vasorddhārāmāhātmyavarṇanam
ṛṣaya ūcuḥ
agnitīrthaṃ tvayā proktaṃ brahmatīrthaṃ ca yatpurā ||
na tayoḥ kathitotpattirmāhātmyaṃ ca mahāmate
||1||अग्नितीर्थं त्वया प्रोक्तं ब्रह्मतीर्थं च यत्पुरा ॥
न तयोः कथितोत्पत्तिर्माहात्म्यं च महामते
tasmādvistarato brūhi ekaikasya pṛthakpṛthak ||
na vayaṃ tṛptimāpannāḥ śṛṇvataste vaco'mṛtam
||2||तस्माद्विस्तरतो ब्रूहि एकैकस्य पृथक्पृथक् ॥
न वयं तृप्तिमापन्नाः शृण्वतस्ते वचोऽमृतम्
sūta uvāca
atra vaḥ kīrtayiṣyāmi kathāṃ pātakanāśinīm ||
agnitīrthasamudbhūtāṃ sarvasaukhyāvahāṃ śubhām
||3||अत्र वः कीर्तयिष्यामि कथां पातकनाशिनीम् ॥
अग्नितीर्थसमुद्भूतां सर्वसौख्यावहां शुभाम्
somavaṃśasamudbhūtaḥ pratīpo nāma bhūpatiḥ ||
purāsīcchauryasaṃpanno brahmajñānavicakṣaṇaḥ
||4||सोमवंशसमुद्भूतः प्रतीपो नाम भूपतिः ॥
पुरासीच्छौर्यसंपन्नो ब्रह्मज्ञानविचक्षणः
tasya putradvayaṃ jajñe sarvalakṣaṇalakṣitam ||
devāpiḥ prathamastatra dvitīyaḥ śaṃtanurdvijāḥ
||5||तस्य पुत्रद्वयं जज्ञे सर्वलक्षणलक्षितम् ॥
देवापिः प्रथमस्तत्र द्वितीयः शंतनुर्द्विजाः
atho śivapadaṃ prāpte pratīpe nṛpasattame ||
tapo'rthaṃ rājyamutsṛjya devāpirniyaryau vanam
||6||अथो शिवपदं प्राप्ते प्रतीपे नृपसत्तमे ॥
तपोऽर्थं राज्यमुत्सृज्य देवापिर्नियर्यौ वनम्
tataśca maṃtribhiḥ sarvaiḥ śaṃtanustasya cānujaḥ ||
pitṛpaitāmahe rājye satvaraṃ sanniyojitaḥ
||7||ततश्च मंत्रिभिः सर्वैः शंतनुस्तस्य चानुजः ॥
पितृपैतामहे राज्ये सत्वरं सन्नियोजितः
etasminnaṃtare śakro na vavarṣa kruddhā'nvitaḥ ||
yāvaddvādaśavarṣāṇi tasmi nrājyaṃ praśāsati
||8||एतस्मिन्नंतरे शक्रो न ववर्ष क्रुद्धाऽन्वितः ॥
यावद्द्वादशवर्षाणि तस्मि न्राज्यं प्रशासति
ataḥ kṛcchraṃ gataḥ sarvo lokaḥ kṣutparipīḍitaḥ ||
cāmuṃḍāsadṛśo jāto yo na mṛtyuvaśaṃgataḥ
||9||अतः कृच्छ्रं गतः सर्वो लोकः क्षुत्परिपीडितः ॥
चामुंडासदृशो जातो यो न मृत्युवशंगतः
saṃtyaktāḥ patibhirnāryaḥ putrāśca pitṛbhirnijaiḥ ||
mātaraśca tathā putrairlokeṣvanyeṣu kā kathā
||10||संत्यक्ताः पतिभिर्नार्यः पुत्राश्च पितृभिर्निजैः ॥
मातरश्च तथा पुत्रैर्लोकेष्वन्येषु का कथा
daivayogātkvacitkiṃcitkasyacidyadi dṛśyate ||
sasyaṃ siddhamasiddhaṃ vā hriyate vīryataḥ paraiḥ
