śrīhāṭakeśvarakṣetramāhātmye'jāpāleśvarīmāhātmyavarṇanam
sūta uvāca
athānyāpi ca tatrāsti deśakāmapradā nṛṇām ||
ajāpālena bhūpena sthāpitā pāpanāśanī
||1||अथान्यापि च तत्रास्ति देशकामप्रदा नृणाम् ॥
अजापालेन भूपेन स्थापिता पापनाशनी
tāṃ ca śuklacaturdaśyāmajāpāleśvarīṃ naraḥ ||
yo vai pūjayate bhaktyā dhūpapuṣpānulepanaiḥ ||
sa prāpnotīpsitānkāmāndurlabhā sarvamānavaiḥ
||2||तां च शुक्लचतुर्दश्यामजापालेश्वरीं नरः ॥
यो वै पूजयते भक्त्या धूपपुष्पानुलेपनैः ॥
स प्राप्नोतीप्सितान्कामान्दुर्लभा सर्वमानवैः
tasyā devyāḥ prasādena satyametanmayoditam ||
ajāpālo mahīpālaḥ purā''sītsaṃmataḥ satām
||3||तस्या देव्याः प्रसादेन सत्यमेतन्मयोदितम् ॥
अजापालो महीपालः पुराऽऽसीत्संमतः सताम्
hitakṛtsarvalokasya yathā mātā yathā pitā ||
tena rājyaṃ samāsādya pitṛpaitāmahaṃ śubham
||4||हितकृत्सर्वलोकस्य यथा माता यथा पिता ॥
तेन राज्यं समासाद्य पितृपैतामहं शुभम्
ciṃtitaṃ manasā paścātsvayameva mahātmanā ||
mayā tatkarma kartavyaṃ yadanyairiha bhūmipaiḥ ||
na kṛtaṃ na kariṣyaṃti ye bhaviṣyantyataḥ param
||5||चिंतितं मनसा पश्चात्स्वयमेव महात्मना ॥
मया तत्कर्म कर्तव्यं यदन्यैरिह भूमिपैः ॥
न कृतं न करिष्यंति ये भविष्यन्त्यतः परम्
eṣa eva paro dharmo bhūpatīnāmudāhṛtaḥ ||
yatprajāpālanaṃ śaśvattāsāṃ ca sukhasaṃsthitiḥ
||6||एष एव परो धर्मो भूपतीनामुदाहृतः ॥
यत्प्रजापालनं शश्वत्तासां च सुखसंस्थितिः
yathāyathā karaṃ bhūpāstā māṃ gṛhṇaṃti lolupāḥ ||
tathātathā manaḥkṣobho hṛdaye saṃprajāyate
||7||यथायथा करं भूपास्ता मां गृह्णंति लोलुपाः ॥
तथातथा मनःक्षोभो हृदये संप्रजायते
na kareṇa vinā bhūpā hastyaśvādibalaṃ ca yat ||
śaknuvaṃti paritrātuṃ pādātaṃ ca viśeṣataḥ
||8||न करेण विना भूपा हस्त्यश्वादिबलं च यत् ॥
शक्नुवंति परित्रातुं पादातं च विशेषतः
vinā tena sa gamyaḥ syānnīcānāmapi satvaram ||
etasmātkāraṇādbhūpāḥ karaṃ gṛhṇaṃti lokataḥ
||9||विना तेन स गम्यः स्यान्नीचानामपि सत्वरम् ॥
एतस्मात्कारणाद्भूपाः करं गृह्णंति लोकतः
tasmānmayā vināpyāśu nāgaiścaiva naraistathā ||
tapaḥ śaktyā prakartavyaṃ rājyaṃ nihatakaṇṭakam
||10||तस्मान्मया विनाप्याशु नागैश्चैव नरैस्तथा ॥
तपः शक्त्या प्रकर्तव्यं राज्यं निहतकण्टकम्
karānagṛhṇatā tena lokānraṃjayatā sadā ||
anyeṣāṃ bhūmipālānāṃ viśeṣeṇa mahātmanām
||11||करानगृह्णता तेन लोकान्रंजयता सदा ॥
अन्येषां भूमिपालानां विशेषेण महात्मनाम्
evaṃ citte samādhāya vasiṣṭhaṃ munipuṃgavam ||
purodhasaṃ samāhūya tataḥ provāca sādaram
