्तं ब्राह्मणैर्वचः
annahīno dahedrāṣṭaṃ mantrahīnastu ṛtvijaḥ ||
yājñikaṃ dakṣiṇā hīno nāsti yajñasamo ripuḥ
||15||अन्नहीनो दहेद्राष्टं मन्त्रहीनस्तु ऋत्विजः ॥
याज्ञिकं दक्षिणा हीनो नास्ति यज्ञसमो रिपुः
brāhmaṇā ūcuḥ
yadi tvaṃ bhoktukāmastu samāyāto vraja drutam ||
etasyāṃ satraśālāyāṃ bhuñjate yatra tāpasāḥ ||
dīnāndhāḥ kṛpaṇāścaiva tataḥ kṣutkṣāmakaṃṭhitāḥ
||16||यदि त्वं भोक्तुकामस्तु समायातो व्रज द्रुतम् ॥
एतस्यां सत्रशालायां भुञ्जते यत्र तापसाः ॥
दीनान्धाः कृपणाश्चैव ततः क्षुत्क्षामकंठिताः
athavā dhanakāmastvaṃ vastrakāmo'tha tāpasa ||
vraja vittapatiryatra dānaśālāṃ samāśritaḥ
||17||अथवा धनकामस्त्वं वस्त्रकामोऽथ तापस ॥
व्रज वित्तपतिर्यत्र दानशालां समाश्रितः
aniṃdyo'yaṃ mahāmūrkha yajñaḥ paitāmaho yataḥ ||
arcitaḥ sarvataḥ puṇyaṃ tatkiṃ nindasi durmate
||18||अनिंद्योऽयं महामूर्ख यज्ञः पैतामहो यतः ॥
अर्चितः सर्वतः पुण्यं तत्किं निन्दसि दुर्मते
sūta uvāca
evamuktaḥ kapālaṃ sa parikṣipya dharātale ||
jagāmādarśanaṃ sadyo dīpavaddvijasattamāḥ
||19||एवमुक्तः कपालं स परिक्षिप्य धरातले ॥
जगामादर्शनं सद्यो दीपवद्द्विजसत्तमाः
ṛtvija ūcuḥ
kathaṃ yajñakriyā kāryā kapāle sadasi sthite ||
parikṣipatha tasmāttu evamūcurdvijottamāḥ
||20||कथं यज्ञक्रिया कार्या कपाले सदसि स्थिते ॥
परिक्षिपथ तस्मात्तु एवमूचुर्द्विजोत्तमाः
athaiko bahudhā proktaḥ sadasyaiśca dvijottamaiḥ ||
daṇḍakāṣṭhaṃ samudyamya pracikṣepa bahistathā
||21||अथैको बहुधा प्रोक्तः सदस्यैश्च द्विजोत्तमैः ॥
दण्डकाष्ठं समुद्यम्य प्रचिक्षेप बहिस्तथा
athānyattatra saṃjātaṃ kapālaṃ tādṛśaṃ punaḥ ||
tasminnapi tathā kṣipte bhūyo'nyatsamapadyata
||22||अथान्यत्तत्र संजातं कपालं तादृशं पुनः ॥
तस्मिन्नपि तथा क्षिप्ते भूयोऽन्यत्समपद्यत
evaṃ śatasahasrāṇi hyayutānyarbudāni ca ||
tatra jātāni tairvyāpto yajñavāṭaḥ samaṃtataḥ
||23||एवं शतसहस्राणि ह्ययुतान्यर्बुदानि च ॥
तत्र जातानि तैर्व्याप्तो यज्ञवाटः समंततः
hāhākārastatau jajñe samaste yajñamaṇḍape ||
dṛṣṭvā kapālasaṃghāṃstānyajña karmapradūṣakān
||24||हाहाकारस्ततौ जज्ञे समस्ते यज्ञमण्डपे ॥
दृष्ट्वा कपालसंघांस्तान्यज्ञ कर्मप्रदूषकान्
atha saṃciṃtayāmāsa dhyānaṃ kṛtvā pitāmahaḥ ||
harāriṣṭaṃ samājñāya tatsarvaṃ hṛṣṭarūpadhṛk
||25||अथ संचिंतयामास ध्यानं कृत्वा पितामहः ॥
हरारिष्टं समाज्ञाय तत्सर्वं हृष्टरूपधृक्
kṛtāṃjalipuṭo bhūtvā tataḥ provāca sādaram ||
maheśvaraṃ samāsādya yajñavāṭasamāśritam
||26||कृतांजलिपुटो भूत्वा ततः प्रोवाच सादरम् ॥