||11||दैवयोगात्क्वचित्किंचित्कस्यचिद्यदि दृश्यते ॥
सस्यं सिद्धमसिद्धं वा ह्रियते वीर्यतः परैः
śuṣkā mahīruhāḥ sarve tathā ye ca jalāśayāḥ ||
nadyaśca svalpatoyāśca gaṃgādyā api saṃsthitāḥ
||12||शुष्का महीरुहाः सर्वे तथा ये च जलाशयाः ॥
नद्यश्च स्वल्पतोयाश्च गंगाद्या अपि संस्थिताः
evaṃ vṛṣṭeḥ kṣaye jāte naṣṭe dharmapathe tathā ||
loke'sminnasthisaṃghātaiḥ pūrite bhasmanā vṛte
||13||एवं वृष्टेः क्षये जाते नष्टे धर्मपथे तथा ॥
लोकेऽस्मिन्नस्थिसंघातैः पूरिते भस्मना वृते
na kaścidyajanaṃ cakre na svādhyāyaṃ na ca vratam ||
evamālokyate vyoma vṛṣṭyarthaṃ kṣutsamākulaiḥ
||14||न कश्चिद्यजनं चक्रे न स्वाध्यायं न च व्रतम् ॥
एवमालोक्यते व्योम वृष्ट्यर्थं क्षुत्समाकुलैः
etasminneva kāle tu viśvāmitro mahāmuniḥ ||
carmāsthiśeṣasarvāṃgo bubhukṣārta itastataḥ
||15||एतस्मिन्नेव काले तु विश्वामित्रो महामुनिः ॥
चर्मास्थिशेषसर्वांगो बुभुक्षार्त इतस्ततः
paribhramaṃstataḥ prāpya kaṃcidgrāmaṃ nirudvasam ||
mṛtamartyodbhavaivyāptamasthisaṃghaiḥ samaṃtataḥ
||16||परिभ्रमंस्ततः प्राप्य कंचिद्ग्रामं निरुद्वसम् ॥
मृतमर्त्योद्भवैव्याप्तमस्थिसंघैः समंततः
atha tatra bhramanprāptaścaṃḍālasya niveśanam ||
śūnye go'sthisamākīrṇe durgaṃdhena samāvṛte
||17||अथ तत्र भ्रमन्प्राप्तश्चंडालस्य निवेशनम् ॥
शून्ये गोऽस्थिसमाकीर्णे दुर्गंधेन समावृते
athāpaśyanmṛtaṃ tatra sārameyaṃ ciroṣitam ||
saṃśuṣkaṃ gandhanirmuktaṃ gṛhaprāṃte vyavasthitam
||19||अथापश्यन्मृतं तत्र सारमेयं चिरोषितम् ॥
संशुष्कं गन्धनिर्मुक्तं गृहप्रांते व्यवस्थितम्
samādāya tatastaṃ ca āpaddharmaparāyaṇaḥ ||
prakṣālya salile paścātpracakarta tadā muniḥ
||19||समादाय ततस्तं च आपद्धर्मपरायणः ॥
प्रक्षाल्य सलिले पश्चात्प्रचकर्त तदा मुनिः
tataśca śrapayāmāsa susamiddhe hutāśane ||
kṣutkṣāmo bhojanārthāya tataḥ pākāgrameva ca
||20||ततश्च श्रपयामास सुसमिद्धे हुताशने ॥
क्षुत्क्षामो भोजनार्थाय ततः पाकाग्रमेव च
samādāya pitṝṃstarpya yāvadagnau juhoti saḥ ||
tāvadvahniḥ parityajya samastamapi bhūtalam
||21||समादाय पितॄंस्तर्प्य यावदग्नौ जुहोति सः ॥
तावद्वह्निः परित्यज्य समस्तमपि भूतलम्
gataścādarśanaṃ sadyaḥ sarveṣāṃ kṣitivāsinām ||
