ānartakeśvaraśūdrakeśvaramāhātmyavarṇanam
sūta uvāca
tathānyadapi tatrāsti taḍāgaṃ devanirmitam ||
yatrānarto nṛpaḥ siddhaḥ suhayo nāma nāmataḥ
||1||तथान्यदपि तत्रास्ति तडागं देवनिर्मितम् ॥
यत्रानर्तो नृपः सिद्धः सुहयो नाम नामतः
tenaiva bhūbhujā tatra liṃgaṃ saṃsthāpitaṃ śubham ||
ānarteśvarasaṃjñaṃ ca sarva siddhipradaṃ nṛṇām
||2||तेनैव भूभुजा तत्र लिंगं संस्थापितं शुभम् ॥
आनर्तेश्वरसंज्ञं च सर्व सिद्धिप्रदं नृणाम्
tatrāṃgārakaṣaṣṭhyāṃ yastaḍāge snānamācaret ||
sa prāpnoti naraḥ siddhiṃ yathā''nartādhipena ca
||3||तत्रांगारकषष्ठ्यां यस्तडागे स्नानमाचरेत् ॥
स प्राप्नोति नरः सिद्धिं यथाऽऽनर्ताधिपेन च
ṛṣaya ūcuḥ
kathaṃ siddhistu saṃprāptā ānartena mahātmanā ||
sarvaṃ kathaya tatsūta sarvaṃ vetsi na saṃśayaḥ
||4||कथं सिद्धिस्तु संप्राप्ता आनर्तेन महात्मना ॥
सर्वं कथय तत्सूत सर्वं वेत्सि न संशयः
sūta uvāca
ānartaḥ suhayo nāma purāsītpṛthivīpatiḥ ||
sarvāribhirhato yuddhe palāyanaparāyaṇaḥ ||
ucchiṣṭo mlecchasaṃspṛṣṭa ekākī bahubhirvṛtaḥ
||5||आनर्तः सुहयो नाम पुरासीत्पृथिवीपतिः ॥
सर्वारिभिर्हतो युद्धे पलायनपरायणः ॥
उच्छिष्टो म्लेच्छसंस्पृष्ट एकाकी बहुभिर्वृतः
atha tasya kapālaṃ ca kāpālika vratānvitaḥ ||
jagṛhe nijakarmārthaṃ jñātvā taṃ vīrasaṃbhavam
||6||अथ तस्य कपालं च कापालिक व्रतान्वितः ॥
जगृहे निजकर्मार्थं ज्ञात्वा तं वीरसंभवम्
ānarteśvarasāṃnidhye vasamāno vane sthitaḥ ||
sa rātrau tena toyena sarvadevamayena ca
||7||आनर्तेश्वरसांनिध्ये वसमानो वने स्थितः ॥
स रात्रौ तेन तोयेन सर्वदेवमयेन च
taḍāgotthena saṃpūrṇaṃ rātrau kṛtvā pramuṃcati ||
āsītpūrvaṃ vaṇiṅnāmnā siddhasena iti smṛtaḥ ||
dhanī bhṛtyasamopetaḥ sadā puṇyaparāyaṇaḥ
||8||तडागोत्थेन संपूर्णं रात्रौ कृत्वा प्रमुंचति ॥
आसीत्पूर्वं वणिङ्नाम्ना सिद्धसेन इति स्मृतः ॥
धनी भृत्यसमोपेतः सदा पुण्यपरायणः
kasyacittvatha kālasya paṇyabuddhyā dvijottamāḥ ||
prasthitaścottarāṃ kāṣṭhāṃ sa sārthena samanvitaḥ
||9||कस्यचित्त्वथ कालस्य पण्यबुद्ध्या द्विजोत्तमाः ॥
प्रस्थितश्चोत्तरां काष्ठां स सार्थेन समन्वितः
atha prāptaḥ kramātsarvaiḥ sa gacchanmarumaṃḍala m ||
vṛkṣodakaparityaktaṃ sarvasattvavivarjitam
||10||अथ प्राप्तः क्रमात्सर्वैः स गच्छन्मरुमंडल म् ॥
वृक्षोदकपरित्यक्तं सर्वसत्त्वविवर्जितम्
tatra rātriṃ samāsādya śrāṃtāḥ pāṃthāḥ samantataḥ ||
suptāḥ sthānāni saṃsṛtya gatā nidrāvaśaṃ tathā
