tathānyo'pi ca tatrāsti yājñavalkyasamudravaḥ
sūta uvāca
tathānyo'pi ca tatrāsti yājñavalkyasamudravaḥ ||
āśramo loka vikhyāto mūrkhāṇāmapi siddhidaḥ
||1||तथान्योऽपि च तत्रास्ति याज्ञवल्क्यसमुद्रवः ॥
आश्रमो लोक विख्यातो मूर्खाणामपि सिद्धिदः
yatra taptvā tapastīvraṃ yājñavalkyena dhīmatā ||
saṃprāptā nikhilā vedā guruṇā'pahṛtāśca ye
||2||यत्र तप्त्वा तपस्तीव्रं याज्ञवल्क्येन धीमता ॥
संप्राप्ता निखिला वेदा गुरुणाऽपहृताश्च ये
ṛṣaya ūcuḥ
ko'sau gururabhūttasya yājñavalkyasya dhīmataḥ ||
pāṭhayitvā punaryena hṛtā vedā mahātmanā
||3||कोऽसौ गुरुरभूत्तस्य याज्ञवल्क्यस्य धीमतः ॥
पाठयित्वा पुनर्येन हृता वेदा महात्मना
kimarthaṃ ca samācakṣva sūtaputrātra vistarāt ||
kautukaṃ paramaṃ jātaṃ sarveṣāṃ no dvijanmanām
||4||किमर्थं च समाचक्ष्व सूतपुत्रात्र विस्तरात् ॥
कौतुकं परमं जातं सर्वेषां नो द्विजन्मनाम्
sūta uvāca
āsīdbrāhmaṇaśārdūlaḥ śākalya iti viśrutaḥ ||
bhārgavānvayasaṃbhūto veda vedāṃgapāragaḥ
||5||आसीद्ब्राह्मणशार्दूलः शाकल्य इति विश्रुतः ॥
भार्गवान्वयसंभूतो वेद वेदांगपारगः
bṛhatkalpe purā viprā vardhamāne purottame ||
bahuśiṣyasamāyukto vedādhyayanatatparaḥ
||6||बृहत्कल्पे पुरा विप्रा वर्धमाने पुरोत्तमे ॥
बहुशिष्यसमायुक्तो वेदाध्ययनतत्परः
sa sadā prātarutthāya vidyādānaṃ prayacchati |
śiṣyebhyaścānurūpebhyaḥ prasādādvijasattamāḥ
||7||स सदा प्रातरुत्थाय विद्यादानं प्रयच्छति ।
शिष्येभ्यश्चानुरूपेभ्यः प्रसादाद्विजसत्तमाः
cakāra sa tadā viprāḥ paurohityaṃ mahīpateḥ ||
sūryavaṃśaprasūtasya supriyasya mahātmanaḥ
||8||चकार स तदा विप्राः पौरोहित्यं महीपतेः ॥
सूर्यवंशप्रसूतस्य सुप्रियस्य महात्मनः
sa tasya dharmakṛtyāni sarvāṇyeva dinedine ||
kṛtvā svagṛhamabhyeti pūjitastena bhūbhujā
||9||स तस्य धर्मकृत्यानि सर्वाण्येव दिनेदिने ॥
कृत्वा स्वगृहमभ्येति पूजितस्तेन भूभुजा
ekaṃ śiṣyaṃ samāropya śāṃtyarthaṃ tasya bhūpateḥ ||
kathayitvā pramāṇaṃ ca vidhānaṃ homasaṃbhavam
||10||एकं शिष्यं समारोप्य शांत्यर्थं तस्य भूपतेः ॥
कथयित्वा प्रमाणं च विधानं होमसंभवम्
śiṣyo'pi sakalaṃ kṛtvā tatkarma susamāhitaḥ ||
āśīrvādaṃ pradattvā ca bhūpatergṛhameti ca
||11||शिष्योऽपि सकलं कृत्वा तत्कर्म सुसमाहितः ॥
आशीर्वादं प्रदत्त्वा च भूपतेर्गृहमेति च
evaṃ prakurvatastasya śākalyasya mahātmanaḥ ||
paurohityaṃ gataḥ kālaḥ kiyanmātro dvijottamāḥ ||
tadā vaivāhike kāle śapto yaḥ śaṃbhunā svayam ||
suniṃdyāṃ vikṛtiṃ dṛṣṭvā tasya vedyāṃ gatasya ca