महेश्वरं समासाद्य यज्ञवाटसमाश्रितम्
kimidaṃ yujyate deva yajñe'sminkarmaṇaḥ kṣatiḥ ||
tasmātsaṃhara sarvāṇi kapālāni sureśvara
||27||किमिदं युज्यते देव यज्ञेऽस्मिन्कर्मणः क्षतिः ॥
तस्मात्संहर सर्वाणि कपालानि सुरेश्वर
yajñakarmavilopo'yaṃ mā bhūttvayi samāgate
||28||यज्ञकर्मविलोपोऽयं मा भूत्त्वयि समागते
tataḥ provāca saṃkruddho bhagavāñchaśiśekharaḥ ||
tanmameṣṭatamaṃ pātraṃ bhojanāya sadā sthitam
||29||ततः प्रोवाच संक्रुद्धो भगवाञ्छशिशेखरः ॥
तन्ममेष्टतमं पात्रं भोजनाय सदा स्थितम्
ete dvijādhamāḥ kasmādvidviṣaṃtipitāmaha ||
tathā na māṃ samuddiśya juhuvurjātavedasi
||30||एते द्विजाधमाः कस्माद्विद्विषंतिपितामह ॥
तथा न मां समुद्दिश्य जुहुवुर्जातवेदसि
yathānyādevatā stadvanmantrapūtaṃ havirvidhe ||
tasmādyadi vidhe kāryā samāptiryajñakarmaṇi
||31||यथान्यादेवता स्तद्वन्मन्त्रपूतं हविर्विधे ॥
तस्माद्यदि विधे कार्या समाप्तिर्यज्ञकर्मणि
tatkapālāśritaṃ havyaṃ kartavyaṃ sakalaṃ tvidam ||
tathā ca māṃ samu ddiśya viśaṣājjātavedasi
||32||तत्कपालाश्रितं हव्यं कर्तव्यं सकलं त्विदम् ॥
तथा च मां समु द्दिश्य विशषाज्जातवेदसि
hotavyaṃ havirevātra samāptiṃ yāsyati kratuḥ ||
nānyathā satyamevoktaṃ tavāgre caturānana
||33||होतव्यं हविरेवात्र समाप्तिं यास्यति क्रतुः ॥
नान्यथा सत्यमेवोक्तं तवाग्रे चतुरानन
pitāmaha uvāca
rūpāṇi tava deveśa pṛthagbhūtānyanekaśaḥ ||
saṃkhyayā parihīnāni dhyeyāni sakalāni ca
||34||रूपाणि तव देवेश पृथग्भूतान्यनेकशः ॥
संख्यया परिहीनानि ध्येयानि सकलानि च
etanmahāvrataṃ rūpamākhyātaṃ te trilocana ||
naivaṃ ca makhakarma syāttatraiva ca na yujyate
||35||एतन्महाव्रतं रूपमाख्यातं ते त्रिलोचन ॥
नैवं च मखकर्म स्यात्तत्रैव च न युज्यते
adyaitatkarma kartuṃ ca śrutibāhyaṃ kathaṃcana ||
tava vākyamapi tryakṣa nānyathā kartumutsahe
||36||अद्यैतत्कर्म कर्तुं च श्रुतिबाह्यं कथंचन ॥
तव वाक्यमपि त्र्यक्ष नान्यथा कर्तुमुत्सहे
mṛnmayeṣu kapāleṣu haviḥ śrāpyaṃ sureśvara ||
adyaprabhṛti yajñeṣu puroḍāśātmikaṃ dvijaiḥ ||
tavoddeśena deveśa hotavyaṃ śatarudriyam
||37||मृन्मयेषु कपालेषु हविः श्राप्यं सुरेश्वर ॥
अद्यप्रभृति यज्ञेषु पुरोडाशात्मिकं द्विजैः ॥
तवोद्देशेन देवेश होतव्यं शतरुद्रियम्
viśeṣātsarvayajñeṣu japyaṃ caiva viśeṣataḥ ||
kapālānāṃ tu dvāreṇa tvayā rūpaṃ nijaṃ kṛtam
||38||विशेषात्सर्वयज्ञेषु जप्यं चैव विशेषतः ॥
कपालानां तु द्वारेण त्वया रूपं निजं कृतम्
prakaṭaṃ ca suraśreṣṭha kapāleśvarasaṃjñitaḥ ||