||11||तत्र रात्रिं समासाद्य श्रांताः पांथाः समन्ततः ॥
सुप्ताः स्थानानि संसृत्य गता निद्रावशं तथा
tataḥ pratyūṣamāsādya samutthāya ca satvaram ||
prasthitā uttarāṃ kāṣṭhāṃ muktvaikaṃ śūdrasevakam
||12||ततः प्रत्यूषमासाद्य समुत्थाय च सत्वरम् ॥
प्रस्थिता उत्तरां काष्ठां मुक्त्वैकं शूद्रसेवकम्
sa vai mārgapariśrāṃto gatvā nidrāvaśaṃ bhṛśam ||
na jajāgāra jāte'pi prayāṇe bahuśabdite
||13||स वै मार्गपरिश्रांतो गत्वा निद्रावशं भृशम् ॥
न जजागार जातेऽपि प्रयाणे बहुशब्दिते
na ca taiḥ sa smṛtaḥ sārthairyaiḥ samaṃ prasthito gṛhāt ||
na ca kenāpi saṃdṛṣṭaḥ sa tu rodhasi saṃsthitaḥ
||14||न च तैः स स्मृतः सार्थैर्यैः समं प्रस्थितो गृहात् ॥
न च केनापि संदृष्टः स तु रोधसि संस्थितः
evaṃ gate tataḥ sārthe prodgate sūryamaṃḍale ||
tīvratāpaparispṛṣṭo jajāgāra tataḥ param
||15||एवं गते ततः सार्थे प्रोद्गते सूर्यमंडले ॥
तीव्रतापपरिस्पृष्टो जजागार ततः परम्
yāvatpaśyati no kiñcittasminsthāne sa sārthakam ||
na ca teṣāṃ marau tasmim̐llakṣyate padapaddhatiḥ
||6||यावत्पश्यति नो किञ्चित्तस्मिन्स्थाने स सार्थकम् ॥
न च तेषां मरौ तस्मिँल्लक्ष्यते पदपद्धतिः
tato duḥkhaparītātmā dhāvamāna itastataḥ ||
patito medinīpṛṣṭhe madhyāhne kṣuttṛṣārditaḥ
||7||ततो दुःखपरीतात्मा धावमान इतस्ततः ॥
पतितो मेदिनीपृष्ठे मध्याह्ने क्षुत्तृषार्दितः
evaṃ tasya tṛṣārtasya patitasya dharātale ||
dhṛtaprāṇasya kṛcchreṇa saṃyāto'stācalaṃ raviḥ
||18||एवं तस्य तृषार्तस्य पतितस्य धरातले ॥
धृतप्राणस्य कृच्छ्रेण संयातोऽस्ताचलं रविः
tataḥ kiṃcitsasaṃjño'bhūnmaṃdībhūte divākare ||
cintayāmāsa cittena kvāhaṃ gacchāmi sāṃpratam
||19||ततः किंचित्ससंज्ञोऽभून्मंदीभूते दिवाकरे ॥
चिन्तयामास चित्तेन क्वाहं गच्छामि सांप्रतम्
na lakṣyate kvacinmārgo dṛśyate na ca mānuṣam ||
nātra toyaṃ na ca cchāyā nūnaṃ me mṛtyu rāgataḥ
||20||न लक्ष्यते क्वचिन्मार्गो दृश्यते न च मानुषम् ॥
नात्र तोयं न च च्छाया नूनं मे मृत्यु रागतः
evaṃ cintāprapannasya tasya śūdrasya nirjane ||
marau tasminsamāyātā śarvarī tadanantaram
||21||एवं चिन्ताप्रपन्नस्य तस्य शूद्रस्य निर्जने ॥
मरौ तस्मिन्समायाता शर्वरी तदनन्तरम्
atha kṣaṇena śuśrāva sa gītaṃ madhuradhvani ||
paṭhatāṃ nandivṛddhānāṃ tathā śabdaṃ manoharam
||22||अथ क्षणेन शुश्राव स गीतं मधुरध्वनि ॥
पठतां नन्दिवृद्धानां तथा शब्दं मनोहरम्
athāpaśyatkṣaṇenaiva pretasaṃghaiḥ sabhāvṛtam ||
