śrāddhārhapadārthabrāhmaṇakālanirṇayavarṇanam
ānarta uvāca
vidhinā yena kartavyaṃ śrāddhaṃ sarvaṃ munīśvara ||
tamācakṣvā'dya kārtsnyena śraddhā me mahatī sthitā
||1||विधिना येन कर्तव्यं श्राद्धं सर्वं मुनीश्वर ॥
तमाचक्ष्वाऽद्य कार्त्स्न्येन श्रद्धा मे महती स्थिता
bhartṛyajña uvāca
śṛṇu rājanpravakṣyāmi śrāddhasya vidhimuttamam ||
pitṝṇāṃ tuṣṭidaṃ nityaṃ sarvakāmapradaṃ nṛṇām
||2||शृणु राजन्प्रवक्ष्यामि श्राद्धस्य विधिमुत्तमम् ॥
पितॄणां तुष्टिदं नित्यं सर्वकामप्रदं नृणाम्
svakarmopārjitairvittaiḥ śrāddhakāryāṇi cāharet ||
māyādibhirna cauryeṇa na cchalāptairna vaṃcanaiḥ ||
svavṛttyopārjitairvittaiḥ śrāddhadravyaṃ samāharet ||
supratigrahajairdravyairbrāhmaṇānāṃ viśiṣyate
||4||स्वकर्मोपार्जितैर्वित्तैः श्राद्धकार्याणि चाहरेत् ॥
मायादिभिर्न चौर्येण न च्छलाप्तैर्न वंचनैः ॥
स्ववृत्त्योपार्जितैर्वित्तैः श्राद्धद्रव्यं समाहरेत् ॥
सुप्रतिग्रहजैर्द्रव्यैर्ब्राह्मणानां विशिष्यते
rakṣaṇāptairnarendrasya vaiśyasya kṣetra saṃbhavaiḥ ||
śūdrasya paṇyalabdhaiśca śrāddhaṃ kartuṃ prayujyate
||5||रक्षणाप्तैर्नरेन्द्रस्य वैश्यस्य क्षेत्र संभवैः ॥
शूद्रस्य पण्यलब्धैश्च श्राद्धं कर्तुं प्रयुज्यते
evaṃ śuddhisamopete dravye prāpte gṛhāṃtikam ||
pūrvedyuḥ sāyamāsādya śrāddhārhāṇāṃ dvijanmanām
||6||एवं शुद्धिसमोपेते द्रव्ये प्राप्ते गृहांतिकम् ॥
पूर्वेद्युः सायमासाद्य श्राद्धार्हाणां द्विजन्मनाम्
gṛhaṃ gatvā śucirbhūtvā kāmakrodhavivarjitaḥ ||
āmaṃtrayedyatīnpaścātsnātakānbrahmakarmiṇaḥ
||7||गृहं गत्वा शुचिर्भूत्वा कामक्रोधविवर्जितः ॥
आमंत्रयेद्यतीन्पश्चात्स्नातकान्ब्रह्मकर्मिणः
tadabhāve gṛhasthāṃśca brahmajñānaparāyaṇān ||
agnihotraparānviprānvedavidyāvicakṣaṇān
||8||तदभावे गृहस्थांश्च ब्रह्मज्ञानपरायणान् ॥
अग्निहोत्रपरान्विप्रान्वेदविद्याविचक्षणान्
śrotriyāṃśca tathā vṛddhānṣaṭkarmaniratānsadā ||
bahubhṛtyakuṭumbāṃśca daridrnsaṃyutānguṇaiḥ
||9||श्रोत्रियांश्च तथा वृद्धान्षट्कर्मनिरतान्सदा ॥
बहुभृत्यकुटुम्बांश्च दरिद्रा्न्संयुतान्गुणैः
avyaṃgānroganirmuktāñjitāhārāṃstathā śucīn ||
ete syurbrāhmaṇā rājañchrāddhārhāḥ parikīrtitāḥ
||10||अव्यंगान्रोगनिर्मुक्ताञ्जिताहारांस्तथा शुचीन् ॥
एते स्युर्ब्राह्मणा राजञ्छ्राद्धार्हाः परिकीर्तिताः
anarhā ye ca nirdiṣṭāḥ śṛṇu tānapi vacmi te ||
hīnāṃgānadhikāṃgāṃśca sarvabhākṣannirākṛtīn