||13||एवं प्रकुर्वतस्तस्य शाकल्यस्य महात्मनः ॥
पौरोहित्यं गतः कालः कियन्मात्रो द्विजोत्तमाः ॥
तदा वैवाहिके काले शप्तो यः शंभुना स्वयम् ॥
सुनिंद्यां विकृतिं दृष्ट्वा तस्य वेद्यां गतस्य च
atha taṃ yojayāmāsa śāṃtyarthaṃ nṛpamaṃdire ||
yājñavalkyaṃ sa śākalyaḥ pratipadyāgataṃ tadā
||14||अथ तं योजयामास शांत्यर्थं नृपमंदिरे ॥
याज्ञवल्क्यं स शाकल्यः प्रतिपद्यागतं तदा
so'pi tāruṇyagarveṇa veśyākarajavikṣataḥ ||
sarvāṃgeṣu sunirlajjaḥ prakaṭāṃgo jagāma vai
||15||सोऽपि तारुण्यगर्वेण वेश्याकरजविक्षतः ॥
सर्वांगेषु सुनिर्लज्जः प्रकटांगो जगाम वै
tataśca śāṃtikaṃ kṛtvā japāṃte bhūpatiṃ ca tam ||
śāṃtodakapradānāya hasyamāno janairyayau
||16||ततश्च शांतिकं कृत्वा जपांते भूपतिं च तम् ॥
शांतोदकप्रदानाय हस्यमानो जनैर्ययौ
pārthivo'pi ca taṃ dṛṣṭvā tādṛgrūpaṃ viṭaṃ dvijam ||
nāśīrjagrāha tenoktāṃ vākyametaduvāca ha ||
ucchiṣṭo'haṃ dvijaśreṣṭha śayyārūḍho vyavasthitaḥ |
atra śālodbhave staṃbhe tasmādetajjalaṃ kṣipa
||18||पार्थिवोऽपि च तं दृष्ट्वा तादृग्रूपं विटं द्विजम् ॥
नाशीर्जग्राह तेनोक्तां वाक्यमेतदुवाच ह ॥
उच्छिष्टोऽहं द्विजश्रेष्ठ शय्यारूढो व्यवस्थितः ।
अत्र शालोद्भवे स्तंभे तस्मादेतज्जलं क्षिप
so'pi sāvajñamājñāya taṃ bhūpaṃ kupitānanaḥ ||
taṃ ca staṃbhaṃ samuddiśya dhyātvā tadbrahma śāśvatam
||19||सोऽपि सावज्ञमाज्ञाय तं भूपं कुपिताननः ॥
तं च स्तंभं समुद्दिश्य ध्यात्वा तद्ब्रह्म शाश्वतम्
dyāṃ tvamālikhya ityeva proktvā maṃtraṃ ca yājuṣam ||
(yāṃ tvamālikhya- pāṭhabhedaḥ) prākṣipacchāṃtikaṃ toyaṃ tasya mūrdhani satvaram
||20||द्यां त्वमालिख्य इत्येव प्रोक्त्वा मंत्रं च याजुषम् ॥
(यां त्वमालिख्य- पाठभेदः) प्राक्षिपच्छांतिकं तोयं तस्य मूर्धनि सत्वरम्
tataḥ sa patite toye staṃbhaḥ pallavaśobhitaḥ ||
tatkṣaṇādeva saṃjajñe phala puṣpairvirājitaḥ
||21||ततः स पतिते तोये स्तंभः पल्लवशोभितः ॥
तत्क्षणादेव संजज्ञे फल पुष्पैर्विराजितः
taṃ dṛṣṭvā pārthivaḥ so'tha vismayotphullalocanaḥ ||
paścāttāpaṃ vidhāyātha vākyametaduvāca ha
||22||तं दृष्ट्वा पार्थिवः सोऽथ विस्मयोत्फुल्ललोचनः ॥
पश्चात्तापं विधायाथ वाक्यमेतदुवाच ह
abhiṣekaṃ dvijaśreṣṭha mamāpi tvaṃ prayaccha bhoḥ ||
anenaiva tu mantreṇa śucitvaṃ me vyavasthitam
||23||अभिषेकं द्विजश्रेष्ठ ममापि त्वं प्रयच्छ भोः ॥
अनेनैव तु मन्त्रेण शुचित्वं मे व्यवस्थितम्
yājñavalkya uvāca
mamābhiṣekadānasya tvamanarho'si pārthiva ||
tasmādyāsyāmyahaṃ sadyo yatrasthaḥ sa gururmama
||24||ममाभिषेकदानस्य त्वमनर्होऽसि पार्थिव ॥