pretamekaṃ ca sarveṣāmādhipatye vyava sthitam
||23||अथापश्यत्क्षणेनैव प्रेतसंघैः सभावृतम् ॥
प्रेतमेकं च सर्वेषामाधिपत्ये व्यव स्थितम्
tataste pārśvagāḥ pretā eke nṛtyaṃ pracakrire ||
tatpuro gītamanye tu stutiṃ caiva tathā pare
||24||ततस्ते पार्श्वगाः प्रेता एके नृत्यं प्रचक्रिरे ॥
तत्पुरो गीतमन्ये तु स्तुतिं चैव तथा परे
athāsau prāha taṃ śūdramatithe kuru bhojanam ||
svecchayā piba toyaṃ ca śreyo yena bhavenmama
||25||अथासौ प्राह तं शूद्रमतिथे कुरु भोजनम् ॥
स्वेच्छया पिब तोयं च श्रेयो येन भवेन्मम
tataḥ sa bhojanaṃ cakre kṣudhārtaśca papau jalam ||
bhayaṃ tyaktvā suviśrabdhaḥ pretarājasya śāsanāt
||26||ततः स भोजनं चक्रे क्षुधार्तश्च पपौ जलम् ॥
भयं त्यक्त्वा सुविश्रब्धः प्रेतराजस्य शासनात्
tataḥ pretāśca te sarve pretatvena samanvitāḥ ||
yathājyeṣṭhaṃ yathānyāyaṃ pracakrurbhojanakriyām
||27||ततः प्रेताश्च ते सर्वे प्रेतत्वेन समन्विताः ॥
यथाज्येष्ठं यथान्यायं प्रचक्रुर्भोजनक्रियाम्
evaṃ teṣāṃ samastānāṃ vilāsaiḥ pārthivocitaiḥ ||
atikrāntā niśā sarvā krīḍatāṃ dvijasattamāḥ
||28||एवं तेषां समस्तानां विलासैः पार्थिवोचितैः ॥
अतिक्रान्ता निशा सर्वा क्रीडतां द्विजसत्तमाः
tataḥ prabhāte vimale prodgate ravimaṃḍale ||
yāvatpaśyati śūdraḥ sa tāvattatra na kiñcana
||29||ततः प्रभाते विमले प्रोद्गते रविमंडले ॥
यावत्पश्यति शूद्रः स तावत्तत्र न किञ्चन
tataśca cintayāmāsa kimetatsvapnadarśanam ||
cittabhramo'thavā'smākamindrajālamathāpi vā
||30||ततश्च चिन्तयामास किमेतत्स्वप्नदर्शनम् ॥
चित्तभ्रमोऽथवाऽस्माकमिन्द्रजालमथापि वा
athavā satyametaddhi yato me tṛptiruttamā ||
saṃjāteyaṃ kṣudhārttasya pipāsākulitasya ca
||3||अथवा सत्यमेतद्धि यतो मे तृप्तिरुत्तमा ॥
संजातेयं क्षुधार्त्तस्य पिपासाकुलितस्य च
evaṃ cintayamānasya bhāskaro gaganāṃgaṇam ||
samāruroha tāpena tāpayandharaṇītalam
||32||एवं चिन्तयमानस्य भास्करो गगनांगणम् ॥
समारुरोह तापेन तापयन्धरणीतलम्
tataḥ kaṃcitsamāśritya svalpacchāyaṃ mahīruham ||
prāptavāndivasasyāṃtaṃ kṣutpipāsāprapīḍitaḥ
||33||ततः कंचित्समाश्रित्य स्वल्पच्छायं महीरुहम् ॥
प्राप्तवान्दिवसस्यांतं क्षुत्पिपासाप्रपीडितः
tato niśāmukhe prāpte bhūyo'pi pretarājakam ||
pretaistaiścasamopetaṃ tathārūpaṃ vyalokayat
||34||ततो निशामुखे प्राप्ते भूयोऽपि प्रेतराजकम् ॥
प्रेतैस्तैश्चसमोपेतं तथारूपं व्यलोकयत्
tathaiva bhojanaṃ cakre tasyātithyasamudbhavam ||