||11||अनर्हा ये च निर्दिष्टाः शृणु तानपि वच्मि ते ॥
हीनांगानधिकांगांश्च सर्वभाक्षन्निराकृतीन्
śyāvadantānvṛthādantānvedavikrayakārakān ||
vedaviplavakānvāpi vedaśāstravivarjitān
||12||श्यावदन्तान्वृथादन्तान्वेदविक्रयकारकान् ॥
वेदविप्लवकान्वापि वेदशास्त्रविवर्जितान्
kunakhānrogasaṃyuktāndvirnagnānparahiṃsakān ||
janāpavādasaṃyuktānnāstikānṛtakānapi
||13||कुनखान्रोगसंयुक्तान्द्विर्नग्नान्परहिंसकान् ॥
जनापवादसंयुक्तान्नास्तिकानृतकानपि
vārdhuṣikānvikarmasthāñchaucācāravivarji tān ||
atidīrghānkṛśānvāpi sthūlānapi ca lomaśān
||14||वार्धुषिकान्विकर्मस्थाञ्छौचाचारविवर्जि तान् ॥
अतिदीर्घान्कृशान्वापि स्थूलानपि च लोमशान्
nirlomānvarjayecchrāddhe ya icchetpitṛgauravam ||
paradāraratā ye ca tathā yo vṛṣalī patiḥ
||15||निर्लोमान्वर्जयेच्छ्राद्धे य इच्छेत्पितृगौरवम् ॥
परदाररता ये च तथा यो वृषली पतिः
vaṃdhyā vai vṛṣalī proktā vṛṣalī ca mṛtaprajā ||
aparā vṛṣalī proktā kumārī yā rajasvalā
||16||वंध्या वै वृषली प्रोक्ता वृषली च मृतप्रजा ॥
अपरा वृषली प्रोक्ता कुमारी या रजस्वला
ṣaṇḍho malimluco dambhī rājapai śunyavṛttayaḥ ||
sagotrāyāśca saṃbhūtastathaikapravarāsutaḥ
||17||षण्ढो मलिम्लुचो दम्भी राजपै शुन्यवृत्तयः ॥
सगोत्रायाश्च संभूतस्तथैकप्रवरासुतः
kaniṣṭhaḥ prākkṛtādhānaḥ kṛtodvāhaśca prāktu yaḥ ||
tathā prāgdīkṣito yaśca sa tyājyo gṛhasaṃyutaḥ
||18||कनिष्ठः प्राक्कृताधानः कृतोद्वाहश्च प्राक्तु यः ॥
तथा प्राग्दीक्षितो यश्च स त्याज्यो गृहसंयुतः
pitṛmātṛparityāgī tathāca gurutalpagaḥ ||
nirddoṣāṃ yastyajetpatnīṃ kṛtaghno yaśca karṣukaḥ
||19||पितृमातृपरित्यागी तथाच गुरुतल्पगः ॥
निर्द्दोषां यस्त्यजेत्पत्नीं कृतघ्नो यश्च कर्षुकः
śilpajīvī pramādī ca paṇya jīvī kṛtāyudhaḥ ||
etānvivarjayecchrāddhe yeṣāṃ no jñāyate kulam
||20||शिल्पजीवी प्रमादी च पण्य जीवी कृतायुधः ॥
एतान्विवर्जयेच्छ्राद्धे येषां नो ज्ञायते कुलम्
ata ūrdhvaṃ pravakṣyāmi ye śastāḥ śrāddhakarmaṇi ||
ye brāhmaṇāḥ purā khyātāḥ pāpānāṃ paṃktipāvanāḥ
||21||अत ऊर्ध्वं प्रवक्ष्यामि ये शस्ताः श्राद्धकर्मणि ॥
ये ब्राह्मणाः पुरा ख्याताः पापानां पंक्तिपावनाः
triṇāciketastrimadhustrisuparṇaḥ ṣaḍaṃgavit ||
yaśca vidyāvratasnāto dharmadroṇasya pāṭhakaḥ
||22||त्रिणाचिकेतस्त्रिमधुस्त्रिसुपर्णः षडंगवित् ॥
यश्च विद्याव्रतस्नातो धर्मद्रोणस्य पाठकः
purāṇajñastathā jñānī vijñeyo jyeṣṭhasāmavit ||