citte kopaṃ samādhāya śakrasyopari bhūriśaḥ
||22||गतश्चादर्शनं सद्यः सर्वेषां क्षितिवासिनाम् ॥
चित्ते कोपं समाधाय शक्रस्योपरि भूरिशः
etasminnaṃtare vahnau martyalokādvinirgate ||
viśeṣātpīḍitā lokā ye'vaśiṣṭā dharātale
||23||एतस्मिन्नंतरे वह्नौ मर्त्यलोकाद्विनिर्गते ॥
विशेषात्पीडिता लोका येऽवशिष्टा धरातले
etasminnaṃtare devā brahmaviṣṇupuraḥ sarāḥ ||
vahneranveṣaṇārthāya vabhramurdharaṇītale
||24||एतस्मिन्नंतरे देवा ब्रह्मविष्णुपुरः सराः ॥
वह्नेरन्वेषणार्थाय वभ्रमुर्धरणीतले
atha tairbhramamāṇaiśca pradṛṣṭo'bhūdgajo mahān ||
niśvasanpatito bhūmau vahnitāpaprapīḍitaḥ
||25||अथ तैर्भ्रममाणैश्च प्रदृष्टोऽभूद्गजो महान् ॥
निश्वसन्पतितो भूमौ वह्नितापप्रपीडितः
atha devā gajaṃ dṛṣṭvā papracchustvarayā'nvitāḥ ||
kaccittvayā sa dṛṣṭo'tra kānane pāvako gaja
||26||अथ देवा गजं दृष्ट्वा पप्रच्छुस्त्वरयाऽन्विताः ॥
कच्चित्त्वया स दृष्टोऽत्र कानने पावको गज
gaja uvāca
vaṃśastaṃbe'tra saṃkīrṇe saṃpraviṣṭo hutāśanaḥ ||
sāṃprataṃ tena nirdagdhaḥ kṛcchrādatrāhamāgataḥ
||27||वंशस्तंबेऽत्र संकीर्णे संप्रविष्टो हुताशनः ॥
सांप्रतं तेन निर्दग्धः कृच्छ्रादत्राहमागतः
atha tairveṣṭitastasminvaṃśastaṃbe hutāśanaḥ ||
devairdattvā gajeṃdrasya śāpaṃ paścādvinirgataḥ
||28||अथ तैर्वेष्टितस्तस्मिन्वंशस्तंबे हुताशनः ॥
देवैर्दत्त्वा गजेंद्रस्य शापं पश्चाद्विनिर्गतः
yasmāttvayāhamādiṣṭo devānāṃ vāraṇādhama ||
tasmāttava mukhe jihvā viparītā bhaviṣyati
||29||यस्मात्त्वयाहमादिष्टो देवानां वारणाधम ॥
तस्मात्तव मुखे जिह्वा विपरीता भविष्यति
evaṃ śaptvā gajaṃ śīghraṃ naṣṭo vaiśvānaraḥ punaḥ ||
devāścāpi tathā pṛṣṭhe saṃlagnāstaddidṛkṣayā
||30||एवं शप्त्वा गजं शीघ्रं नष्टो वैश्वानरः पुनः ॥
देवाश्चापि तथा पृष्ठे संलग्नास्तद्दिदृक्षया
atha dṛṣṭaḥ śukastaiśca bhramamāṇairmahāvane ||
bhobhoḥ śuka tvayā vahniryadi dṛṣṭo nivedyatām
||31||अथ दृष्टः शुकस्तैश्च भ्रममाणैर्महावने ॥
भोभोः शुक त्वया वह्निर्यदि दृष्टो निवेद्यताम्
śuka uvāca
yo'yaṃ saṃdṛśyate dūrācchamīgarbhe ca pippalaḥ ||
etasmiṃstiṣṭhate vahniraśvatthe surasattamāḥ
||32||योऽयं संदृश्यते दूराच्छमीगर्भे च पिप्पलः ॥
एतस्मिंस्तिष्ठते वह्निरश्वत्थे सुरसत्तमाः
