satyasandhopi hṛṣṭātmā satāṃ dṛṣṭvā sukhānvitām
sūta uvāca
satyasandhopi hṛṣṭātmā satāṃ dṛṣṭvā sukhānvitām ||
abhīṣṭapatinā yuktāṃ kṛtakṛtyo babhūva ha
||1||सत्यसन्धोपि हृष्टात्मा सतां दृष्ट्वा सुखान्विताम् ॥
अभीष्टपतिना युक्तां कृतकृत्यो बभूव ह
tatastasyaiva liṃgasya dakṣiṇāṃ mūrtimāśritaḥ ||
dṛḍhaṃ padmāsanaṃ kṛtvā samyagdhyānaparāyaṇaḥ
||2||ततस्तस्यैव लिंगस्य दक्षिणां मूर्तिमाश्रितः ॥
दृढं पद्मासनं कृत्वा सम्यग्ध्यानपरायणः
ātmānamātmanaivātha brahmadvāreṇa saṃsthitaḥ ||
tato niḥsārayāmāsa pulakena samanvitaḥ
||3||आत्मानमात्मनैवाथ ब्रह्मद्वारेण संस्थितः ॥
ततो निःसारयामास पुलकेन समन्वितः
atha te brāhmaṇāstasya camatkārapurodbhavāḥ ||
devatā darśanārthāya prāptā dṛṣṭvā kalevaram
||4||अथ ते ब्राह्मणास्तस्य चमत्कारपुरोद्भवाः ॥
देवता दर्शनार्थाय प्राप्ता दृष्ट्वा कलेवरम्
apriyaṃ tejasā hīnaṃ mṛtamaspṛśyatāṃ gatam ||
liṃgasya nātidūrasthaṃ dāhyārthaṃ yatnamāsthitāḥ
||5||अप्रियं तेजसा हीनं मृतमस्पृश्यतां गतम् ॥
लिंगस्य नातिदूरस्थं दाह्यार्थं यत्नमास्थिताः
yāvadgurvīṃ citāṃ kṛtvā tamanveṣṭuṃ samudyatāḥ ||
tāvannaṣṭaṃ śavaṃ tacca jñāyate naiva kutracit
||6||यावद्गुर्वीं चितां कृत्वा तमन्वेष्टुं समुद्यताः ॥
तावन्नष्टं शवं तच्च ज्ञायते नैव कुत्रचित्
tataśca vismayāviṣṭāstaṃ praśaṃsāsamanvitaiḥ ||
vacanairbahuśo bhūyo vikathya ca muhurmuhuḥ
||7||ततश्च विस्मयाविष्टास्तं प्रशंसासमन्वितैः ॥
वचनैर्बहुशो भूयो विकथ्य च मुहुर्मुहुः
tatastasyotthaliṃgasya sarvaṃ pūjādikaṃ ca yat ||
sarve nirūpayāmāsuḥ saptaviṃśatimadhyataḥ
||8||ततस्तस्योत्थलिंगस्य सर्वं पूजादिकं च यत् ॥
सर्वे निरूपयामासुः सप्तविंशतिमध्यतः
liṃgānāṃ tadbhavennityaṃ satyasaṃdhasya bhūpateḥ ||
kāmadaṃ bhaktajaṃtūnāṃ sarvapātakanāśanam
||9||लिंगानां तद्भवेन्नित्यं सत्यसंधस्य भूपतेः ॥
कामदं भक्तजंतूनां सर्वपातकनाशनम्
ṛṣaya ūcuḥ
camatkāranareṃdrasya vaṃśe kṣīṇe mahāmate ||
ānarttādhipatiḥ ko'nyastatra rājā babhūva ha
||10||चमत्कारनरेंद्रस्य वंशे क्षीणे महामते ॥
आनर्त्ताधिपतिः कोऽन्यस्तत्र राजा बभूव ह
sūta uvāca
bṛhadbale hate bhūpe saṃgrāme dvijasattamāḥ |
putrabaṃdhusamāyuktāḥ sarva lokāḥ samāyayuḥ
||11||बृहद्बले हते भूपे संग्रामे द्विजसत्तमाः ।
पुत्रबंधुसमायुक्ताः सर्व लोकाः समाययुः
yatrasthaḥ sa mahīpālaḥ satyasaṃdhastaponvitaḥ ||