तस्माद्यास्याम्यहं सद्यो यत्रस्थः स गुरुर्मम
rājovāca
tava dāsyāmi vastrāṇi vāhanāni vasūni ca ||
tasmādyacchābhiṣekaṃ me mantreṇā'nena sāṃpratam
||25||तव दास्यामि वस्त्राणि वाहनानि वसूनि च ॥
तस्माद्यच्छाभिषेकं मे मन्त्रेणाऽनेन सांप्रतम्
yājñavalkya uvāca
na homāṃtaṃ vinā mantraḥ sphurate pārthivottama ||
abhiṣekavidhau prokto yaḥ pūrvaṃ padmayoninā ||
tasmānnāhaṃ kariṣyāmi tava yadvai hṛdi sthitam
||26||न होमांतं विना मन्त्रः स्फुरते पार्थिवोत्तम ॥
अभिषेकविधौ प्रोक्तो यः पूर्वं पद्मयोनिना ॥
तस्मान्नाहं करिष्यामि तव यद्वै हृदि स्थितम्
ityuktvā vacanaṃ bhūpaṃ yājñavalkyaḥ sa vai dvijaḥ ||
jagāma svagṛhaṃ tūrṇaṃ nispṛhatvaṃ samāśritaḥ ||
27 apare'hni samāyātaṃ śākalyamatha bhūpatiḥ ||
provāca prāṃjalirbhūtvā vinayāvanataḥ sthitaḥ
||28||इत्युक्त्वा वचनं भूपं याज्ञवल्क्यः स वै द्विजः ॥
जगाम स्वगृहं तूर्णं निस्पृहत्वं समाश्रितः ॥
२७ अपरेऽह्नि समायातं शाकल्यमथ भूपतिः ॥
प्रोवाच प्रांजलिर्भूत्वा विनयावनतः स्थितः
yastvayā preṣitaḥ kalya śiṣyo brāhmaṇasattamaḥ ||
śāṃtyarthaṃ preṣaṇīyaśca bhūyo'pyevaṃ gṛhe mama
||29||यस्त्वया प्रेषितः कल्य शिष्यो ब्राह्मणसत्तमः ॥
शांत्यर्थं प्रेषणीयश्च भूयोऽप्येवं गृहे मम
bāḍhamityeva sa proktvā tato gatvā nijālayam ||
yājñavalkyaṃ samāhūya tataḥ provāca sādaram
||30||बाढमित्येव स प्रोक्त्वा ततो गत्वा निजालयम् ॥
याज्ञवल्क्यं समाहूय ततः प्रोवाच सादरम्
adyāpi tvaṃ nareṃdrasya śāṃtyarthaṃ bhavane vraja ||
viśeṣātpārthiveṃdreṇa samāhūto'si putraka
||31||अद्यापि त्वं नरेंद्रस्य शांत्यर्थं भवने व्रज ॥
विशेषात्पार्थिवेंद्रेण समाहूतोऽसि पुत्रक
yājñavalkya uvāca
nāhaṃ tāta gamiṣyāmi śāṃtyarthaṃ tasya maṃdire ||
avalepena yuktasya śuddhyā virahitasya ca
||32||नाहं तात गमिष्यामि शांत्यर्थं तस्य मंदिरे ॥
अवलेपेन युक्तस्य शुद्ध्या विरहितस्य च
mayā tasyābhiṣekārthaṃ salilaṃ codyataṃ ca yat ||
salilaṃ tena tatkāṣṭhe samādiṣṭaṃ kubuddhinā
||33||मया तस्याभिषेकार्थं सलिलं चोद्यतं च यत् ॥
सलिलं तेन तत्काष्ठे समादिष्टं कुबुद्धिना
tato mayāpi tatraiva tatkṣaṇātsalilaṃ ca yat ||
tasminkāṣṭhe parikṣiptaṃ nītaṃ vṛddhiṃ ca tatkṣaṇāt
||34||ततो मयापि तत्रैव तत्क्षणात्सलिलं च यत् ॥
तस्मिन्काष्ठे परिक्षिप्तं नीतं वृद्धिं च तत्क्षणात्
śākalya uvāca
ata eva viśeṣeṇa samāhūto'si putraka ||
tasmāttatra drutaṃ gaccha nāvajñeyā mahībhujaḥ
||35||अत एव विशेषेण समाहूतोऽसि पुत्रक ॥
तस्मात्तत्र द्रुतं गच्छ नावज्ञेया महीभुजः