atharvaśiraso vettā kratugāmī sukarmakṛt
||23||पुराणज्ञस्तथा ज्ञानी विज्ञेयो ज्येष्ठसामवित् ॥
अथर्वशिरसो वेत्ता क्रतुगामी सुकर्मकृत्
sadyaḥprakṣālako yaśca śuklo dauhitra eva ca ||
jāmātā bhāgineyaśca paropakaraṇe rataḥ
||22||सद्यःप्रक्षालको यश्च शुक्लो दौहित्र एव च ॥
जामाता भागिनेयश्च परोपकरणे रतः
mṛṣṭānnādo mṛṣṭavākyaḥ sadā japaparāyaṇaḥ ||
ete ? brāhmaṇā jñeyā niḥśeṣāḥ paṃktipāvanāḥ
||25||मृष्टान्नादो मृष्टवाक्यः सदा जपपरायणः ॥
एते ? ब्राह्मणा ज्ञेया निःशेषाः पंक्तिपावनाः
etairvimiśritāḥ sarve garhitā api ye dvijāḥ ||
pitṝṇāṃ te'pi kurvaṃti tṛptiṃ bhuktvā kulodbhavāḥ
||26||एतैर्विमिश्रिताः सर्वे गर्हिता अपि ये द्विजाः ॥
पितॄणां तेऽपि कुर्वंति तृप्तिं भुक्त्वा कुलोद्भवाः
tasmātsarvaprayatnena kulaṃ jñeyaṃ dbijanmanām ||
śīlaṃ paścādvayo nāma kanyādānaṃ tataḥ param
||27||तस्मात्सर्वप्रयत्नेन कुलं ज्ञेयं द्बिजन्मनाम् ॥
शीलं पश्चाद्वयो नाम कन्यादानं ततः परम्
śrutaśīlavihīnāya dharmajñāyāpi mānavaḥ ||
śrāddhaṃ dadāti kanyāṃ ca yastenāgniṃ vinā hutam
||28||श्रुतशीलविहीनाय धर्मज्ञायापि मानवः ॥
श्राद्धं ददाति कन्यां च यस्तेनाग्निं विना हुतम्
ūṣare vāpi taṃ sasyaṃ tuṣāṇāṃ kaṇḍanaṃ kṛtam ||
kulācārasamopetāṃstasmācchrāddhe niyojayet
||29||ऊषरे वापि तं सस्यं तुषाणां कण्डनं कृतम् ॥
कुलाचारसमोपेतांस्तस्माच्छ्राद्धे नियोजयेत्
brāhmaṇānnṛpaśārdūla mandavidyādharānapi ||
evaṃ vijñāya tānviprāngṛhītvā caraṇau tataḥ
||30||ब्राह्मणान्नृपशार्दूल मन्दविद्याधरानपि ॥
एवं विज्ञाय तान्विप्रान्गृहीत्वा चरणौ ततः
prayatnena tu savyena pāṇinā dakṣiṇena tu ||
yugmānatha yathāśaktyā namaskṛtya punaḥpunaḥ
||31||प्रयत्नेन तु सव्येन पाणिना दक्षिणेन तु ॥
युग्मानथ यथाशक्त्या नमस्कृत्य पुनःपुनः
dakṣiṇaṃ jānvathālabhya mantramenamudīrayet ||
āgacchaṃtu mahābhāgā viśvedevā mahābalāḥ
||32||दक्षिणं जान्वथालभ्य मन्त्रमेनमुदीरयेत् ॥
आगच्छंतु महाभागा विश्वेदेवा महाबलाः
bhaktyāhūtā mayā caiva tvaṃ cāpi vratabhāgbhava ||
evaṃ yugmā nsamāmaṃtrya viśvedevakṛte dvijān
||33||भक्त्याहूता मया चैव त्वं चापि व्रतभाग्भव ॥
एवं युग्मा न्समामंत्र्य विश्वेदेवकृते द्विजान्
apasavyaṃ tataḥ kṛtvā pitrarthaṃ cābhimaṃtrayet ||
brāhmaṇāṃstrīnyathāśaktyā ekaikasya pṛthakpṛthak
||34||अपसव्यं ततः कृत्वा पित्रर्थं चाभिमंत्रयेत् ॥
ब्राह्मणांस्त्रीन्यथाशक्त्या एकैकस्य पृथक्पृथक्