bhayena rahitaḥ śūdro harṣeṇa mahatānvitaḥ
||35||तथैव भोजनं चक्रे तस्यातिथ्यसमुद्भवम् ॥
भयेन रहितः शूद्रो हर्षेण महतान्वितः
evaṃ tasya niśāvaktre nityameva sa bhūpatiḥ ||
ātithyaṃ prakarotyeva samāgatya tathaiva ca
||36||एवं तस्य निशावक्त्रे नित्यमेव स भूपतिः ॥
आतिथ्यं प्रकरोत्येव समागत्य तथैव च
tato'nyadivase prāpte tena śūdreṇa bhūpatiḥ ||
pṛṣṭaḥ kimetadāścaryaṃ dṛśyate rajanīmukhe
||37||ततोऽन्यदिवसे प्राप्ते तेन शूद्रेण भूपतिः ॥
पृष्टः किमेतदाश्चर्यं दृश्यते रजनीमुखे
vibhavaste mahābhāga praṇaśyati niśākṣaye ||
etatkīrtaya me guhyaṃ na cetpretapa saṃsthitam ||
atra kautūhalaṃ jātaṃ dṛṣṭvedaṃ suviceṣṭitam
||38||विभवस्ते महाभाग प्रणश्यति निशाक्षये ॥
एतत्कीर्तय मे गुह्यं न चेत्प्रेतप संस्थितम् ॥
अत्र कौतूहलं जातं दृष्ट्वेदं सुविचेष्टितम्
preta uvāca
asti puṇyaṃ mahākṣetraṃ hāṭakeśvarasaṃjñitam ||
gaṃgā ca yamunā caiva sthite tatra ca saṃgame
||39||अस्ति पुण्यं महाक्षेत्रं हाटकेश्वरसंज्ञितम् ॥
गंगा च यमुना चैव स्थिते तत्र च संगमे
tābhyāmatisamīpasthaṃ śivasyāyatanaṃ śubham ||
mahāvratadharastatra tapasyati sunaiṣṭhikaḥ
||40||ताभ्यामतिसमीपस्थं शिवस्यायतनं शुभम् ॥
महाव्रतधरस्तत्र तपस्यति सुनैष्ठिकः
sa sadā rātriśaucārthaṃ kapālaṃ jalapūritam ||
madīyaṃ śayane cakre tatra kṛtvā nijāṃ kriyām
||41||स सदा रात्रिशौचार्थं कपालं जलपूरितम् ॥
मदीयं शयने चक्रे तत्र कृत्वा निजां क्रियाम्
tatprabhāvānmameyaṃ hi vibhūtirjāyate niśi ||
divā rikte kṛte yāti bhūya eva mahāmate
||42||तत्प्रभावान्ममेयं हि विभूतिर्जायते निशि ॥
दिवा रिक्ते कृते याति भूय एव महामते
tasmātkuru prasādaṃ me tatra gatvā kapālakam ||
cūrṇaṃ kṛtvā madīyaṃ tattasmiṃstoye vinikṣipa
||43||तस्मात्कुरु प्रसादं मे तत्र गत्वा कपालकम् ॥
चूर्णं कृत्वा मदीयं तत्तस्मिंस्तोये विनिक्षिप
yena me jāyate mokṣaḥ pretabhāvātsudāruṇāt
||44||येन मे जायते मोक्षः प्रेतभावात्सुदारुणात्
tathā tatrāsti pūrvasyāṃ diśi tattīrthamuttamam ||
gayāśira iti khyātaṃ pretatvānmuktidā yakam
||45||तथा तत्रास्ति पूर्वस्यां दिशि तत्तीर्थमुत्तमम् ॥
गयाशिर इति ख्यातं प्रेतत्वान्मुक्तिदा यकम्
tatra gatvā kuru śrāddhaṃ sarveṣāṃ tvaṃ mahāmate ||
dṛśyate tava pārśvasthā bhadra saṃpuṭikā śubhām
||46||तत्र गत्वा कुरु श्राद्धं सर्वेषां त्वं महामते ॥
दृश्यते तव पार्श्वस्था भद्र संपुटिका शुभाम्
asyāṃ nāmāni sarveṣāṃ yathājyeṣṭhaṃ samālikha ||
