tasyaivottaradigbhāge dhundhumāreśvarasya ca
sūta uvāca
tasyaivottaradigbhāge dhundhumāreśvarasya ca ||
yayātinā nareṃdreṇa sthāpitaṃ liṃgamuttamam
||1||तस्यैवोत्तरदिग्भागे धुन्धुमारेश्वरस्य च ॥
ययातिना नरेंद्रेण स्थापितं लिंगमुत्तमम्
devayānyā tathānyacca tathā śarmiṣṭhayā dvijāḥ ||
bhāryayā bhūpatestasya sarvakāmaphalapradam
||2||देवयान्या तथान्यच्च तथा शर्मिष्ठया द्विजाः ॥
भार्यया भूपतेस्तस्य सर्वकामफलप्रदम्
sa yadā sarvabhogānāṃ tṛptiṃ prāpto dvijottamāḥ ||
tadā putrasya rājyaṃ svaṃ vapuścaiva nyavedayat
||3||स यदा सर्वभोगानां तृप्तिं प्राप्तो द्विजोत्तमाः ॥
तदा पुत्रस्य राज्यं स्वं वपुश्चैव न्यवेदयत्
jarāmādāya tadgātrādbhāryābhyāṃ sahitastadā ||
papraccha vinayopeto mārkaṃḍaṃ munisattamam
||4||जरामादाय तद्गात्राद्भार्याभ्यां सहितस्तदा ॥
पप्रच्छ विनयोपेतो मार्कंडं मुनिसत्तमम्
bhagavansarvatīrthānāṃ kṣetrāṇāṃ ca vadasva me ||
yatpradhānaṃ pavitraṃ yattadasmākaṃ prakīrtaya
||5||भगवन्सर्वतीर्थानां क्षेत्राणां च वदस्व मे ॥
यत्प्रधानं पवित्रं यत्तदस्माकं प्रकीर्तय
śrīmārkaṃḍeya uvāca
kṣetrāṇāmiha sarveṣāṃ tīrthaiḥ sarvairalaṃkṛtam ||
camatkārapuraṃ kṣetraṃ sāṃprataṃ pratibhāti naḥ
||6||क्षेत्राणामिह सर्वेषां तीर्थैः सर्वैरलंकृतम् ॥
चमत्कारपुरं क्षेत्रं सांप्रतं प्रतिभाति नः
yatra viṣṇupadī gaṃgā jaṃtūnāṃ pāpanāśinī ||
svayaṃ sthitā nṛpaśreṣṭha tathā devā harādayaḥ
||7||यत्र विष्णुपदी गंगा जंतूनां पापनाशिनी ॥
स्वयं स्थिता नृपश्रेष्ठ तथा देवा हरादयः
tathānyāni ca tīrthāni yāni saṃti dharātale ||
teṣāṃ yatra ca sāṃnidhyaṃ sarvadā nṛpasattama
||8||तथान्यानि च तीर्थानि यानि संति धरातले ॥
तेषां यत्र च सांनिध्यं सर्वदा नृपसत्तम
śilā yatra dvipañcāśaddhastānāṃ parisaṃkhyayā ||
pitāmahena nirmuktā pramodāya dvijanmanām
||9||शिला यत्र द्विपञ्चाशद्धस्तानां परिसंख्यया ॥
पितामहेन निर्मुक्ता प्रमोदाय द्विजन्मनाम्
yadanyatra śubhaṃ karma varṣeṇaikena sidhyati ||
tattatra divasenāpi siddhiṃ yāti kṣitīśvara
||10||यदन्यत्र शुभं कर्म वर्षेणैकेन सिध्यति ॥
तत्तत्र दिवसेनापि सिद्धिं याति क्षितीश्वर
tasmāttatra drutaṃ gatvā tapaḥ kuru mahīpate ||
yena prāpsyasi cittasthām̐llokānbhāryāsamanvitaḥ
||11||तस्मात्तत्र द्रुतं गत्वा तपः कुरु महीपते ॥
येन प्राप्स्यसि चित्तस्थाँल्लोकान्भार्यासमन्वितः
tasya tadvacanaṃ śrutvā sa rājā nahuṣātmajaḥ ||
camatkārapure kṣetre bhāryābhyāṃ sahito yayau
||12||तस्य तद्वचनं श्रुत्वा स राजा नहुषात्मजः ॥
चमत्कारपुरे क्षेत्रे भार्याभ्यां सहितो ययौ
tataḥ saṃsthāpya talliṃgaṃ devadevasya śūlinaḥ ||
samyagārādhayāmāsa śraddhayā parayā yutaḥ
||13||ततः संस्थाप्य तल्लिंगं देवदेवस्य शूलिनः ॥
सम्यगाराधयामास श्रद्धया परया युतः
tatastasya prabhāvena bhāryābhyāṃ sahito nṛpaḥ ||
vimānavaramārūḍho jagāma tridivālayam
||14||ततस्तस्य प्रभावेन भार्याभ्यां सहितो नृपः ॥
विमानवरमारूढो जगाम त्रिदिवालयम्
kinnarairgīyamānaśca stūyamānaśca cāraṇaiḥ ||
sparddhamānaḥ samaṃ devairdvādaśārkasamaprabhaḥ
||15||किन्नरैर्गीयमानश्च स्तूयमानश्च चारणैः ॥
स्पर्द्धमानः समं देवैर्द्वादशार्कसमप्रभः
iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye yayātīśvaramāhātmyavarṇanaṃnāmaikonacatvāriṃśo'dhyāyaḥ || 39 ||