ekaikaṃ vā trayāṇāṃ vā ekamevaṃ nimaṃtrayet ||
brāhmaṇānmātṛpakṣe ca eṣa eva vidhiḥ smṛtaḥ
||35||एकैकं वा त्रयाणां वा एकमेवं निमंत्रयेत् ॥
ब्राह्मणान्मातृपक्षे च एष एव विधिः स्मृतः
tataḥ pādau parispṛṣṭvā dvijasyedamudīrayet ||
śraddhā pūtena manasā pitṛbhaktiparāyaṇaḥ
||36||ततः पादौ परिस्पृष्ट्वा द्विजस्येदमुदीरयेत् ॥
श्रद्धा पूतेन मनसा पितृभक्तिपरायणः
pitā me tava kāyesmiṃstathā caiva pitāmahaḥ ||
svapitrā sahito hyetu tvaṃ ca vrataparo bhava
||37||पिता मे तव कायेस्मिंस्तथा चैव पितामहः ॥
स्वपित्रा सहितो ह्येतु त्वं च व्रतपरो भव
evaṃ pitṝnsamāhūya tathā mātāmahānatha ||
saṃmaṃtritāśca te viprāḥ saṃyamātmāna eva te
||38||एवं पितॄन्समाहूय तथा मातामहानथ ॥
संमंत्रिताश्च ते विप्राः संयमात्मान एव ते
yajamānaḥ śāṃtamanā brahmacaryasamanvitaḥ ||
tāṃ rātriṃ samatikramya prātarutthāya mānavaḥ
||39||यजमानः शांतमना ब्रह्मचर्यसमन्वितः ॥
तां रात्रिं समतिक्रम्य प्रातरुत्थाय मानवः
tadahni varjayetkopaṃ svādhyāyaṃ karma kutsitam ||
tailābhyaṃgaṃ śramaṃ yānaṃ vāhanaṃ cātha dūrataḥ
||40||तदह्नि वर्जयेत्कोपं स्वाध्यायं कर्म कुत्सितम् ॥
तैलाभ्यंगं श्रमं यानं वाहनं चाथ दूरतः
tato madhyaṃ gate sūrye kāle kutapasaṃjñite ||
snātaḥ śuklāṃbaradharaḥ santarpya pitṛdevatāḥ ||
santuṣṭāṃśca samāhūtāṃstānviprāñchrāddhamācaret
||41||ततो मध्यं गते सूर्ये काले कुतपसंज्ञिते ॥
स्नातः शुक्लांबरधरः सन्तर्प्य पितृदेवताः ॥
सन्तुष्टांश्च समाहूतांस्तान्विप्राञ्छ्राद्धमाचरेत्
vivikte gṛhamadhyasthe manojñe dakṣiṇāplave ||
na yatra jāyate dṛṣṭiḥ pāpānāṃ krūrakarmiṇām
||42||विविक्ते गृहमध्यस्थे मनोज्ञे दक्षिणाप्लवे ॥
न यत्र जायते दृष्टिः पापानां क्रूरकर्मिणाम्
yacchrāddhaṃ vīkṣate śvā vā nārī vā'tha rajasvalā ||
patito vā varāho vā tacchrāddhaṃ vyarthatāṃ vrajet
||43||यच्छ्राद्धं वीक्षते श्वा वा नारी वाऽथ रजस्वला ॥
पतितो वा वराहो वा तच्छ्राद्धं व्यर्थतां व्रजेत्
annaṃ paryuṣitaṃ yacca tailāktaṃ vā pradīyate ||
sakeśaṃ vā saniṃdyaṃ ca tacchrāddhaṃ vyarthatāṃ vrajet
||44||अन्नं पर्युषितं यच्च तैलाक्तं वा प्रदीयते ॥
सकेशं वा सनिंद्यं च तच्छ्राद्धं व्यर्थतां व्रजेत्
vibhaktirahitaṃ śrāddhaṃ tathā maunavivarjitam ||
dakṣiṇārahitaṃ yacca tacchrāddhaṃ vyarthatāṃ vrajet
||45||विभक्तिरहितं श्राद्धं तथा मौनविवर्जितम् ॥
दक्षिणारहितं यच्च तच्छ्राद्धं व्यर्थतां व्रजेत्