atrastho yaḥ kulāyo ma āsīcchiśusamanvitaḥ ||
saṃdagdhastatpratāpena ahaṃkṛcchrādvinirgataḥ
||33||अत्रस्थो यः कुलायो म आसीच्छिशुसमन्वितः ॥
संदग्धस्तत्प्रतापेन अहंकृच्छ्राद्विनिर्गतः
tacchrutvā taiḥ suraiḥ sarvaiḥ śamīgarbhaḥ sa tatkṣaṇāt ||
veṣṭitaḥ pāvako'pyāśu śukaṃ śaptvā vinirgataḥ
||34||तच्छ्रुत्वा तैः सुरैः सर्वैः शमीगर्भः स तत्क्षणात् ॥
वेष्टितः पावकोऽप्याशु शुकं शप्त्वा विनिर्गतः
ahaṃ yasmāttvayā pāpa devānāṃ saṃniveditaḥ ||
tasmācchuka na te vāṇī vispaṣṭā saṃbhaviṣyati
||35||अहं यस्मात्त्वया पाप देवानां संनिवेदितः ॥
तस्माच्छुक न ते वाणी विस्पष्टा संभविष्यति
evamuktvā jātavedā devādarśanavāṃchayā ||
hāṭakeśvaraje kṣetre devasya parameṣṭhinaḥ
||36||एवमुक्त्वा जातवेदा देवादर्शनवांछया ॥
हाटकेश्वरजे क्षेत्रे देवस्य परमेष्ठिनः
jalāśayaṃ sugambhīraṃ pūrvottaradiksaṃsthitam ||
dṛṣṭvā tatra praviṣṭastu nibhṛtaṃ ca samāśritaḥ
||37||जलाशयं सुगम्भीरं पूर्वोत्तरदिक्संस्थितम् ॥
दृष्ट्वा तत्र प्रविष्टस्तु निभृतं च समाश्रितः
etasminnaṃtare tatra matsyakacchapadardurāḥ ||
vahnipratāpanirdagdhā dṛśyaṃte śataśo mṛtāḥ
||38||एतस्मिन्नंतरे तत्र मत्स्यकच्छपदर्दुराः ॥
वह्निप्रतापनिर्दग्धा दृश्यंते शतशो मृताः
atha caiko'rdhanirdagdha āyuḥśeṣeṇa darduraḥ ||
tasmājjalādviniṣkrāṃto dṛṣṭo devaiśca dūrataḥ
||39||अथ चैकोऽर्धनिर्दग्ध आयुःशेषेण दर्दुरः ॥
तस्माज्जलाद्विनिष्क्रांतो दृष्टो देवैश्च दूरतः
pṛṣṭaśca brūhi cedbheka tvayā dṛṣṭo hutāśanaḥ ||
tadarthamiha saṃprāptāḥ sarve devāḥ savāsavāḥ
||40||पृष्टश्च ब्रूहि चेद्भेक त्वया दृष्टो हुताशनः ॥
तदर्थमिह संप्राप्ताः सर्वे देवाः सवासवाः
bheka uvāca
asmiñjalāśaye vahniḥ sāṃprataṃ paryavasthitaḥ ||
tasyaite jalamadhyasthā mṛtā bhūrijalodbhavāḥ
||41||अस्मिञ्जलाशये वह्निः सांप्रतं पर्यवस्थितः ॥
तस्यैते जलमध्यस्था मृता भूरिजलोद्भवाः
asmākaṃ nidhanaṃ prāptaṃ kuṭumbaṃ surasattamāḥ ||
ahaṃ kṛcchreṇa niṣkrāṃta etasmājjalasaṃśrayāt
||42||अस्माकं निधनं प्राप्तं कुटुम्बं सुरसत्तमाः ॥
अहं कृच्छ्रेण निष्क्रांत एतस्माज्जलसंश्रयात्
tacchrutvā te surāḥ sarve sarvatastaṃ jalāśayam ||
veṣṭayitvā sthitāstatra vahnirbhekaṃ śaśāpa ha