||12||एवं चित्ते समाधाय वसिष्ठं मुनिपुंगवम् ॥
पुरोधसं समाहूय ततः प्रोवाच सादरम्
atra bhūmitale vipra sarveṣāṃ tīrthamuttamam ||
alpakālena santuṣṭiṃ yatra yāti maheśvaraḥ ||
vāsudevo'thavā brahmā hyetacchīghraṃ vadasva me
||13||अत्र भूमितले विप्र सर्वेषां तीर्थमुत्तमम् ॥
अल्पकालेन सन्तुष्टिं यत्र याति महेश्वरः ॥
वासुदेवोऽथवा ब्रह्मा ह्येतच्छीघ्रं वदस्व मे
yenāhaṃ sarvalokasya hitārthaṃ tapa ādade ||
na svārthaṃ brāhmaṇaśreṣṭha satyenātmānamālabhe
||14||येनाहं सर्वलोकस्य हितार्थं तप आददे ॥
न स्वार्थं ब्राह्मणश्रेष्ठ सत्येनात्मानमालभे
vasiṣṭha uvāca
tisraḥ koṭyordhakoṭī ca tīrthānāmiha bhūtale ||
saṃti pārthivaśārdūla prabhāvasahitāni ca
||15||तिस्रः कोट्योर्धकोटी च तीर्थानामिह भूतले ॥
संति पार्थिवशार्दूल प्रभावसहितानि च
aṣṭaṣaṣṭistathā rājankṣetrāṇāmasti bhūtale ||
yeṣāṃ sāṃnidhyamabhyeti sarvadaiva maheśvaraḥ
||16||अष्टषष्टिस्तथा राजन्क्षेत्राणामस्ति भूतले ॥
येषां सांनिध्यमभ्येति सर्वदैव महेश्वरः
tathā sarve surāstuṣṭā brahmaviṣṇu śivādayaḥ ||
paraṃ siddhipradaṃ śīghraṃ mānuṣāṇāṃ mahīpate
||17||तथा सर्वे सुरास्तुष्टा ब्रह्मविष्णु शिवादयः ॥
परं सिद्धिप्रदं शीघ्रं मानुषाणां महीपते
hāṭakeśvaradevasya kṣetraṃ pātakanāśanam ||
devānāmapi sarveṣāṃ tuṣṭiṃ gacchati caṃḍikā
||18||हाटकेश्वरदेवस्य क्षेत्रं पातकनाशनम् ॥
देवानामपि सर्वेषां तुष्टिं गच्छति चंडिका
śīghramārādhitā samyakchraddhāyuktairnarairbhuvi ||
tasmāttatkṣetramāsādya tāṃ devīṃ śraddhayānvitaḥ ||
ārādhaya mahābhāga drutaṃ siddhimavāpsyasi
||19||शीघ्रमाराधिता सम्यक्छ्रद्धायुक्तैर्नरैर्भुवि ॥
तस्मात्तत्क्षेत्रमासाद्य तां देवीं श्रद्धयान्वितः ॥
आराधय महाभाग द्रुतं सिद्धिमवाप्स्यसि
evamuktaḥ sa tenātha gatvā tatkṣetramuttamam ||
pratiṣṭhāpya ca devīṃ tāṃ pūjayāmāsa bhaktitaḥ
||20||एवमुक्तः स तेनाथ गत्वा तत्क्षेत्रमुत्तमम् ॥
प्रतिष्ठाप्य च देवीं तां पूजयामास भक्तितः
brahmacaryaparo bhūtvā śucirvrataparāyaṇaḥ ||
niyato niyatāhārastrikālaṃ snānamācaran
||21||ब्रह्मचर्यपरो भूत्वा शुचिर्व्रतपरायणः ॥
नियतो नियताहारस्त्रिकालं स्नानमाचरन्
evamārādhyatastatra gandhapuṣpānulepanaiḥ ||
pūjāparasya sā devī tasya tuṣṭiṃ tato gatā
||22||एवमाराध्यतस्तत्र गन्धपुष्पानुलेपनैः ॥
पूजापरस्य सा देवी तस्य तुष्टिं ततो गता
devyuvāca
parituṣṭāsmi te vatsa vratenānena nityathaḥ ||
balipūjāvidhānena vihitenāmunā svayam
||23||परितुष्टास्मि ते वत्स व्रतेनानेन नित्यथः ॥
बलिपूजाविधानेन विहितेनामुना स्वयम्