gharaṭṭolūkhalotthau ca yatra śabdau vyavasthitau ||
śūrpasya vā viśeṣeṇa tacchrāddhaṃ vyarthatāṃ vrajet
||46||घरट्टोलूखलोत्थौ च यत्र शब्दौ व्यवस्थितौ ॥
शूर्पस्य वा विशेषेण तच्छ्राद्धं व्यर्थतां व्रजेत्
yatra saṃskriyamāṇe ca kalahaḥ saṃprajāyate ||
paṃktibhedo viśeṣeṇa tacchrāddhaṃ vyarthatāṃ vrajet
||47||यत्र संस्क्रियमाणे च कलहः संप्रजायते ॥
पंक्तिभेदो विशेषेण तच्छ्राद्धं व्यर्थतां व्रजेत्
pūrvāhṇe kriyate yacca rātrau vā saṃdhyayorapi ||
paryākāśe tathā deśe tacchrāddhaṃ vyarthatāṃ vrajeta
||48||पूर्वाह्णे क्रियते यच्च रात्रौ वा संध्ययोरपि ॥
पर्याकाशे तथा देशे तच्छ्राद्धं व्यर्थतां व्रजेत
brāhmaṇo yajamāno vā brahmacaryaṃ vinā yadi ||
bhuṃkte dadyācca yacchrāddhaṃ tadrājanvyarthatāṃ vrajet
||49||ब्राह्मणो यजमानो वा ब्रह्मचर्यं विना यदि ॥
भुंक्ते दद्याच्च यच्छ्राद्धं तद्राजन्व्यर्थतां व्रजेत्
tuṣadhānyaṃ saniṣpāvaṃ yaccocchiṣṭaṃ ca dīyate ||
ardhabhuktaṃ ghṛtaṃ kṣīraṃ tacchrāddhaṃ vyarthatāṃ vrajet
||50||तुषधान्यं सनिष्पावं यच्चोच्छिष्टं च दीयते ॥
अर्धभुक्तं घृतं क्षीरं तच्छ्राद्धं व्यर्थतां व्रजेत्
yeṣu kāleṣu yaddattaṃ śrāddhamakṣayatāṃ vrajet ||
tānahaṃ saṃpravakṣyāmi śṛṇuṣvaikamanā nṛpa
||51||येषु कालेषु यद्दत्तं श्राद्धमक्षयतां व्रजेत् ॥
तानहं संप्रवक्ष्यामि शृणुष्वैकमना नृप
manvādīrapi te vacmi tāḥ śṛṇuṣva narādhipa ||
pitṝṇāṃ vallabhā nityaṃ sarvapāpakṣayāvahāḥ
||52||मन्वादीरपि ते वच्मि ताः शृणुष्व नराधिप ॥
पितॄणां वल्लभा नित्यं सर्वपापक्षयावहाः
yāsu toyamapi kṣmāyāṃ pradattaṃ tilamiśritam ||
pitṛbhyo'kṣayatāṃ yāti śraddhāpūtena cetasā
||53||यासु तोयमपि क्ष्मायां प्रदत्तं तिलमिश्रितम् ॥
पितृभ्योऽक्षयतां याति श्रद्धापूतेन चेतसा
aśvayukchuklanavamī dvādaśī kārtikasya ca ||
tṛtīyāpi ca māghasya tathā bhādrapadasya ca
||54||अश्वयुक्छुक्लनवमी द्वादशी कार्तिकस्य च ॥
तृतीयापि च माघस्य तथा भाद्रपदस्य च
amāvāsyā tapasyasya pauṣasyaikādaśī tathā ||
tathā''ṣāḍhasya daśamī māghamāsasya saptamī
||55||अमावास्या तपस्यस्य पौषस्यैकादशी तथा ॥
तथाऽऽषाढस्य दशमी माघमासस्य सप्तमी
śrāvaṇasyāṣṭamī kṛṣṇā tathā''ṣāḍhī va pūrṇimā ||
tathā kārtikamāsasya yā cānyā phālgunasya ca
||56||श्रावणस्याष्टमी कृष्णा तथाऽऽषाढी व पूर्णिमा ॥
तथा कार्तिकमासस्य या चान्या फाल्गुनस्य च
caitrasya jyeṣṭhamāsasya paṃcaitāḥ pūrṇimā nṛpa ||
manūnāmādayaḥ proktāstithayaste mayā nṛpa