tasmāttvaṃ bhavitā rudra kṣetre'smindvādaśo'paraḥ
||39||प्रकटं च सुरश्रेष्ठ कपालेश्वरसंज्ञितः ॥
तस्मात्त्वं भविता रुद्र क्षेत्रेऽस्मिन्द्वादशोऽपरः
atra yajñaṃ samārabhya yastvāṃ prākpūjayiṣyati ||
avighnena makhastasya samāptiṃ pravrajiṣyati
||40||अत्र यज्ञं समारभ्य यस्त्वां प्राक्पूजयिष्यति ॥
अविघ्नेन मखस्तस्य समाप्तिं प्रव्रजिष्यति
evamukte tatastena kapālāni dvijottamāḥ ||
tāni sarvāṇi naṣṭāni saṃkhyayā rahitāni ca
||41||एवमुक्ते ततस्तेन कपालानि द्विजोत्तमाः ॥
तानि सर्वाणि नष्टानि संख्यया रहितानि च
tato hṛṣṭaścaturvaktraḥ sthāpayāmāsa tatkṣaṇāt ||
ligaṃ māheśvaraṃ tatra kapāleśvarasaṃjñitam
||42||ततो हृष्टश्चतुर्वक्त्रः स्थापयामास तत्क्षणात् ॥
लिगं माहेश्वरं तत्र कपालेश्वरसंज्ञितम्
abravīcca tato vākyaṃ yaścaitatpūjayiṣyati ||
mama kuṇḍatraye snātvā sa yāsyati parāṃ gatim
||43||अब्रवीच्च ततो वाक्यं यश्चैतत्पूजयिष्यति ॥
मम कुण्डत्रये स्नात्वा स यास्यति परां गतिम्
śuklapakṣe caturdaśyāṃ kārtike jāgaraṃ tu yaḥ ||
kariṣyati punaścāsya liṃgasya susamāhitaḥ ||
ājanmaprabhavātpāpātsa vimuktimavāpsyati
||44||शुक्लपक्षे चतुर्दश्यां कार्तिके जागरं तु यः ॥
करिष्यति पुनश्चास्य लिंगस्य सुसमाहितः ॥
आजन्मप्रभवात्पापात्स विमुक्तिमवाप्स्यति
evamukte'tha vidhinā prahṛṣṭastripurāṃtakaḥ ||
yajñamaṇḍapamāsādya prasthito vedisaṃnidhau
||45||एवमुक्तेऽथ विधिना प्रहृष्टस्त्रिपुरांतकः ॥
यज्ञमण्डपमासाद्य प्रस्थितो वेदिसंनिधौ
brāhmaṇaiśca tataḥ karma prārabdhaṃ yajñasambhavam ||
vismayotphullanayanairnamaskṛtya maheśvaram
||46||ब्राह्मणैश्च ततः कर्म प्रारब्धं यज्ञसम्भवम् ॥
विस्मयोत्फुल्लनयनैर्नमस्कृत्य महेश्वरम्
sūta uvāca
evaṃ ca yaja tastasya caturvaktrasya tatra ca ||
ṛṣīṇāṃ koṭirāyātā dakṣiṇāpathavāsinām
||47||एवं च यज तस्तस्य चतुर्वक्त्रस्य तत्र च ॥
ऋषीणां कोटिरायाता दक्षिणापथवासिनाम्
śrutvā paitāmahaṃ yajñaṃ kautukena samanvitāḥ ||
kīdṛśo bhavitā yajño dīkṣito yatra padmajaḥ
||488||श्रुत्वा पैतामहं यज्ञं कौतुकेन समन्विताः ॥
कीदृशो भविता यज्ञो दीक्षितो यत्र पद्मजः
kīdṛkkṣetraṃ ca tatpuṇyaṃ hāṭakeśvarasaṃjñitam ||
kīdṛśāste ca viprendrā ṛtvijastatra ye sthitāḥ
||49||कीदृक्क्षेत्रं च तत्पुण्यं हाटकेश्वरसंज्ञितम् ॥
कीदृशास्ते च विप्रेन्द्रा ऋत्विजस्तत्र ये स्थिताः
atha te supariśrāṃtā madhyaṃdinagate ravau ||
ravivāreṇa saṃprāpte nakṣatre cāśvisaṃsthite
||50||अथ ते सुपरिश्रांता मध्यंदिनगते रवौ ॥
रविवारेण संप्राप्ते नक्षत्रे चाश्विसंस्थिते