apamānādbhavenmānaṃ pārthivānāmasaṃśayam ||
yaḥ karoti punastatra mānaṃ na sa bhavetpriyaḥ
||36||अपमानाद्भवेन्मानं पार्थिवानामसंशयम् ॥
यः करोति पुनस्तत्र मानं न स भवेत्प्रियः
kopaprasāda vastūni vicinvaṃtīha ye sadā ||
ārohaṃti śanairbhṛtyā dhunvaṃtamapi pārthivam
||37||कोपप्रसाद वस्तूनि विचिन्वंतीह ये सदा ॥
आरोहंति शनैर्भृत्या धुन्वंतमपि पार्थिवम्
samau mānāpamānau ca cittajñaḥ kālavittathā ||
sarvaṃsahaḥ kṣamī vijñaḥ sa bhavedrājavallabhaḥ
||38||समौ मानापमानौ च चित्तज्ञः कालवित्तथा ॥
सर्वंसहः क्षमी विज्ञः स भवेद्राजवल्लभः
apamānamanādṛtya tasmādgaccha nṛpālayam ||
mamājñāpi na laṃghyā ta eṣa dharmaḥ sanātanaḥ
||39||अपमानमनादृत्य तस्माद्गच्छ नृपालयम् ॥
ममाज्ञापि न लंघ्या त एष धर्मः सनातनः
yājñavalkya uvāca
ājñābhaṃgo dhruvaṃ bhāvī paripāṭīvyatikramāt ||
karoṣi yadi śiṣyāṇāṃ ye tvayā tatra yojitāḥ
||40||आज्ञाभंगो ध्रुवं भावी परिपाटीव्यतिक्रमात् ॥
करोषि यदि शिष्याणां ये त्वया तत्र योजिताः
tasmādyadi balānmāṃ tvaṃ yojayiṣyasi taṃ prati ||
tvāṃ tyaktvā'nyatra yāsyāmi yataḥ proktaṃ maharṣibhiḥ
||41||तस्माद्यदि बलान्मां त्वं योजयिष्यसि तं प्रति ॥
त्वां त्यक्त्वाऽन्यत्र यास्यामि यतः प्रोक्तं महर्षिभिः
gurorapyavaliptasya kāryākāryamajānataḥ ||
utpathe vartamānasya parityāgo vidhīyate
||42||गुरोरप्यवलिप्तस्य कार्याकार्यमजानतः ॥
उत्पथे वर्तमानस्य परित्यागो विधीयते
sūta uvāca
tasya tadvacanaṃ śrutvā śākalyaḥ krodhamūrchitaḥ ||
tataḥ provāca taṃ bhūyo bhartsamāno muhurmuhuḥ
||43||तस्य तद्वचनं श्रुत्वा शाकल्यः क्रोधमूर्छितः ॥
ततः प्रोवाच तं भूयो भर्त्समानो मुहुर्मुहुः
ekamapyakṣaraṃ yatra guruḥ śiṣye nivedayet ||
pṛthivyāṃ nāsti taddravyaṃ yaddattvā hyanṛṇī bhavet
||44||एकमप्यक्षरं यत्र गुरुः शिष्ये निवेदयेत् ॥
पृथिव्यां नास्ति तद्द्रव्यं यद्दत्त्वा ह्यनृणी भवेत्
tasmādgaccha drutaṃ dattvā madadhyayanamālayam ||
tyaktvā vidyāṃ mayā dattāṃ no cecchapsyāmyahaṃ tava
||45||तस्माद्गच्छ द्रुतं दत्त्वा मदध्ययनमालयम् ॥
त्यक्त्वा विद्यां मया दत्तां नो चेच्छप्स्याम्यहं तव
evamuktvābhimaṃtryātha nādabiṃdusamudbhavaiḥ ||
maṃtrairātharvaṇaistoyaṃ pānārthaṃ cārpayattataḥ
||46||एवमुक्त्वाभिमंत्र्याथ नादबिंदुसमुद्भवैः ॥
मंत्रैराथर्वणैस्तोयं पानार्थं चार्पयत्ततः
so'pibattatkṣaṇāttoyaṃ tatpītvā vyākuleṃdriyaḥ ||
udgiradvāṃtidharmeṇa tattvavidyāvimiśritam
||47||सोऽपिबत्तत्क्षणात्तोयं तत्पीत्वा व्याकुलेंद्रियः ॥