tadbrūhi yena te sarvaṃ prakaromi hṛdi sthitam ||
sadya eva mahīpāla tridaśairapi durlabham
||24||तद्ब्रूहि येन ते सर्वं प्रकरोमि हृदि स्थितम् ॥
सद्य एव महीपाल त्रिदशैरपि दुर्लभम्
rājovāca
lokānāṃ hitakāmena mayaitadvratamāhṛtam ||
yena teṣāṃ bhavetsaukhyaṃ matprasādādanuttamam
||25||लोकानां हितकामेन मयैतद्व्रतमाहृतम् ॥
येन तेषां भवेत्सौख्यं मत्प्रसादादनुत्तमम्
tasmāddehi mahābhāge jñānayuktāni bhūriśaḥ ||
mamāstrāṇi vicitrāṇi svairagāṇi samantataḥ
||26||तस्माद्देहि महाभागे ज्ञानयुक्तानि भूरिशः ॥
ममास्त्राणि विचित्राणि स्वैरगाणि समन्ततः
yāni jānaṃti bhūpṛṣṭhe mama pārśve sthitānyapi ||
aparādhaṃ sadā loke paradārādi yatkṛtam 27 ||
anurūpaṃ tatastasya pātakasya vinigraham ||
prakurvaṃti mitho yena na teṣāṃ saṃkaro bhavet
||28||यानि जानंति भूपृष्ठे मम पार्श्वे स्थितान्यपि ॥
अपराधं सदा लोके परदारादि यत्कृतम् २७ ॥
अनुरूपं ततस्तस्य पातकस्य विनिग्रहम् ॥
प्रकुर्वंति मिथो येन न तेषां संकरो भवेत्
maṃtragrāmaṃ tathā devi mama dehi pṛthagvidham ||
nigrahaṃ vyādhisattvānāṃ yena śīghraṃ karomyaham
||29||मंत्रग्रामं तथा देवि मम देहि पृथग्विधम् ॥
निग्रहं व्याधिसत्त्वानां येन शीघ्रं करोम्यहम्
yena syurmanujāḥ sarve mama rājye sukhānvitāḥ ||
nīrogāḥ puṣṭisaṃpannā bhayaśokavivarjitāḥ
||30||येन स्युर्मनुजाः सर्वे मम राज्ये सुखान्विताः ॥
नीरोगाः पुष्टिसंपन्ना भयशोकविवर्जिताः
nāhaṃ devi kariṣyāmi hastyaśvarathasaṃgraham ||
yatasteṣāṃ bhavetpuṣṭirvittairvittaṃ karairbhavet ||
gṛhītaiḥ sarvalokānāṃ tasmāttanna mamepsitam
||31||नाहं देवि करिष्यामि हस्त्यश्वरथसंग्रहम् ॥
यतस्तेषां भवेत्पुष्टिर्वित्तैर्वित्तं करैर्भवेत् ॥
गृहीतैः सर्वलोकानां तस्मात्तन्न ममेप्सितम्
śrīdevyuvāca
atyadbhutataraṃ karma tvayaitatpṛthivīpate ||
prārabdhaṃ yanna kenāpi kṛtaṃ na ca kariṣyati
||32||अत्यद्भुततरं कर्म त्वयैतत्पृथिवीपते ॥
प्रारब्धं यन्न केनापि कृतं न च करिष्यति
tathāpyevaṃ kariṣyāmi tava dāsyāmi kṛtsnaśaḥ ||
jñānayuktāni śastrāṇi maṃtragrāmaṃ ca tādṛśam
||33||तथाप्येवं करिष्यामि तव दास्यामि कृत्स्नशः ॥
ज्ञानयुक्तानि शस्त्राणि मंत्रग्रामं च तादृशम्
gṛhyante yena te sarve vyādhayo'pi sudāruṇāḥ ||
paraṃ sadaiva te rakṣyā manmantrairapi saṃyutāḥ
||34||गृह्यन्ते येन ते सर्वे व्याधयोऽपि सुदारुणाः ॥
परं सदैव ते रक्ष्या मन्मन्त्रैरपि संयुताः
yadi dṛṣṭipathāttubhyaṃ kvacidyāsyaṃti dūrataḥ ||
mānavānpīḍayiṣyaṃti cirātprāpyādhikaṃ tataḥ