tataḥ śrāddhaṃ kuruṣvāśu dayāṃ kṛtvā garīyasīm
||47||अस्यां नामानि सर्वेषां यथाज्येष्ठं समालिख ॥
ततः श्राद्धं कुरुष्वाशु दयां कृत्वा गरीयसीम्
vayaṃ tvāṃ tatra neṣyāmaḥ sukhopāyena bhadraka ||
nidhiṃ ca darśayiṣyāmaḥ śrāddhārthaṃ sumahattaram
||48||वयं त्वां तत्र नेष्यामः सुखोपायेन भद्रक ॥
निधिं च दर्शयिष्यामः श्राद्धार्थं सुमहत्तरम्
tatheti samanujñāte tena śūdreṇa satvaram ||
ninyustaṃ skandhamāropya śūdraṃ kṣetre yathoditam
||49||तथेति समनुज्ञाते तेन शूद्रेण सत्वरम् ॥
निन्युस्तं स्कन्धमारोप्य शूद्रं क्षेत्रे यथोदितम्
darśayāmāsurevāsya nidhānaṃ bhūrivittajam ||
tadādāya gatastatra yatrāsau naiṣṭhikaḥ sthitaḥ
||50||दर्शयामासुरेवास्य निधानं भूरिवित्तजम् ॥
तदादाय गतस्तत्र यत्रासौ नैष्ठिकः स्थितः
tataḥ praṇamya taṃ bhaktyā katha yāmāsa vistarāt ||
tasya bhūtapateḥ sarvaṃ vṛttāṃtaṃ vinayānvitaḥ
||51||ततः प्रणम्य तं भक्त्या कथ यामास विस्तरात् ॥
तस्य भूतपतेः सर्वं वृत्तांतं विनयान्वितः
tato labdhvā kapālaṃ taccūrṇayitvā samāhitaḥ ||
gaṃgāyamunayormadhye pracikṣepa mudānvitaḥ
||52||ततो लब्ध्वा कपालं तच्चूर्णयित्वा समाहितः ॥
गंगायमुनयोर्मध्ये प्रचिक्षेप मुदान्वितः
etasminnaṃtare preto divyarūpavapurdharaḥ ||
vimānastho'bravīdvākyaṃ śūdraṃ taṃ harṣasaṃyutaḥ
||53||एतस्मिन्नंतरे प्रेतो दिव्यरूपवपुर्धरः ॥
विमानस्थोऽब्रवीद्वाक्यं शूद्रं तं हर्षसंयुतः
prasādāttava mukto'haṃ pretatvāddāruṇāditaḥ ||
svasti te'stu gamiṣyāmi sāṃprataṃ tridivālayam
||54||प्रसादात्तव मुक्तोऽहं प्रेतत्वाद्दारुणादितः ॥
स्वस्ति तेऽस्तु गमिष्यामि सांप्रतं त्रिदिवालयम्
eteṣāmeva sarveṣāmidānīṃ śrāddhamācara ||
gatvā gayāśiraḥ puṇyaṃ yena muktiḥ prajāyate
||55||एतेषामेव सर्वेषामिदानीं श्राद्धमाचर ॥
गत्वा गयाशिरः पुण्यं येन मुक्तिः प्रजायते
tataḥ sa vismayāviṣṭasteṣāmeva pṛthakpṛthak ||
śrāddhaṃ cakre ca bhūtānāṃ nityameva samāhitaḥ
||56||ततः स विस्मयाविष्टस्तेषामेव पृथक्पृथक् ॥
श्राद्धं चक्रे च भूतानां नित्यमेव समाहितः
te'pi sarve gatāḥ svargaṃ pretāstasya prabhāvataḥ ||
daduśca darśanaṃ tasya svapre harṣasamanvitāḥ
||57||तेऽपि सर्वे गताः स्वर्गं प्रेतास्तस्य प्रभावतः ॥
ददुश्च दर्शनं तस्य स्वप्रे हर्षसमन्विताः
tataḥ śūdraḥ sa vijñāya tatkṣetraṃ puṇyavardha nam ||
na jagāma gṛhaṃ bhūyastatraiva tapasi sthitaḥ
||58||ततः शूद्रः स विज्ञाय तत्क्षेत्रं पुण्यवर्ध नम् ॥
न जगाम गृहं भूयस्तत्रैव तपसि स्थितः
