yājñavalkyeśvarotpattimāhātmyavarṇanam
sūta uvāca
evaṃ saṃśocate yāvadātmānaṃ parigarhayan ||
tatastu brahmaṇā proktaḥ svayamabhyetya bho dvijāḥ
||1||एवं संशोचते यावदात्मानं परिगर्हयन् ॥
ततस्तु ब्रह्मणा प्रोक्तः स्वयमभ्येत्य भो द्विजाः
tvayā śaṃkā na kartavyā sutasyāsya kṛte dvija ||
ajñānādeva te jāto daivayogena bālakaḥ
||2||त्वया शंका न कर्तव्या सुतस्यास्य कृते द्विज ॥
अज्ञानादेव ते जातो दैवयोगेन बालकः
yājñavalkya uvāca
tathāpi deva me śuddhirhṛdayasya na jāyate ||
tasmādvada suraśreṣṭha prāyaścittaṃ viśuddhaye
||3||तथापि देव मे शुद्धिर्हृदयस्य न जायते ॥
तस्माद्वद सुरश्रेष्ठ प्रायश्चित्तं विशुद्धये
brahmovāca
yadi te cittaśuddhistu na kathaṃcitpravartate ||
tatsthāpaya mahābhāga liṃgaṃ devasya śūlinaḥ
||4||यदि ते चित्तशुद्धिस्तु न कथंचित्प्रवर्तते ॥
तत्स्थापय महाभाग लिंगं देवस्य शूलिनः
ajñānājjñānatovāpi yatpāpaṃ kurute naraḥ ||
brahmahatyādikaṃ cāpi strīvadhādvāpi yadbhavet
||5||अज्ञानाज्ज्ञानतोवापि यत्पापं कुरुते नरः ॥
ब्रह्महत्यादिकं चापि स्त्रीवधाद्वापि यद्भवेत्
paṃceṣṭikāmayaṃ vāpi yaḥ kuryāddharamandiram ||
tasya tannāśamāyāti tamaḥ sūryodaye yathā
||6||पंचेष्टिकामयं वापि यः कुर्याद्धरमन्दिरम् ॥
तस्य तन्नाशमायाति तमः सूर्योदये यथा
viśeṣeṇa mahābhāga hāṭakeśvarasaṃbhave ||
kṣetre tatra sumedhye tu sarvapātakanāśane
||7||विशेषेण महाभाग हाटकेश्वरसंभवे ॥
क्षेत्रे तत्र सुमेध्ये तु सर्वपातकनाशने
kalikāle ca saṃprāpte yatra pāpaṃ na vidyate ||
ahamapyatra vāṃchāmi yajñaṃ kartuṃ dvijottama
||8||कलिकाले च संप्राप्ते यत्र पापं न विद्यते ॥
अहमप्यत्र वांछामि यज्ञं कर्तुं द्विजोत्तम
ānayiṣyāmi tattīrthaṃ puṣkaraṃ cātmanaḥ priyam ||
kalikālabhayāccaitadyāvanno vyarthatāṃ vrajet
||9||आनयिष्यामि तत्तीर्थं पुष्करं चात्मनः प्रियम् ॥
कलिकालभयाच्चैतद्यावन्नो व्यर्थतां व्रजेत्
kalikāle tu saṃprāpte tīrthāni sakalāni ca ||
yāsyaṃti vyarthatāṃ vipra muktvedaṃ kṣetramuttamam
||10||कलिकाले तु संप्राप्ते तीर्थानि सकलानि च ॥
यास्यंति व्यर्थतां विप्र मुक्त्वेदं क्षेत्रमुत्तमम्
sūta uvāca
evamuktvā caturvaktrastataścādarśanaṃ gataḥ ||
yājñavalkyo'pi tacchrutvā pitāmahavaco' khilam
||11||एवमुक्त्वा चतुर्वक्त्रस्ततश्चादर्शनं गतः ॥
याज्ञवल्क्योऽपि तच्छ्रुत्वा पितामहवचोऽ खिलम्
liṃgaṃ saṃsthāpayāmāsa jñātvā kṣetramanuttamam ||
abravīcca tato vākyaṃ meghagaṃbhīrayā girā
||12||लिंगं संस्थापयामास ज्ञात्वा क्षेत्रमनुत्तमम् ॥
अब्रवीच्च ततो वाक्यं मेघगंभीरया गिरा
aṣṭamyāṃ ca caturdaśyāṃ yo liṃgaṃ māmakaṃ tvidam ||
snāpayiṣyati sadbhaktyā tasya pāpaṃ prayāsyati
||13||अष्टम्यां च चतुर्दश्यां यो लिंगं मामकं त्विदम् ॥
स्नापयिष्यति सद्भक्त्या तस्य पापं प्रयास्यति
paradārakṛtaṃ yacca mātrāpi ca samaṃ kṛtam ||
kṣālayiṣyati tatpāpaṃ snāpitaṃ pūjitaṃ paraiḥ
||14||परदारकृतं यच्च मात्रापि च समं कृतम् ॥
क्षालयिष्यति तत्पापं स्नापितं पूजितं परैः
asminnahani saṃprāpte tasya pakṣasamudbhavam ||
prayāsyati kṛtaṃ pāpaṃ yadajñānādvinirmitam
||15||अस्मिन्नहनि संप्राप्ते तस्य पक्षसमुद्भवम् ॥
प्रयास्यति कृतं पापं यदज्ञानाद्विनिर्मितम्
tataḥprabhṛti vikhyāto yājñava lkyeśvaraḥ śubhaḥ ||
tasminkṣetre dvijaśreṣṭhā hāṭakeśvarasaṃjñake
||16||ततःप्रभृति विख्यातो याज्ञव ल्क्येश्वरः शुभः ॥
तस्मिन्क्षेत्रे द्विजश्रेष्ठा हाटकेश्वरसंज्ञके
iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye yājñavalkyeśvarotpattimāhātmyavarṇanaṃnāma paṃcasaptatyuttaraśatatamo'dhyāyaḥ || 175 ||