||35||यदि दृष्टिपथात्तुभ्यं क्वचिद्यास्यंति दूरतः ॥
मानवान्पीडयिष्यंति चिरात्प्राप्याधिकं ततः
yadā tvaṃ pṛthivīpāla svargaṃ yāsyasi bhūtalāt ||
tadātra salile sthāpyā madagre(*) yadvyavasthitam
||36||यदा त्वं पृथिवीपाल स्वर्गं यास्यसि भूतलात् ॥
तदात्र सलिले स्थाप्या मदग्रे(*) यद्व्यवस्थितम्
sarve maṃtrāstathā'strāṇi mamavākyādasaṃśayam ||
yena syātpūrvavatsarvo vyavahāro nṛpodbhavaḥ
||37||सर्वे मंत्रास्तथाऽस्त्राणि ममवाक्यादसंशयम् ॥
येन स्यात्पूर्ववत्सर्वो व्यवहारो नृपोद्भवः
sūta uvāca
bāḍhamityeva tenokte tatkṣaṇāddvijasattamāḥ ||
prādurbhūtāni divyāni tasyāstrāṇi bahūni ca
||38||बाढमित्येव तेनोक्ते तत्क्षणाद्द्विजसत्तमाः ॥
प्रादुर्भूतानि दिव्यानि तस्यास्त्राणि बहूनि च
jñānasaṃpatprayuktāni yādṛśāni mahātmanā ||
tena saṃyācitānyeva vyādhimaṃtrāstathaiva ca
||39||ज्ञानसंपत्प्रयुक्तानि यादृशानि महात्मना ॥
तेन संयाचितान्येव व्याधिमंत्रास्तथैव च
vyādhayo yaiśca gṛhyaṃte mucyaṃte svecchayā sadā ||
sukhena paripālyaṃte dṛṣṭigocarasaṃsthitāḥ
||40||व्याधयो यैश्च गृह्यंते मुच्यंते स्वेच्छया सदा ॥
सुखेन परिपाल्यंते दृष्टिगोचरसंस्थिताः
tatastaṃ sakalaṃ prāpya prasādaṃ caṃḍikodbhavam ||
tacca hastyādikaṃ sarvaṃ brāhmaṇebhyo dadau nṛpa
||41||ततस्तं सकलं प्राप्य प्रसादं चंडिकोद्भवम् ॥
तच्च हस्त्यादिकं सर्वं ब्राह्मणेभ्यो ददौ नृप
ekāṃ muktvā nijāṃ bhāryāmekaṃ daśarathaṃ sutam ||
tāṃścāpi sakalānvyādhīnmaṃtraiḥ saṃyamya yatnataḥ
||42||एकां मुक्त्वा निजां भार्यामेकं दशरथं सुतम् ॥
तांश्चापि सकलान्व्याधीन्मंत्रैः संयम्य यत्नतः
ajārūpānsvayaṃ paścādyaṣṭimādāya rakṣati ||
evaṃ tasya narendrasya vartamānasya bhūtale
||43||अजारूपान्स्वयं पश्चाद्यष्टिमादाय रक्षति ॥
एवं तस्य नरेन्द्रस्य वर्तमानस्य भूतले
gupto'pi nāparādhaḥ syātkasyacitprakaṭaḥ kutaḥ ||
pramādādyadi bhūloke kaścitpāpaṃ samācaret
||44||गुप्तोऽपि नापराधः स्यात्कस्यचित्प्रकटः कुतः ॥
प्रमादाद्यदि भूलोके कश्चित्पापं समाचरेत्
tadrūpo nigrahastasya tatkṣaṇādeva jāyate ||
vadhaṃ vā yadi vā baṃdhaṃ kleśaṃ cā'rātisaṃbhavam
||45||तद्रूपो निग्रहस्तस्य तत्क्षणादेव जायते ॥
वधं वा यदि वा बंधं क्लेशं चाऽरातिसंभवम्
adṛṣṭānyapi śastrāṇi tāni kurvaṃti tatkṣaṇāt ||
anyeṣāṃ ca mahīpānāṃ rājye guptānyanekaśaḥ ||
kurvanti manujāsteṣāṃ cakre vaivasvato graham
||46||अदृष्टान्यपि शस्त्राणि तानि कुर्वंति तत्क्षणात् ॥
अन्येषां च महीपानां राज्ये गुप्तान्यनेकशः ॥
कुर्वन्ति मनुजास्तेषां चक्रे वैवस्वतो ग्रहम्