śokodvignāstataḥ prāhustaṃ bhūpaṃ rahasi sthitam
||12||यत्रस्थः स महीपालः सत्यसंधस्तपोन्वितः ॥
शोकोद्विग्नास्ततः प्राहुस्तं भूपं रहसि स्थितम्
kṣīṇo'yaṃ tāvako vaṃśo na kaścidvidyate yataḥ ||
dāyādo'pi kathaṃ pṛthvī saṃpratīyaṃ bhaviṣyati
||13||क्षीणोऽयं तावको वंशो न कश्चिद्विद्यते यतः ॥
दायादोऽपि कथं पृथ्वी संप्रतीयं भविष्यति
arājake nṛpaśreṣṭha mātsyo nyāyaḥ pravartate ||
rāṣṭre caiva pure caiva grāme caiva viśeṣataḥ
||14||अराजके नृपश्रेष्ठ मात्स्यो न्यायः प्रवर्तते ॥
राष्ट्रे चैव पुरे चैव ग्रामे चैव विशेषतः
paradāraratā ye ca ye ca taskaravṛttayaḥ |
sarve rājabhayādrājanmaryādāṃ pālayaṃti vai
||15||परदाररता ये च ये च तस्करवृत्तयः ।
सर्वे राजभयाद्राजन्मर्यादां पालयंति वै
tasmāttvaṃ tapa utsṛjya rājyaṃ pūrvakramāgatam ||
kuru rājyaṃ tathā dārānputrārthaṃ prāpya mā ciram
||16||तस्मात्त्वं तप उत्सृज्य राज्यं पूर्वक्रमागतम् ॥
कुरु राज्यं तथा दारान्पुत्रार्थं प्राप्य मा चिरम्
rājovāca
saṃnyasto'haṃ dvijaśreṣṭhā na rājyaṃ kartumutsahe ||
na sutānāṃ na dārāṇāṃ saṃgrahaṃ ca kathaṃcana
||17||संन्यस्तोऽहं द्विजश्रेष्ठा न राज्यं कर्तुमुत्सहे ॥
न सुतानां न दाराणां संग्रहं च कथंचन
tatputrārthaṃ pravakṣyāmi yuṣmākaṃ svāminaḥ kṛte ||
upāyaṃ yena rājā syādānartto lokapālakaḥ ||
jāmadagnyena rāmeṇa yadā kṣatraṃ nipātitam ||
garbhasthamapi kārtsnyena kopopahatacetasā
||19||तत्पुत्रार्थं प्रवक्ष्यामि युष्माकं स्वामिनः कृते ॥
उपायं येन राजा स्यादानर्त्तो लोकपालकः ॥
जामदग्न्येन रामेण यदा क्षत्रं निपातितम् ॥
गर्भस्थमपि कार्त्स्न्येन कोपोपहतचेतसा
tataḥ kṣatriyabhāryāḥ prāgṛtusnānātsamāyayuḥ ||
brāhmaṇānputrajanmārthaṃ na kāmārthaṃ kathaṃcana
||20||ततः क्षत्रियभार्याः प्रागृतुस्नानात्समाययुः ॥
ब्राह्मणान्पुत्रजन्मार्थं न कामार्थं कथंचन
tataḥ putrāḥ samutpannāstejovīryasamanvitāḥ ||
kṣetrajā bhūmipālānāṃ saṃjātāśca mahīkṣitaḥ
||21||ततः पुत्राः समुत्पन्नास्तेजोवीर्यसमन्विताः ॥
क्षेत्रजा भूमिपालानां संजाताश्च महीक्षितः
tasmādbṛhadbalasyaitā bhāryāstiṣṭhaṃti yā janāḥ ||
brāhmaṇāṃstā upāgamya ṛtusnātā yathocitān
||22||तस्माद्बृहद्बलस्यैता भार्यास्तिष्ठंति या जनाः ॥
ब्राह्मणांस्ता उपागम्य ऋतुस्नाता यथोचितान्
labhiṣyaṃti ca putrāṃstāstebhyaḥ kṣatriyapuṃgavān ||
ye bhūmiṃ pālayiṣyaṃti pālayiṣyaṃti ca prajāḥ
||23||लभिष्यंति च पुत्रांस्तास्तेभ्यः क्षत्रियपुंगवान् ॥