||43||तच्छ्रुत्वा ते सुराः सर्वे सर्वतस्तं जलाशयम् ॥
वेष्टयित्वा स्थितास्तत्र वह्निर्भेकं शशाप ह
yasmādbheka tvayā mūḍha devebhyo'haṃ niveditaḥ ||
tasmāttvaṃ bhavitā nūnaṃ vijihvo'tra dharātale
||44||यस्माद्भेक त्वया मूढ देवेभ्योऽहं निवेदितः ॥
तस्मात्त्वं भविता नूनं विजिह्वोऽत्र धरातले
evamuktvā tataḥ sthānāttato vahnirvinirgataḥ ||
tāvatsa brahmaṇā proktaḥ svayameva mahātmanā
||45||एवमुक्त्वा ततः स्थानात्ततो वह्निर्विनिर्गतः ॥
तावत्स ब्रह्मणा प्रोक्तः स्वयमेव महात्मना
bhobho vahne kimarthaṃ tvaṃ devāndṛṣṭvā pragacchasi ||
tvamādyaścaiva sarveṣāmeteṣāṃ saṃsthito mukham
||46||भोभो वह्ने किमर्थं त्वं देवान्दृष्ट्वा प्रगच्छसि ॥
त्वमाद्यश्चैव सर्वेषामेतेषां संस्थितो मुखम्
tvayyāhutirhutā samyagādityamupatiṣṭhate ||
ādityājjāyate vṛṣṭirvṛṣṭerannaṃ tataḥ prajāḥ
||47||त्वय्याहुतिर्हुता सम्यगादित्यमुपतिष्ठते ॥
आदित्याज्जायते वृष्टिर्वृष्टेरन्नं ततः प्रजाः
tasmāddhātā vidhātā ca tvameva jagataḥ sthitaḥ ||
saṃtuṣṭe dhāryate viśvaṃ tvayi ruṣṭe vinaṃkṣyati
||48||तस्माद्धाता विधाता च त्वमेव जगतः स्थितः ॥
संतुष्टे धार्यते विश्वं त्वयि रुष्टे विनंक्ष्यति
agniṣṭomādikā yajñāstvayi sarve pratiṣṭhitāḥ ||
atha sarvāṇi bhūtāni jīvaṃti tava saṃśrayāt
||49||अग्निष्टोमादिका यज्ञास्त्वयि सर्वे प्रतिष्ठिताः ॥
अथ सर्वाणि भूतानि जीवंति तव संश्रयात्
tvamagne sarvabhūtānāmantaścarasi sarvadā ||
tenaivānnaṃ ca pānaṃ ca jaṭharasthaṃ pacatyalama
||50||त्वमग्ने सर्वभूतानामन्तश्चरसि सर्वदा ॥
तेनैवान्नं च पानं च जठरस्थं पचत्यलम
tasmātkuru prasādaṃ tvaṃ sarveṣāṃ ca divaukasām ||
kopasya kāraṇaṃ brūhi yatastyaktvā pragacchasi
||51||तस्मात्कुरु प्रसादं त्वं सर्वेषां च दिवौकसाम् ॥
कोपस्य कारणं ब्रूहि यतस्त्यक्त्वा प्रगच्छसि
sūta uvāca
tasya tadvacanaṃ śrutvā devasya parameṣṭhinaḥ ||
provāca praṇayātkopaṃ kṛtvā natvā ca padmajam
||52||तस्य तद्वचनं श्रुत्वा देवस्य परमेष्ठिनः ॥
प्रोवाच प्रणयात्कोपं कृत्वा नत्वा च पद्मजम्
agniruvāca
ahaṃ kopaṃ samādhāya śakrasyopari padmaja ||
praṇaṣṭo jagadutsṛjya yasmāttatkāraṇaṃ śṛṇu
||53||अहं कोपं समाधाय शक्रस्योपरि पद्मज ॥
प्रणष्टो जगदुत्सृज्य यस्मात्तत्कारणं शृणु