na tatra bhayasaṃtrastastataḥ pāpasamācaret ||
pratyakṣaṃ vā viśeṣeṇa jñātvā śastrabhayaṃ ca tat
||47||न तत्र भयसंत्रस्तस्ततः पापसमाचरेत् ॥
प्रत्यक्षं वा विशेषेण ज्ञात्वा शस्त्रभयं च तत्
tataste pāpanirmuktā lokāḥ saṃśuddhagātrakāḥ ||
rogeṣu nigṛhīteṣu prāptāḥ sukhamanuttamam
||48||ततस्ते पापनिर्मुक्ता लोकाः संशुद्धगात्रकाः ॥
रोगेषु निगृहीतेषु प्राप्ताः सुखमनुत्तमम्
evaṃ sthiteṣu lokeṣu gatapāpāmayeṣu ca ||
prayātāḥ śūnyatāṃ sarve narakā ye yamālaye
||49||एवं स्थितेषु लोकेषु गतपापामयेषु च ॥
प्रयाताः शून्यतां सर्वे नरका ये यमालये
na kaścinnarakaṃ yāti na ca mṛtyupathaṃ naraḥ ||
yathā kṛtayugaṃ tādṛktretāyāmapi saṃsthitam
||50||न कश्चिन्नरकं याति न च मृत्युपथं नरः ॥
यथा कृतयुगं तादृक्त्रेतायामपि संस्थितम्
vyavahāre tato naṣṭe yamalokasamudbhave ||
svargeṇa tulyatāṃ prāpte prāṇibhirmṛtyuvarjitaiḥ
||51||व्यवहारे ततो नष्टे यमलोकसमुद्भवे ॥
स्वर्गेण तुल्यतां प्राप्ते प्राणिभिर्मृत्युवर्जितैः
tato vaivasvato gatvā brahmaṇaḥ sadanaṃ prati ||
provāca duḥkhasaṃpannaḥ praṇipatya pitāmaham
||52||ततो वैवस्वतो गत्वा ब्रह्मणः सदनं प्रति ॥
प्रोवाच दुःखसंपन्नः प्रणिपत्य पितामहम्
ahaṃ purā tvayā deva dharmādharmadidṛkṣayā ||
mānuṣāṇāṃ samādiṣṭo nigrahānugrahaṃ prati
||33||अहं पुरा त्वया देव धर्माधर्मदिदृक्षया ॥
मानुषाणां समादिष्टो निग्रहानुग्रहं प्रति
ajāpālena bhūpena tatsarvaṃ viphalīkṛtam ||
tapaḥśaktyā suraśreṣṭha devīmārādhya caṃḍikām
||54||अजापालेन भूपेन तत्सर्वं विफलीकृतम् ॥
तपःशक्त्या सुरश्रेष्ठ देवीमाराध्य चंडिकाम्
nādhayo vyādhayastatra na pāpāni mahītale ||
kasyaciddeva jāyaṃte yathā kṛtayuge tathā
||55||नाधयो व्याधयस्तत्र न पापानि महीतले ॥
कस्यचिद्देव जायंते यथा कृतयुगे तथा
tasmātkuru suraśreṣṭha punareva yathā purā ||
madīyabhavane kṛtsno vyavahāraḥ prajāyate
||56||तस्मात्कुरु सुरश्रेष्ठ पुनरेव यथा पुरा ॥
मदीयभवने कृत्स्नो व्यवहारः प्रजायते
tasya tadvacanaṃ śrutvā brahmā lokapitāmahaḥ ||
samīpa upaviṣṭasya śivasyā''syaṃ vyalokayat
||97||तस्य तद्वचनं श्रुत्वा ब्रह्मा लोकपितामहः ॥
समीप उपविष्टस्य शिवस्याऽऽस्यं व्यलोकयत्
athābravītprahasyoccaistrinetraścaturānanam ||
atyadbhutatamāṃ śrutvā tāṃ vārtāṃ yamasaṃbhavām
||58||अथाब्रवीत्प्रहस्योच्चैस्त्रिनेत्रश्चतुराननम् ॥
अत्यद्भुततमां श्रुत्वा तां वार्तां यमसंभवाम्
maheśvara uvāca
dharmamārgapravṛttasya sadācārasya bhūpateḥ ||
kathaṃ nivāraṇaṃ tatra kriyate kaśca nigrahaḥ