||57||चैत्रस्य ज्येष्ठमासस्य पंचैताः पूर्णिमा नृप ॥
मनूनामादयः प्रोक्तास्तिथयस्ते मया नृप
āsu toyamapi snātvā tila darbhavimiśritam ||
pitṝnuddiśya yo dadyātsa yāti paramāṃ gatim
||58||आसु तोयमपि स्नात्वा तिल दर्भविमिश्रितम् ॥
पितॄनुद्दिश्य यो दद्यात्स याति परमां गतिम्
iha loke pare caiva pitṝṇāṃ ca prasādataḥ ||
kiṃ punarvividhairannai rasairvastraiḥ sadakṣiṇaiḥ
||59||इह लोके परे चैव पितॄणां च प्रसादतः ॥
किं पुनर्विविधैरन्नै रसैर्वस्त्रैः सदक्षिणैः
adhunā śṛṇu rājendra yugādyāḥ pitṛvallabhāḥ ||
yāsāṃ saṃkīrtanenāpi kṣīyate pāpasaṃcayaḥ
||60||अधुना शृणु राजेन्द्र युगाद्याः पितृवल्लभाः ॥
यासां संकीर्तनेनापि क्षीयते पापसंचयः
navamī kārtike śuklā tṛtīyā mādhave sitā ||
amāvāsyā ca tapaso nabhasyasya trayodaśī
||61||नवमी कार्तिके शुक्ला तृतीया माधवे सिता ॥
अमावास्या च तपसो नभस्यस्य त्रयोदशी
tretākṛtakalīnāṃ tu dvāparasyādayaḥ kramāt ||
snāne dāne jape home viśeṣātpitṛtarpaṇe
||62||त्रेताकृतकलीनां तु द्वापरस्यादयः क्रमात् ॥
स्नाने दाने जपे होमे विशेषात्पितृतर्पणे
kṛtasyākṣayakāriṇyaḥ sukṛtasya mahāphalāḥ ||
yadā syānmeṣago bhānustulāṃ vātha yadā vrajet
||63||कृतस्याक्षयकारिण्यः सुकृतस्य महाफलाः ॥
यदा स्यान्मेषगो भानुस्तुलां वाथ यदा व्रजेत्
tadā syādviṣuvākhyastu kālaścākṣayakārakaḥ ||
makare karkaṭe caiva yadā bhānurvrajennṛpa
||64||तदा स्याद्विषुवाख्यस्तु कालश्चाक्षयकारकः ॥
मकरे कर्कटे चैव यदा भानुर्व्रजेन्नृप
tadāyanābhidhānastu viṣuvo'tha viśiṣyate ||
raveḥ saṃkramaṇaṃ rāśau saṃkrāṃtiriti kathyate
||65||तदायनाभिधानस्तु विषुवोऽथ विशिष्यते ॥
रवेः संक्रमणं राशौ संक्रांतिरिति कथ्यते
snānadānajapaśrāddhahomādiṣu mahāphalāḥ ||
tretādyāḥ kramaśaḥ proktāḥ kālāḥ saṃkrāṃtipūrvakāḥ ||
naiteṣu vidyate vighnaṃ dattasyākṣayasaṃjñitāḥ
||66||स्नानदानजपश्राद्धहोमादिषु महाफलाः ॥
त्रेताद्याः क्रमशः प्रोक्ताः कालाः संक्रांतिपूर्वकाः ॥
नैतेषु विद्यते विघ्नं दत्तस्याक्षयसंज्ञिताः
aśraddhayā'pi yaddattaṃ kupātrebhyo'pi mānavaiḥ ||
akāle'pi hi tatsarvaṃ sadyo hyakṣayatāṃ vrajet
||67||अश्रद्धयाऽपि यद्दत्तं कुपात्रेभ्योऽपि मानवैः ॥
अकालेऽपि हि तत्सर्वं सद्यो ह्यक्षयतां व्रजेत्
iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye śrāddhakalpe śrāddhārhapadārthabrāhmaṇakālanirṇaya varṇanaṃnāma saptadaśottaradviśatatamo'dhyāyaḥ || 217 ||