vaivasvatyāṃ tithau caiva prāptā gharmapīḍitāḥ ||
kaṃcijjalāśayaṃ prāpya praviṣṭāḥ salilaṃ śubham
||51||वैवस्वत्यां तिथौ चैव प्राप्ता घर्मपीडिताः ॥
कंचिज्जलाशयं प्राप्य प्रविष्टाः सलिलं शुभम्
śaṃkukarṇā mahākarṇā vakanāsāstathāpare ||
mahodarā bṛhaddantā dīrghoṣṭhāḥ sthūlamastakāḥ
||52||शंकुकर्णा महाकर्णा वकनासास्तथापरे ॥
महोदरा बृहद्दन्ता दीर्घोष्ठाः स्थूलमस्तकाः
cipiṭākṣāstathā cānye dīrghagrīvāstathā pare ||
kṛṣṇāṃgāḥ sphuṭitaiḥ pādairnakhairdīrghaiḥ samutthitaiḥ
||53||चिपिटाक्षास्तथा चान्ये दीर्घग्रीवास्तथा परे ॥
कृष्णांगाः स्फुटितैः पादैर्नखैर्दीर्घैः समुत्थितैः
tato yāvadviniṣkrāṃtāḥ prapaśyanti parasparam ||
tāvadvairūpasyanirmuktāḥ saṃjātāḥ kāmasannibhāḥ
||54||ततो यावद्विनिष्क्रांताः प्रपश्यन्ति परस्परम् ॥
तावद्वैरूपस्यनिर्मुक्ताः संजाताः कामसन्निभाः
tato vismayamāpannā mithaḥ procuḥ praharṣitāḥ ||
rūpavyatyayamālokya jñātvā tīrthaṃ taduttamam ||
atra snānādidaṃ rūpamasmābhiḥ prāptamuttamam
||55||ततो विस्मयमापन्ना मिथः प्रोचुः प्रहर्षिताः ॥
रूपव्यत्ययमालोक्य ज्ञात्वा तीर्थं तदुत्तमम् ॥
अत्र स्नानादिदं रूपमस्माभिः प्राप्तमुत्तमम्
yasmāttasmādidaṃ tīrthaṃ rūpatīrthaṃ bhaviṣyati ||
trailokye sakale khyātaṃ sarvapātakanāśanam
||56||यस्मात्तस्मादिदं तीर्थं रूपतीर्थं भविष्यति ॥
त्रैलोक्ये सकले ख्यातं सर्वपातकनाशनम्
ye'tra snānaṃ kariṣyanti śraddhayā parayā yutāḥ ||
surūpāste bhaviṣyaṃti sadā janmani janmani
||57||येऽत्र स्नानं करिष्यन्ति श्रद्धया परया युताः ॥
सुरूपास्ते भविष्यंति सदा जन्मनि जन्मनि
pitṝṃśca tarpayiṣyanti ya tra śraddhāsamanvitāḥ ||
jalenāpi gayāśrāddhātte lapsyante dhikaṃ phalam
||58||पितॄंश्च तर्पयिष्यन्ति य त्र श्रद्धासमन्विताः ॥
जलेनापि गयाश्राद्धात्ते लप्स्यन्ते धिकं फलम्
ye'tra ratnapradānaṃ ca prakariṣyanti mānavāḥ ||
bhaviṣyaṃti na saṃdeho rājānaste bhavebhave
||59||येऽत्र रत्नप्रदानं च प्रकरिष्यन्ति मानवाः ॥
भविष्यंति न संदेहो राजानस्ते भवेभवे
sthāsyāmo vayamatraiva sāṃprataṃ kṛtaniścayāḥ ||
na yāsyāmo vayaṃ tīrthaṃ yadyapi syātsuśobhanam
||60||स्थास्यामो वयमत्रैव सांप्रतं कृतनिश्चयाः ॥
न यास्यामो वयं तीर्थं यद्यपि स्यात्सुशोभनम्
evamuktvā'tha vyabhajaṃstatsarvaṃ munayaśca te ||
yajñopavītamātrāṇi svāni tīrthāni cakrire
||61||एवमुक्त्वाऽथ व्यभजंस्तत्सर्वं मुनयश्च ते ॥
यज्ञोपवीतमात्राणि स्वानि तीर्थानि चक्रिरे
sūta uvāca
adyāpi ca dvijaśreṣṭhāstatra tīrthe jagadguruḥ ||
prathamaṃ spṛśate toyaṃ nityaṃ syāddayitaṃ śubham