||59||धर्ममार्गप्रवृत्तस्य सदाचारस्य भूपतेः ॥
कथं निवारणं तत्र क्रियते कश्च निग्रहः
tasmāttena mahīpena yasmānmārgaḥ pradarśitaḥ ||
apūrvo dharmasaṃbhūtaḥ kṛtaḥ samyaṅmahātmanā
||60||तस्मात्तेन महीपेन यस्मान्मार्गः प्रदर्शितः ॥
अपूर्वो धर्मसंभूतः कृतः सम्यङ्महात्मना
tanmayāpi yathā cāsya prasādaḥ surasattama ||
apūrvaḥ karaṇīyaśca yathā dharmo na duṣyati
||61||तन्मयापि यथा चास्य प्रसादः सुरसत्तम ॥
अपूर्वः करणीयश्च यथा धर्मो न दुष्यति
evamuktvā caturvaktraṃ yamaṃ prāha tataḥ śivaḥ ||
vadāyuṣo'sya yaccheṣamajāpālasya bhūpateḥ ||
yena tatsamaye prāpte taṃ nayāmi nijālayam
||62||एवमुक्त्वा चतुर्वक्त्रं यमं प्राह ततः शिवः ॥
वदायुषोऽस्य यच्छेषमजापालस्य भूपतेः ॥
येन तत्समये प्राप्ते तं नयामि निजालयम्
yama uvāca
pañcavarṣasahasrāṇi tasyātītāni cāyuṣaḥ ||
tiṣṭhaṃti pañcapañcāśatpratīkṣye'haṃ tataḥ katham
||63||पञ्चवर्षसहस्राणि तस्यातीतानि चायुषः ॥
तिष्ठंति पञ्चपञ्चाशत्प्रतीक्ष्येऽहं ततः कथम्
yāvatkālaṃ suraśreṣṭha śūnye jāte sva āśraye ||
tasmātkuru drutaṃ kaṃcidupāyaṃ tadvināśane
||64||यावत्कालं सुरश्रेष्ठ शून्ये जाते स्व आश्रये ॥
तस्मात्कुरु द्रुतं कंचिदुपायं तद्विनाशने
evamukte yamenātha taṃ visṛjya gṛhaṃ prati ||
vyāghrarūpaṃ samāsthāya svayaṃ tatsaṃnidhau yayau
||65||एवमुक्ते यमेनाथ तं विसृज्य गृहं प्रति ॥
व्याघ्ररूपं समास्थाय स्वयं तत्संनिधौ ययौ
yatra saṃstho mahīpaḥ sa prajāpālanatatparaḥ ||
meghagambhīranirghoṣaṃ garjamāno muhurmuhuḥ
||66||यत्र संस्थो महीपः स प्रजापालनतत्परः ॥
मेघगम्भीरनिर्घोषं गर्जमानो मुहुर्मुहुः
ajāstāstaṃ ca saṃvīkṣya vyāghraṃ raudravapurddharam ||
ajāpālaṃ samuddiśya saṃtrastāḥ śaraṇaṃ gatāḥ
||67||अजास्तास्तं च संवीक्ष्य व्याघ्रं रौद्रवपुर्द्धरम् ॥
अजापालं समुद्दिश्य संत्रस्ताः शरणं गताः
tasya yatnaparasyāpi rakṣamāṇasya bhūpateḥ ||
ajāstā vyāghrarūpeṇa śaṃkareṇa prabhakṣitāḥ
||68||तस्य यत्नपरस्यापि रक्षमाणस्य भूपतेः ॥
अजास्ता व्याघ्ररूपेण शंकरेण प्रभक्षिताः
ajānāṃ kadanaṃ dṛṣṭvā tataḥ sa pṛthivīpatiḥ ||
svahastādyaṣṭimutsṛjya jagrāha niśitāyudham
||69||अजानां कदनं दृष्ट्वा ततः स पृथिवीपतिः ॥
स्वहस्ताद्यष्टिमुत्सृज्य जग्राह निशितायुधम्
yattasya tuṣṭayā dattaṃ caṃḍaṃ caṃḍārciṣā samam ||
tacchastraṃ ca tathānyāni devīdattāni śaṃkaraḥ ||
śanaiḥśanaiḥ prajagrāha svavaktreṇa maheśvaraḥ
||70||यत्तस्य तुष्टया दत्तं चंडं चंडार्चिषा समम् ॥
तच्छस्त्रं च तथान्यानि देवीदत्तानि शंकरः ॥
शनैःशनैः प्रजग्राह स्ववक्त्रेण महेश्वरः