gaṃgāyamunayoḥ pārśve śūdrakeśvarasaṃjñitam ||
ligaṃ saṃsthāpitaṃ tena sarvapātakanāśanam
||59||गंगायमुनयोः पार्श्वे शूद्रकेश्वरसंज्ञितम् ॥
लिगं संस्थापितं तेन सर्वपातकनाशनम्
yastayorvidhivatsnānaṃ kṛtvā pūjayate naraḥ ||
śūdrakeśvarasaṃjñaṃ ca liṃgaṃ śraddhāsamanvitaḥ
||60||यस्तयोर्विधिवत्स्नानं कृत्वा पूजयते नरः ॥
शूद्रकेश्वरसंज्ञं च लिंगं श्रद्धासमन्वितः
sa sarvaiḥ pātakairmuktaḥ prayāti śiva maṃdiram ||
stūyamānaśca gaṃdharvairvimānavaramāśritaḥ
||61||स सर्वैः पातकैर्मुक्तः प्रयाति शिव मंदिरम् ॥
स्तूयमानश्च गंधर्वैर्विमानवरमाश्रितः
yastatra tyajati prāṇānkṛtvā prāyopaveśanam ||
na ca bhūyo'tra saṃsāre sa janmāpnoti |
mānavaḥ
||62||यस्तत्र त्यजति प्राणान्कृत्वा प्रायोपवेशनम् ॥
न च भूयोऽत्र संसारे स जन्माप्नोति ।
मानवः
gaṃḍūṣamapi toyasya yastasya nivasanpibet ||
so'pi saṃmucyate pāpādājanmamaraṇāṃtikāt
||63||गंडूषमपि तोयस्य यस्तस्य निवसन्पिबेत् ॥
सोऽपि संमुच्यते पापादाजन्ममरणांतिकात्
yastatra brāhmaṇeṃdrāṇāṃ saṃprayacchati bhojanam ||
pitarastasya tṛpyaṃti yāvatkalpaśatatrayam
||64||यस्तत्र ब्राह्मणेंद्राणां संप्रयच्छति भोजनम् ॥
पितरस्तस्य तृप्यंति यावत्कल्पशतत्रयम्
truṭimātraṃ ca yo dadyāttatra svarṇaṃ samāhitaḥ ||
sa prāpnoti phalaṃ kṛtsnaṃ rājasūyāśvamedhayoḥ
||65||त्रुटिमात्रं च यो दद्यात्तत्र स्वर्णं समाहितः ॥
स प्राप्नोति फलं कृत्स्नं राजसूयाश्वमेधयोः
tasmātsarvaprayatnena tattīrthavaramāśrayet ||
ya icchecchāśvataṃ svargaṃ sadaiva manujo dvijāḥ
||66||तस्मात्सर्वप्रयत्नेन तत्तीर्थवरमाश्रयेत् ॥
य इच्छेच्छाश्वतं स्वर्गं सदैव मनुजो द्विजाः
atra gāthā purā gītā gautamena maharṣiṇā ||
gaṃgāyamunayostaṃ ca prabhāvaṃ vīkṣya vismayāt
||67||अत्र गाथा पुरा गीता गौतमेन महर्षिणा ॥
गंगायमुनयोस्तं च प्रभावं वीक्ष्य विस्मयात्
gaṃgāyamunayoḥ saṃge naraḥ snātvā samāhitaḥ ||
śūdreśvaraṃ samālokya sadyaḥ svargamavāpnuyāt
||68||गंगायमुनयोः संगे नरः स्नात्वा समाहितः ॥
शूद्रेश्वरं समालोक्य सद्यः स्वर्गमवाप्नुयात्
etadvaḥ sarvamākhyātaṃ gaṃgāyamunayormayā ||
māhātmyaṃ brāhmaṇaśreṣṭhāḥ sarvapātakanāśanam
||69||एतद्वः सर्वमाख्यातं गंगायमुनयोर्मया ॥
माहात्म्यं ब्राह्मणश्रेष्ठाः सर्वपातकनाशनम्
iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe śrīhāṭakeśvarakṣetramāhātmya ānartakeśvaraśūdrakeśvaramāhātmyavarṇanaṃnāma paṃcaṣaṣṭitamo'dhyāyaḥ || 65 ||