anāvṛṣṭyā mahendrasya saṃjātaścauṣadhīkṣayaḥ ||
tato'smyahaṃ śvamāṃsena viśvāmitreṇa yojitaḥ
||54||अनावृष्ट्या महेन्द्रस्य संजातश्चौषधीक्षयः ॥
ततोऽस्म्यहं श्वमांसेन विश्वामित्रेण योजितः
etasmātkāraṇānnaṣṭo na kāmānna ca saṃbhramāt ||
abhakṣyabhakṣaṇādbhītaḥ satyametanmayoditam
||55||एतस्मात्कारणान्नष्टो न कामान्न च संभ्रमात् ॥
अभक्ष्यभक्षणाद्भीतः सत्यमेतन्मयोदितम्
tacchrutvā sa caturvaktraḥ śakramāha tataḥ param ||
yuktameva śikhī prāha kimarthaṃ na ca varṣasi
||56||तच्छ्रुत्वा स चतुर्वक्त्रः शक्रमाह ततः परम् ॥
युक्तमेव शिखी प्राह किमर्थं न च वर्षसि
śakra uvāca
jyeṣṭhaṃ bhrātaramullaṃghya śaṃtanuḥ pṛthivīpatiḥ ||
pitṛpaitāmahe rājye sa niviṣṭaḥ pitāmaha
||57||ज्येष्ठं भ्रातरमुल्लंघ्य शंतनुः पृथिवीपतिः ॥
पितृपैतामहे राज्ये स निविष्टः पितामह
etasmātkāraṇādvṛṣṭiḥ saṃniruddhā mayā prabho ||
tadbrūhi kiṃ karomyadya tvaṃ pramāṇaṃ pitāmaha
||58||एतस्मात्कारणाद्वृष्टिः संनिरुद्धा मया प्रभो ॥
तद्ब्रूहि किं करोम्यद्य त्वं प्रमाणं पितामह
pitāmaha uvāca
tasyākramasya saṃprāptaṃ pāpaṃ tena mahībhujā ||
upabhuktamavṛṣṭyādya tasmādvṛṣṭiṃ kuru drutam
||59||तस्याक्रमस्य संप्राप्तं पापं तेन महीभुजा ॥
उपभुक्तमवृष्ट्याद्य तस्माद्वृष्टिं कुरु द्रुतम्
madvākyādyāti no nāśaṃ yāvadetajjagattrayam ||
akālenāpi devendra sasyābhāvādbubhukṣayā
||60||मद्वाक्याद्याति नो नाशं यावदेतज्जगत्त्रयम् ॥
अकालेनापि देवेन्द्र सस्याभावाद्बुभुक्षया
etasminnaṃtare śakra ādideśa tvarānvitaḥ ||
puṣkarāvartakānmeghānvṛṣṭyarthaṃ dharaṇītale
||61||एतस्मिन्नंतरे शक्र आदिदेश त्वरान्वितः ॥
पुष्करावर्तकान्मेघान्वृष्ट्यर्थं धरणीतले
te'pi śakrasamādeśātsamastadharaṇītalam ||
tatkṣaṇātpūrayāmāsurgarjanto vidyudanvitāḥ
||62||तेऽपि शक्रसमादेशात्समस्तधरणीतलम् ॥
तत्क्षणात्पूरयामासुर्गर्जन्तो विद्युदन्विताः
athābravītpunarbrahmā devaiḥ sārdhaṃ hutāśanam ||
agnihotreṣu viprāṇāṃ pratyakṣo bhava pāvaka ||
sāṃprataṃ tvaṃ varaṃ mattaḥ prārthayasvābhivāṃchitam
||63||अथाब्रवीत्पुनर्ब्रह्मा देवैः सार्धं हुताशनम् ॥
अग्निहोत्रेषु विप्राणां प्रत्यक्षो भव पावक ॥
सांप्रतं त्वं वरं मत्तः प्रार्थयस्वाभिवांछितम्
agniruvāca