astrābhāvāttatastūrṇaṃ dhriyamāṇe'pi kāṃtayā ||
dvaṃdvayuddhena taṃ vyāghraṃ yodhayāmāsa bhūpatiḥ
||71||अस्त्राभावात्ततस्तूर्णं ध्रियमाणेऽपि कांतया ॥
द्वंद्वयुद्धेन तं व्याघ्रं योधयामास भूपतिः
tatastasyāṃgasaṃsparśānmuktvā vyāghratanuṃ ca tām ||
dadhāra bhasmasaṃdigdhāṃ tanuṃ candravibhūṣitām
||72||ततस्तस्यांगसंस्पर्शान्मुक्त्वा व्याघ्रतनुं च ताम् ॥
दधार भस्मसंदिग्धां तनुं चन्द्रविभूषिताम्
ruṃḍamālāvarāṃ divyāṃ sakhaṭvāṃgāṃ sapannagām ||
tāṃ dṛṣṭvā sa mahīpālaḥ sabhāryaḥ praṇatastataḥ
||73||रुंडमालावरां दिव्यां सखट्वांगां सपन्नगाम् ॥
तां दृष्ट्वा स महीपालः सभार्यः प्रणतस्ततः
provācātha stutiṃ kṛtvā vinayāvanataḥ sthitaḥ ||
ānaṃdāśrupariklinno harṣagadgadayā girā
||74||प्रोवाचाथ स्तुतिं कृत्वा विनयावनतः स्थितः ॥
आनंदाश्रुपरिक्लिन्नो हर्षगद्गदया गिरा
rājovāca
ajñānādyanmayā deva prahārāstava nirmitāḥ ||
tiraskārastathā dattastatsarvaṃ kṣamyatāṃ vibho
||75||अज्ञानाद्यन्मया देव प्रहारास्तव निर्मिताः ॥
तिरस्कारस्तथा दत्तस्तत्सर्वं क्षम्यतां विभो
śrībhagavānuvāca
kṣāṃta eṣa mayā putra tava sarvaḥ parābhavaḥ ||
parituṣṭena te karma dṛṣṭvā caivātimānuṣam
||76||क्षांत एष मया पुत्र तव सर्वः पराभवः ॥
परितुष्टेन ते कर्म दृष्ट्वा चैवातिमानुषम्
yathā kṛtaṃ tvayā rājyaṃ prajāḥ saṃrakṣitā nṛpa ||
tathānyo bhūpatiḥ kaścinna kartā na kariṣyati
||77||यथा कृतं त्वया राज्यं प्रजाः संरक्षिता नृप ॥
तथान्यो भूपतिः कश्चिन्न कर्ता न करिष्यति
tasmādgaccha mayā sārdhaṃ pātāle pārthivottama ||
anenaiva śarīreṇa dharmapatnyānayā saha
||78||तस्माद्गच्छ मया सार्धं पाताले पार्थिवोत्तम ॥
अनेनैव शरीरेण धर्मपत्न्यानया सह
nātaḥ paraṃ tvayā stheyaṃ martyaloke kathaṃcana ||
viruddhaṃ sarvadevānāṃ yataḥ karma tvadudbhavam
||79||नातः परं त्वया स्थेयं मर्त्यलोके कथंचन ॥
विरुद्धं सर्वदेवानां यतः कर्म त्वदुद्भवम्
rājovāca
evaṃ deva kariṣyāmi gatvā'yodhyāṃ mahāpurīm ||
putraṃ rājye pratiṣṭhāpya maṃtriṇāṃ saṃnivedya ca
||80||एवं देव करिष्यामि गत्वाऽयोध्यां महापुरीम् ॥
पुत्रं राज्ये प्रतिष्ठाप्य मंत्रिणां संनिवेद्य च
tathāhaṃ deva devyā ca proktaḥ saṃtuṣṭayā purā ||
mantragrāmo yayā dattaḥ śastrāṇi vividhāni ca
||81||तथाहं देव देव्या च प्रोक्तः संतुष्टया पुरा ॥
मन्त्रग्रामो यया दत्तः शस्त्राणि विविधानि च
yadā tvaṃ tyajasi prājña martyalokaṃ sudustyajam ||
tadātra māmake kuṇḍe prakṣeptavyāni kṛtsnaśaḥ
||82||यदा त्वं त्यजसि प्राज्ञ मर्त्यलोकं सुदुस्त्यजम् ॥