||62||अद्यापि च द्विजश्रेष्ठास्तत्र तीर्थे जगद्गुरुः ॥
प्रथमं स्पृशते तोयं नित्यं स्याद्दयितं शुभम्
niṣkāmastu punarmartyo yaḥ snānaṃ tatra śraddhayā|
. kurute sa paraṃ śreyaḥ prāpnuyātsiddhilakṣaṇam
||63||निष्कामस्तु पुनर्मर्त्यो यः स्नानं तत्र श्रद्धया।
. कुरुते स परं श्रेयः प्राप्नुयात्सिद्धिलक्षणम्
evaṃ te munayaḥ sarve vibhajya tanmahatsaraḥ ||
sāyaṃtanaṃ ca tatraiva kṛtvā karma suvistaram ||
tato niśāmukhe prāptā yatra devaḥ pitāmahaḥ ||
dīkṣitastvatha maunī ca yajñamaṇḍapasaṃśritaḥ
||65||एवं ते मुनयः सर्वे विभज्य तन्महत्सरः ॥
सायंतनं च तत्रैव कृत्वा कर्म सुविस्तरम् ॥
ततो निशामुखे प्राप्ता यत्र देवः पितामहः ॥
दीक्षितस्त्वथ मौनी च यज्ञमण्डपसंश्रितः
taṃ praṇamya tataḥ sarve gatā yatrartvijaḥ sthitāḥ ||
upaviṣṭāḥ pariśrāntā divā yajñiyakarmaṇā
||66||तं प्रणम्य ततः सर्वे गता यत्रर्त्विजः स्थिताः ॥
उपविष्टाः परिश्रान्ता दिवा यज्ञियकर्मणा
indrādikaiḥ surairbhaktyā mṛdyamānāṅghrayaḥ sthitāḥ ||
abhivādyātha tānsarvānupaviṣṭāstato grataḥ
||67||इन्द्रादिकैः सुरैर्भक्त्या मृद्यमानाङ्घ्रयः स्थिताः ॥
अभिवाद्याथ तान्सर्वानुपविष्टास्ततो ग्रतः
cakruścātha kathāścitrā yajñakarmasamudbhavāḥ ||
somapānasya saṃbandho vyatyayaṃ ca samudbhavam
||68||चक्रुश्चाथ कथाश्चित्रा यज्ञकर्मसमुद्भवाः ॥
सोमपानस्य संबन्धो व्यत्ययं च समुद्भवम्
udgātuḥ prabhavaṃ caiva tathādhvaryoḥ parasparam ||
procuste tattvamāśritya tathānye dūṣayanti tat
||69||उद्गातुः प्रभवं चैव तथाध्वर्योः परस्परम् ॥
प्रोचुस्ते तत्त्वमाश्रित्य तथान्ये दूषयन्ति तत्
anye mīmāṃsakāstatra kopasaṃraktalocanāḥ|
. hanyusteṣāṃ mataṃ vādamāśritā vāgvicakṣaṇāḥ
||70||अन्ये मीमांसकास्तत्र कोपसंरक्तलोचनाः।
. हन्युस्तेषां मतं वादमाश्रिता वाग्विचक्षणाः
pariśiṣṭavidaścānye madhyasthā dvijasattamāḥ ||
procurvādaṃ parityajya sābhiprāyaṃ yathoditam
||71||परिशिष्टविदश्चान्ये मध्यस्था द्विजसत्तमाः ॥
प्रोचुर्वादं परित्यज्य साभिप्रायं यथोदितम्
mahāvīrapuroḍāśacayanapramukhāṃstathā ||
vivādāṃścakrire cānye svaṃsvaṃ pakṣaṃ samāśritāḥ
||72||महावीरपुरोडाशचयनप्रमुखांस्तथा ॥
विवादांश्चक्रिरे चान्ये स्वंस्वं पक्षं समाश्रिताः
evaṃ sā rajanī teṣāmatikrāntā dvijanmanām
||73||एवं सा रजनी तेषामतिक्रान्ता द्विजन्मनाम्
iti śrīskānde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye rūpatīrthotpattipūrvakaprathamayajñadivasavṛttāntavarṇanaṃnāma dvyaśītyuttaraśatatamo'dhyāyaḥ || 182 ||