ayaṃ jalāśayaḥ puṇyo mannāmnā pṛthivītale ||
khyātiṃ yātu caturvaktra vahnitīrthamiti smṛtam
||64||अयं जलाशयः पुण्यो मन्नाम्ना पृथिवीतले ॥
ख्यातिं यातु चतुर्वक्त्र वह्नितीर्थमिति स्मृतम्
atra yaḥ prātarutthāya snātvā śraddhā samanvitaḥ ||
agnisūktaṃ japitvā ca tvāṃ prapaśyati sādaram ||
tasya tuṣṭistvayā kāryā drutaṃ madvākyataḥ prabho
||65||अत्र यः प्रातरुत्थाय स्नात्वा श्रद्धा समन्वितः ॥
अग्निसूक्तं जपित्वा च त्वां प्रपश्यति सादरम् ॥
तस्य तुष्टिस्त्वया कार्या द्रुतं मद्वाक्यतः प्रभो
śrībrahmovāca
atra yaḥ prātarutthāya snātvā vai vedaviddvijaḥ ||
agnisūktaṃ japitvā ca vīkṣayiṣyati māṃ tataḥ
||66||अत्र यः प्रातरुत्थाय स्नात्वा वै वेदविद्द्विजः ॥
अग्निसूक्तं जपित्वा च वीक्षयिष्यति मां ततः
agniṣṭomasya yajñasya sakalaṃ lapsyate phalam ||
anekajanmajaṃ pāpaṃ nāśameṣyati pāvaka
||67||अग्निष्टोमस्य यज्ञस्य सकलं लप्स्यते फलम् ॥
अनेकजन्मजं पापं नाशमेष्यति पावक
sūta uvāca
evamuktvā sa bhagavānvirarāma pitāmahaḥ ||
pāvako'pi ca viprāṇāmagnihotreṣu saṃsthitaḥ
||68||एवमुक्त्वा स भगवान्विरराम पितामहः ॥
पावकोऽपि च विप्राणामग्निहोत्रेषु संस्थितः
evaṃ tatra samudbhūtaṃ vahnitīrthaṃ mahādbhutam ||
tatra snāto naraḥ prātaḥ sarvapāpaiḥ pramucyate
||69||एवं तत्र समुद्भूतं वह्नितीर्थं महाद्भुतम् ॥
तत्र स्नातो नरः प्रातः सर्वपापैः प्रमुच्यते
agniruvāca
mamātṛptasya lokeśa tāvaddvādaśavatsarān ||
kṣutpīḍāsaṃvṛte martye na prāptaṃ kutraciddhaviḥ
||70||ममातृप्तस्य लोकेश तावद्द्वादशवत्सरान् ॥
क्षुत्पीडासंवृते मर्त्ये न प्राप्तं कुत्रचिद्धविः
bhaviṣyaṃti tathā yajñā kālena mahatā vibho ||
saṃjātaiḥ paśubhirbhūyaḥ sasyādairaparairbhuvi
||71||भविष्यंति तथा यज्ञा कालेन महता विभो ॥
संजातैः पशुभिर्भूयः सस्यादैरपरैर्भुवि
śrībrahmovāca
atra ye brāhmaṇāḥ kecinnivasaṃti hutāśana ||
vasorddhārāpradānena te tvāṃ naktaṃdinaṃ sadā
||72||अत्र ये ब्राह्मणाः केचिन्निवसंति हुताशन ॥
वसोर्द्धाराप्रदानेन ते त्वां नक्तंदिनं सदा
tarpayiṣyaṃti sadbhaktyā tataḥ puṣṭimavāpsyasi ||
te'pi kāmyairmano'bhīṣṭairbhaviṣyaṃti samanvitāḥ
||73||तर्पयिष्यंति सद्भक्त्या ततः पुष्टिमवाप्स्यसि ॥
तेऽपि काम्यैर्मनोऽभीष्टैर्भविष्यंति समन्विताः