तदात्र मामके कुण्डे प्रक्षेप्तव्यानि कृत्स्नशः
tāni cārpaya me bhūyo yenānṛṇyaṃ vrajāmyaham ||
tasyā devyāḥ surādhīśa tvatprasādena sāṃpratam
||83||तानि चार्पय मे भूयो येनानृण्यं व्रजाम्यहम् ॥
तस्या देव्याः सुराधीश त्वत्प्रसादेन सांप्रतम्
evamuktastatastena bhagavāṃstripurāṃtakaḥ ||
ājñāpya tāni sarvāṇi dadau tatra drutaṃ gataḥ
||84||एवमुक्तस्ततस्तेन भगवांस्त्रिपुरांतकः ॥
आज्ञाप्य तानि सर्वाणि ददौ तत्र द्रुतं गतः
abravīcca sutastatra svayaṃ rājā bhaviṣyati ||
vīryaudāryasamopeto vaṃśasyoddharaṇakṣamaḥ
||85||अब्रवीच्च सुतस्तत्र स्वयं राजा भविष्यति ॥
वीर्यौदार्यसमोपेतो वंशस्योद्धरणक्षमः
tvaṃ cāgaccha mayā sārdhamadyaiva mama maṃdire ||
praviśyātra jale puṇye devīkuṇḍasamudbhave
||86||त्वं चागच्छ मया सार्धमद्यैव मम मंदिरे ॥
प्रविश्यात्र जले पुण्ये देवीकुण्डसमुद्भवे
adya māghacaturdaśyāṃ śuklāyāmaparo'pi yaḥ ||
devīmimāṃ ca saṃpūjya jale'sminbhaktisaṃyutaḥ
||87||अद्य माघचतुर्दश्यां शुक्लायामपरोऽपि यः ॥
देवीमिमां च संपूज्य जलेऽस्मिन्भक्तिसंयुतः
kariṣyati praveśena prāṇatyāgaṃ nṛpottama ||
sa ca yāsyati yatrāste pātāle hāṭakeśvaraḥ
||88||करिष्यति प्रवेशेन प्राणत्यागं नृपोत्तम ॥
स च यास्यति यत्रास्ते पाताले हाटकेश्वरः
snānaṃ vā pārthivaśreṣṭha yaḥ kariṣyati mānavaḥ ||
aṣṭottaraśataṃ tasya vyādhīnāṃ na bhaviṣyati
||89||स्नानं वा पार्थिवश्रेष्ठ यः करिष्यति मानवः ॥
अष्टोत्तरशतं तस्य व्याधीनां न भविष्यति
evamuktvā tamādāya nṛpaṃ bhāryāsamanvitam ||
ajābhistābhirastraiśca taiścāpi parameśvaraḥ ||
praviveśa jale tasmindevīkuṇḍasamudbhave
||90||एवमुक्त्वा तमादाय नृपं भार्यासमन्वितम् ॥
अजाभिस्ताभिरस्त्रैश्च तैश्चापि परमेश्वरः ॥
प्रविवेश जले तस्मिन्देवीकुण्डसमुद्भवे
tataśca maṃdiraṃ nītaḥ svakīyaṃ dvijasattamāḥ ||
tenaiva naradehena sa kalatrasamanvitaḥ ||
91 adyāpi tiṣṭhate tatra jarāmaraṇavarjitaḥ ||
pūjayānaśca taṃ devaṃ pātāle hāṭakeśvaram
||92||ततश्च मंदिरं नीतः स्वकीयं द्विजसत्तमाः ॥
तेनैव नरदेहेन स कलत्रसमन्वितः ॥
९१ अद्यापि तिष्ठते तत्र जरामरणवर्जितः ॥
पूजयानश्च तं देवं पाताले हाटकेश्वरम्
evaṃ tatra samudbhūtā sā devī parameśvarī ||
sthāpitā tena bhūpena śraddhāpūtena cetasā
||93||एवं तत्र समुद्भूता सा देवी परमेश्वरी ॥
स्थापिता तेन भूपेन श्रद्धापूतेन चेतसा
iti śrīskānde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe śrīhāṭakeśvarakṣetramāhātmye'jāpāleśvarīmāhātmyavarṇanaṃnāma pañcanavatitamo'dhyāyaḥ || 95 ||