ये भूमिं पालयिष्यंति पालयिष्यंति च प्रजाः
tathā'trāsti śubhaṃ kuṇḍaṃ vāsiṣṭhaṃ putrajanmadam ||
yatra snātā ṛtau nārī sadyo garbhavatī bhavet ||
amogharetāḥ kāṃtā ca snānādatra prajāyate
||24||तथाऽत्रास्ति शुभं कुण्डं वासिष्ठं पुत्रजन्मदम् ॥
यत्र स्नाता ऋतौ नारी सद्यो गर्भवती भवेत् ॥
अमोघरेताः कांता च स्नानादत्र प्रजायते
ye pūrvaṃ kṣatriyā jātā brāhmaṇaiḥ kṣatriṇīṣu ca ||
te sarve tatprabhāvena saṃjātā nātra saṃśayaḥ
||25||ये पूर्वं क्षत्रिया जाता ब्राह्मणैः क्षत्रिणीषु च ॥
ते सर्वे तत्प्रभावेन संजाता नात्र संशयः
yayāyayā dvijo yaśca kṣatriṇyā'bhūdvṛtaḥ purā ||
tayā saha samāgatya snātaṃ mantrapuraskṛtam
||26||ययायया द्विजो यश्च क्षत्रिण्याऽभूद्वृतः पुरा ॥
तया सह समागत्य स्नातं मन्त्रपुरस्कृतम्
sakṛnmaidhunasaṃsargāttatastīrthaprabhāvataḥ ||
sarvāsāṃ yatsutā jātā duhitā na kathaṃcana
||27||सकृन्मैधुनसंसर्गात्ततस्तीर्थप्रभावतः ॥
सर्वासां यत्सुता जाता दुहिता न कथंचन
ye kecitputradā maṃtrāścātuścaraṇāsaṃbhavāḥ |
te sarve'tra vasiṣṭhena prayuktāḥ kṣattramicchatā ||
daṃpatyoḥ snānamātreṇa jāte'tra syātsuputrakaḥ ||
tasmātsuputradaṃnāma kuṇḍametannigadyate
||29||ये केचित्पुत्रदा मंत्राश्चातुश्चरणासंभवाः ।
ते सर्वेऽत्र वसिष्ठेन प्रयुक्ताः क्षत्त्रमिच्छता ॥
दंपत्योः स्नानमात्रेण जातेऽत्र स्यात्सुपुत्रकः ॥
तस्मात्सुपुत्रदंनाम कुण्डमेतन्निगद्यते
tasmādbhāryāḥ samastāstā bṛhadbalasamudbhavāḥ ||
atra snānaṃ prakurvaṃtu yathoktavidhinā janāḥ
||30||तस्माद्भार्याः समस्तास्ता बृहद्बलसमुद्भवाः ॥
अत्र स्नानं प्रकुर्वंतु यथोक्तविधिना जनाः
naiva kiṃcidasatyaṃ syānna ca niṃdākaraṃ tathā ||
śrūyate ca yataḥ ślokaḥ pūrvācāryairudāhṛtaḥ
||31||नैव किंचिदसत्यं स्यान्न च निंदाकरं तथा ॥
श्रूयते च यतः श्लोकः पूर्वाचार्यैरुदाहृतः
adbhyo'gnirbrahmataḥ kṣattramaśmano lohamucchritam ||
teṣāṃ sarvatragaṃ tejaḥ svāsu yoniṣu śāmyati
||32||अद्भ्योऽग्निर्ब्रह्मतः क्षत्त्रमश्मनो लोहमुच्छ्रितम् ॥
तेषां सर्वत्रगं तेजः स्वासु योनिषु शाम्यति
tacchrutvā janāḥ sarve sacivānāṃ vacokhilam ||
tadācakhyurdrutaṃ gatvā satyasaṃdhasya bhūpateḥ
||33||तच्छ्रुत्वा जनाः सर्वे सचिवानां वचोखिलम् ॥
तदाचख्युर्द्रुतं गत्वा सत्यसंधस्य भूपतेः
tatastāḥ sarvaśo dārā brāhmaṇānatisundarān ||
ṛtusnātāḥ samājagmurnṛpapatnyaḥ suharṣitāḥ
