mahālakṣmīmāhātmyavarṇanam
ṛṣaya ūcuḥ
mādhavyāḥ padmayā datto yaḥ śāpastasya yatphalam ||
pariṇāmodbhavaṃ sarvaṃ śrutamasmābhiradya tat
||1||माधव्याः पद्मया दत्तो यः शापस्तस्य यत्फलम् ॥
परिणामोद्भवं सर्वं श्रुतमस्माभिरद्य तत्
tena yatkamalā śaptā brāhmaṇena mahātmanā ||
sā kathaṃ gaja vaktrā'tha punarjātā śubhānanā
||2||तेन यत्कमला शप्ता ब्राह्मणेन महात्मना ॥
सा कथं गज वक्त्राऽथ पुनर्जाता शुभानना
sūta uvāca
śāpena tasya viprasya tatkṣaṇādeva sā dvijāḥ ||
gajavaktrā samutpannā mahāvismayakāriṇī
||3||शापेन तस्य विप्रस्य तत्क्षणादेव सा द्विजाः ॥
गजवक्त्रा समुत्पन्ना महाविस्मयकारिणी
sā proktā hariṇā tiṣṭha kiñcitkālāṃtare śubhe ||
anenaiva tu rūpeṇa yāvatsyāddvāparakṣayaḥ
||4||सा प्रोक्ता हरिणा तिष्ठ किञ्चित्कालांतरे शुभे ॥
अनेनैव तु रूपेण यावत्स्याद्द्वापरक्षयः
tato'haṃ medinīpṛṣṭhe hyavatīrya samudraje ||
tapaḥ śaktyā kariṣyāmi bhūyastvāṃ tu śubhānanām
||5||ततोऽहं मेदिनीपृष्ठे ह्यवतीर्य समुद्रजे ॥
तपः शक्त्या करिष्यामि भूयस्त्वां तु शुभाननाम्
avajñāyātha sā tasya tadvākyaṃ śārṅgadhanvinaḥ ||
śubhāsyatvakṛte tepe tapastīvraṃ suharṣitā
||6||अवज्ञायाथ सा तस्य तद्वाक्यं शार्ङ्गधन्विनः ॥
शुभास्यत्वकृते तेपे तपस्तीव्रं सुहर्षिता
etatkṣetraṃ samāsādya trikālaṃ snānamācarat ||
brahmāṇaṃ toṣayāmāsa divārātrimataṃdritā
||7||एतत्क्षेत्रं समासाद्य त्रिकालं स्नानमाचरत् ॥
ब्रह्माणं तोषयामास दिवारात्रिमतंद्रिता
tāmuvāca tato brahmā varṣāṃte tuṣṭimāgataḥ ||
varaṃ prārthaya tuṣṭo'haṃ tava keśavavallabhe
||8||तामुवाच ततो ब्रह्मा वर्षांते तुष्टिमागतः ॥
वरं प्रार्थय तुष्टोऽहं तव केशववल्लभे
lakṣmīruvāca
gajāsyāhaṃ kṛtā deva śāpaṃ dattvā sudāruṇam ||
brāhmaṇena sukruddhena kasmiścitkāraṇāṃtare
||9||गजास्याहं कृता देव शापं दत्त्वा सुदारुणम् ॥
ब्राह्मणेन सुक्रुद्धेन कस्मिश्चित्कारणांतरे
tasmāttadrūpiṇīṃ bhūyo māṃ kuruṣva pitāmaha ||
yadi me tuṣṭimāpanno nānyatkiṃcidvṛṇomyaham
||10||तस्मात्तद्रूपिणीं भूयो मां कुरुष्व पितामह ॥
यदि मे तुष्टिमापन्नो नान्यत्किंचिद्वृणोम्यहम्
brahmovāca
bhaviṣyati śubhaṃ vaktraṃ matprasādādasaṃśayam ||
tava bhadre viśeṣeṇa tasmāttvaṃ svagṛhaṃ vraja
||11||भविष्यति शुभं वक्त्रं मत्प्रसादादसंशयम् ॥
तव भद्रे विशेषेण तस्मात्त्वं स्वगृहं व्रज
mahattvaṃ te mayā dattamadyaprabhṛti śobhane ||
mahālakṣmīti te nāma tasmādatra bhaviṣyati
||12||महत्त्वं ते मया दत्तमद्यप्रभृति शोभने ॥
महालक्ष्मीति ते नाम तस्मादत्र भविष्यति
gajavaktrāṃ naro yastvāṃ pūjayiṣyati bhaktitaḥ ||
sa gajādhipatirbhūpo bhaviṣyati ca bhūtale
||13||गजवक्त्रां नरो यस्त्वां पूजयिष्यति भक्तितः ॥
स गजाधिपतिर्भूपो भविष्यति च भूतले
dvitīyādivase yastvāṃ mahālakṣmīriti bruvan ||
śrīsūktena subhaktyā'tha devi saṃpūjayiṣyati
||14||द्वितीयादिवसे यस्त्वां महालक्ष्मीरिति ब्रुवन् ॥
श्रीसूक्तेन सुभक्त्याऽथ देवि संपूजयिष्यति
saptajanmāṃtarāṇyeva na bhaviṣyati so'dhanaḥ ||
evamuktvā caturvaktro virarāma tataḥ param
||15||सप्तजन्मांतराण्येव न भविष्यति सोऽधनः ॥
एवमुक्त्वा चतुर्वक्त्रो विरराम ततः परम्
sā'pi hṛṣṭā gatā devī yatra tiṣṭhati keśavaḥ
||16||साऽपि हृष्टा गता देवी यत्र तिष्ठति केशवः
iti śrīskāṃde mahāpurāṇa ekāśīti sāhasryāṃ saṃhitāyāṃ ṣaṣṭhe nāgara khaṇḍe hāṭakeśvarakṣetramāhātmye mahālakṣmīmāhātmyavarṇanaṃnāma pañcāśītitamo'dhyāyaḥ || 85 ||