saṃkrāṃti samaye yeṣāṃ vasordhārāpradāyinām ||
bhaviṣyati kṣutaṃ vahne hūyamāne tavānala
||74||संक्रांति समये येषां वसोर्धाराप्रदायिनाम् ॥
भविष्यति क्षुतं वह्ने हूयमाने तवानल
teṣāṃ pāpaṃ ca yatkiṃcijjñānato'jñānataḥ kṛtam ||
tadyāsyati kṣayaṃ sarvamājanmamaraṇāṃtikam
||75||तेषां पापं च यत्किंचिज्ज्ञानतोऽज्ञानतः कृतम् ॥
तद्यास्यति क्षयं सर्वमाजन्ममरणांतिकम्
tvayi tuṣṭiṃ gate paścādbhaviṣyati mahīpatiḥ ||
śibirnāma suvikhyāta uśīnarasamudravaḥ
||76||त्वयि तुष्टिं गते पश्चाद्भविष्यति महीपतिः ॥
शिबिर्नाम सुविख्यात उशीनरसमुद्रवः
sa kṛtvā śraddhayā yuktaḥ satraṃ dvādaśavārṣikam ||
vasorddhārāpradānena varṣaṃ tvāṃ tarpayiṣyati ||
kalaśasya ca vaktreṇāvicchinnena divāniśam
||77||स कृत्वा श्रद्धया युक्तः सत्रं द्वादशवार्षिकम् ॥
वसोर्द्धाराप्रदानेन वर्षं त्वां तर्पयिष्यति ॥
कलशस्य च वक्त्रेणाविच्छिन्नेन दिवानिशम्
tatastuṣṭiṃ parāṃ prāpya parāṃ puṣṭimavāpsyasi ||
pūjyamāno dharāpṛṣṭhe sarvairvedavidāṃ varaiḥ
||78||ततस्तुष्टिं परां प्राप्य परां पुष्टिमवाप्स्यसि ॥
पूज्यमानो धरापृष्ठे सर्वैर्वेदविदां वरैः
adyaprabhṛti yatkiṃcitkarma cātra bhaviṣyati ||
śāṃtikaṃ pauṣṭikaṃ vāpi vasorddhārāsamanvitam ||
saṃbhaviṣyati tatsarvaṃ tava tṛptikaraṃ param
||79||अद्यप्रभृति यत्किंचित्कर्म चात्र भविष्यति ॥
शांतिकं पौष्टिकं वापि वसोर्द्धारासमन्वितम् ॥
संभविष्यति तत्सर्वं तव तृप्तिकरं परम्
api yadvaiśvadevīyaṃ karma kiṃciddvijanmanām ||
vasorddhārāvihīnaṃ ca niṣphalaṃ saṃbhaviṣyati
||80||अपि यद्वैश्वदेवीयं कर्म किंचिद्द्विजन्मनाम् ॥
वसोर्द्धाराविहीनं च निष्फलं संभविष्यति
yasmādbhavati saṃpūrṇaṃ karma yajñādikaṃ hi tat ||
śāṃtikaṃ vaiśvadevaṃ ca pūrṇāhutirihocyate
||81||यस्माद्भवति संपूर्णं कर्म यज्ञादिकं हि तत् ॥
शांतिकं वैश्वदेवं च पूर्णाहुतिरिहोच्यते
yaḥ samyakchraddhayā yukto vasorddhārāṃ pradāsyati ||
sa kāmaṃ manasā dhyātaṃ samavāpsyati kṛtsnaśaḥ
||82||यः सम्यक्छ्रद्धया युक्तो वसोर्द्धारां प्रदास्यति ॥
स कामं मनसा ध्यातं समवाप्स्यति कृत्स्नशः
iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye vasorddhārāmāhātmyavarṇanaṃnāma navatitamo'dhyāyaḥ || 90 ||