||34||ततस्ताः सर्वशो दारा ब्राह्मणानतिसुन्दरान् ॥
ऋतुस्नाताः समाजग्मुर्नृपपत्न्यः सुहर्षिताः
yatra tatputradaṃ tīrthaṃ vasiṣṭhena vinirmitam ||
tatra snātvā sakṛtsaṃgaṃ samāsādya dvijodbhavam
||35||यत्र तत्पुत्रदं तीर्थं वसिष्ठेन विनिर्मितम् ॥
तत्र स्नात्वा सकृत्संगं समासाद्य द्विजोद्भवम्
sarvāstāḥ putravatyaśca saṃjātā dvijasattamāḥ ||
āsīttasya nareṃdrasya śataṃ paṃcabhiranvitam
||36||सर्वास्ताः पुत्रवत्यश्च संजाता द्विजसत्तमाः ॥
आसीत्तस्य नरेंद्रस्य शतं पंचभिरन्वितम्
tāsāṃ samabhavadviprāḥ śataṃ paṃcādhikaṃ tathā
||37||तासां समभवद्विप्राः शतं पंचाधिकं तथा
pratyekaṃ varaputrāṇāṃ vaṃśavṛddhikaraṃ param ||
ānaṃdajananaṃ samyaksarveṣāṃ rāṣṭravāsinām
||38||प्रत्येकं वरपुत्राणां वंशवृद्धिकरं परम् ॥
आनंदजननं सम्यक्सर्वेषां राष्ट्रवासिनाम्
tatra śreṣṭho'bhavatputro ya ānartapatirbhuvi ||
aṭonāma suvikhyātaḥ sarvaśatrunibarhaṇaḥ
||39||तत्र श्रेष्ठोऽभवत्पुत्रो य आनर्तपतिर्भुवि ॥
अटोनाम सुविख्यातः सर्वशत्रुनिबर्हणः
aṭeśvaraiti khyāto yena devo'tra nirmitaḥ ||
subhaktyā yena dṛṣṭena vaṃśocchittirna jāyate
||40||अटेश्वरइति ख्यातो येन देवोऽत्र निर्मितः ॥
सुभक्त्या येन दृष्टेन वंशोच्छित्तिर्न जायते
ṛṣaya ūcuḥ
kasmāttasya kṛtaṃ nāma etaccā'ṭa iti smṛtam ||
anvayena parityaktaṃ tasmātkīrtaya sūtaja
||41||कस्मात्तस्य कृतं नाम एतच्चाऽट इति स्मृतम् ॥
अन्वयेन परित्यक्तं तस्मात्कीर्तय सूतज
sacivairbrāhmaṇairvāpi tasyaitannāma nirmitam ||
mātrā vā tatsamācakṣva paraṃ kautūhalaṃ hi naḥ
||42||सचिवैर्ब्राह्मणैर्वापि तस्यैतन्नाम निर्मितम् ॥
मात्रा वा तत्समाचक्ष्व परं कौतूहलं हि नः
sūta uvāca
na mātrā tatkṛtaṃ nāma na vipraiḥ sacivairnṛpa ||
tatkṛtaṃ devadūtena vyomasthena dvijottamāḥ
||43||न मात्रा तत्कृतं नाम न विप्रैः सचिवैर्नृप ॥
तत्कृतं देवदूतेन व्योमस्थेन द्विजोत्तमाः
yathā tathā pravakṣyāmi śrotavyaṃ susamāhitaiḥ ||
yayā sa bhūpatirjāto daśārṇādhipateḥ sutā
||49||यथा तथा प्रवक्ष्यामि श्रोतव्यं सुसमाहितैः ॥
यया स भूपतिर्जातो दशार्णाधिपतेः सुता
sā rūpayauvanopetā rūpāḍhyaṃ prāpya saddvijam ||
prasthitā snātukāmātha putratīrthe mṛgekṣaṇā
||45||सा रूपयौवनोपेता रूपाढ्यं प्राप्य सद्द्विजम् ॥
प्रस्थिता स्नातुकामाथ पुत्रतीर्थे मृगेक्षणा
sahitā tena vipreṇa kaṃdarpapratimena ca ||
atha tābhyāṃ mahānrāmo mithaḥ saṃdarśanātsthitaḥ
||46||सहिता तेन विप्रेण कंदर्पप्रतिमेन च ॥
अथ ताभ्यां महान्रामो मिथः संदर्शनात्स्थितः
tādṛṅmātraṃ sukṛcchreṇa prāptaṃ tīrthaṃ sutapradam ||
tataḥ snātvā jale tasminniṣkrāṃtau tau sukāmukau
||47||तादृङ्मात्रं सुकृच्छ्रेण प्राप्तं तीर्थं सुतप्रदम् ॥
ततः स्नात्वा जले तस्मिन्निष्क्रांतौ तौ सुकामुकौ
vrajamānau ca mārge'pi kāmadharmamupāgatau ||
atyautsukyātsusaṃhṛṣṭau lajjāṃ tyaktvā sudūrataḥ
||48||व्रजमानौ च मार्गेऽपि कामधर्ममुपागतौ ॥
अत्यौत्सुक्यात्सुसंहृष्टौ लज्जां त्यक्त्वा सुदूरतः
niṃdamānasya lokasya vicchedavacanaistadā ||
vīryotsarge'tha saṃjāte yāvaduttiṣṭhate dvijaḥ
||49||निंदमानस्य लोकस्य विच्छेदवचनैस्तदा ॥
वीर्योत्सर्गेऽथ संजाते यावदुत्तिष्ठते द्विजः
tāvadākāśagā vāṇī sahasā devanirmitā ||
aṭatārājamārgeṇa vipreṇānena vai yataḥ
||50||तावदाकाशगा वाणी सहसा देवनिर्मिता ॥
अटताराजमार्गेण विप्रेणानेन वै यतः
utpāditastu putro'yamautsukyādbrāhmaṇena tu ||
aṭākhyo bhūpatistasmālloke khyāto bhaviṣyati
||51||उत्पादितस्तु पुत्रोऽयमौत्सुक्याद्ब्राह्मणेन तु ॥
अटाख्यो भूपतिस्तस्माल्लोके ख्यातो भविष्यति
dīrghāyurbahuputraśca śatruṃpakṣakṣayāvahaḥ ||
etasmātkāraṇādviprā aṭākhyaḥ sa babhūva ha
||52||दीर्घायुर्बहुपुत्रश्च शत्रुंपक्षक्षयावहः ॥
एतस्मात्कारणाद्विप्रा अटाख्यः स बभूव ह
svavaṃśoddharacaṃdro'tra vāṃchitārthaprado'rthinām ||
tenaitatkṣetramāsādya sthāpitaṃ liṃgamuttamam ||
svanāmnā brāhmaṇaśreṣṭhāḥ sarvadeṣṭapradaṃ nṛṇām
||53||स्ववंशोद्धरचंद्रोऽत्र वांछितार्थप्रदोऽर्थिनाम् ॥
तेनैतत्क्षेत्रमासाद्य स्थापितं लिंगमुत्तमम् ॥
स्वनाम्ना ब्राह्मणश्रेष्ठाः सर्वदेष्टप्रदं नृणाम्
yastanmāghacaturdaśyāṃ pūjayecchraddhayānvitaḥ ||
na tasya jāyate kiṃcidduḥkhaṃ saṃtānasaṃbhavam
||54||यस्तन्माघचतुर्दश्यां पूजयेच्छ्रद्धयान्वितः ॥
न तस्य जायते किंचिद्दुःखं संतानसंभवम्
api varṣaśatānārī snātvā kuṇḍe sutaprade ||
aṭeśvaraṃ tataḥ paśyecchivabhaktiparāyaṇā
||55||अपि वर्षशतानारी स्नात्वा कुण्डे सुतप्रदे ॥
अटेश्वरं ततः पश्येच्छिवभक्तिपरायणा
sadyaḥ putramavāpnoti vaṃśavṛddhikaraṃ param ||
tatprasādānna saṃdehaḥ kārtikeya vaco yathā
||56||सद्यः पुत्रमवाप्नोति वंशवृद्धिकरं परम् ॥
तत्प्रसादान्न संदेहः कार्तिकेय वचो यथा
iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye'ṭeśvarotpattimāhātmyavarṇanaṃnāmāṣṭāviṃśatyuttaraśatatamo'dhyāyaḥ || 128 ||