उद्गिरद्वांतिधर्मेण तत्त्वविद्याविमिश्रितम्
tataḥ provāca taṃ bhūyaḥ śākalyaṃ kupitānanaḥ ||
ekamapyakṣaraṃ nāsti tāvakīyaṃ mamodare
||48||ततः प्रोवाच तं भूयः शाकल्यं कुपिताननः ॥
एकमप्यक्षरं नास्ति तावकीयं ममोदरे
tasmācchiṣyo'smi te nāhaṃ na ca me tvaṃ guruḥ sthitaḥ ||
sāṃprataṃ svecchayā'nyatra prayāsyāmi karoṣi kim
||49||तस्माच्छिष्योऽस्मि ते नाहं न च मे त्वं गुरुः स्थितः ॥
सांप्रतं स्वेच्छयाऽन्यत्र प्रयास्यामि करोषि किम्
evamuktvā'tha nirgatya tasmātsthānācciraṃtanāt ||
papraccha mānavānbhūyaḥ siddhikṣetrāṇi cāsakṛt
||50||एवमुक्त्वाऽथ निर्गत्य तस्मात्स्थानाच्चिरंतनात् ॥
पप्रच्छ मानवान्भूयः सिद्धिक्षेत्राणि चासकृत्
tatastasya samādiṣṭaṃ kṣetrametanmanīṣibhiḥ ||
siddhidaṃ sarvajaṃtūnāṃ na vṛthā syātkathaṃcana
||51||ततस्तस्य समादिष्टं क्षेत्रमेतन्मनीषिभिः ॥
सिद्धिदं सर्वजंतूनां न वृथा स्यात्कथंचन
āstāṃ tāvattapastaptvā vrataṃ niyamameva vā ||
hāṭakeśvaraje kṣetre siddhiḥ saṃvasato'pi ca
||52||आस्तां तावत्तपस्तप्त्वा व्रतं नियममेव वा ॥
हाटकेश्वरजे क्षेत्रे सिद्धिः संवसतोऽपि च
yenayena ca bhāvena tatra kṣetre vasejjanaḥ ||
tasyānurūpiṇī siddhiḥ śubhā syādyadi vā'śubhā
||53||येनयेन च भावेन तत्र क्षेत्रे वसेज्जनः ॥
तस्यानुरूपिणी सिद्धिः शुभा स्याद्यदि वाऽशुभा
tacchrutvā ca drutaṃ prāpya kṣetrametaddvijottamāḥ ||
bhānumārādhayāmāsa sthāpayitvā tataḥ param
||54||तच्छ्रुत्वा च द्रुतं प्राप्य क्षेत्रमेतद्द्विजोत्तमाः ॥
भानुमाराधयामास स्थापयित्वा ततः परम्
niyato niyatāhāro brahmacaryaparāyaṇaḥ ||
gāyatraṃ nyāsamāsādya nirvikalpena cetasā
||55||नियतो नियताहारो ब्रह्मचर्यपरायणः ॥
गायत्रं न्यासमासाद्य निर्विकल्पेन चेतसा
tataśca bhagavāṃstuṣṭo varṣāṃte tamuvāca saḥ ||
darśane tasya saṃsthitvā tejaḥ saṃyamya dāruṇam
||56||ततश्च भगवांस्तुष्टो वर्षांते तमुवाच सः ॥
दर्शने तस्य संस्थित्वा तेजः संयम्य दारुणम्
yājñavalkya varaṃ brūhi yatte manasi rocate ||
sarvameva pradāsyāmi nādeyaṃ vidyate tvayi
||57||याज्ञवल्क्य वरं ब्रूहि यत्ते मनसि रोचते ॥
सर्वमेव प्रदास्यामि नादेयं विद्यते त्वयि
yājñavalkya uvāca
yadi tuṣṭaḥ suraśreṣṭha vedādhyayanasaṃbhave ||
gururbhava mamādyaiva mamaitadvāṃchitaṃ hṛdi
||58||यदि तुष्टः सुरश्रेष्ठ वेदाध्ययनसंभवे ॥
गुरुर्भव ममाद्यैव ममैतद्वांछितं हृदि
bhāskara uvāca
ahaṃ tava kṛpāviṣṭastejaḥ saṃhṛtya tatparam ||
tataścātra samāyātastena no dahyase dvija
||59||अहं तव कृपाविष्टस्तेजः संहृत्य तत्परम् ॥
ततश्चात्र समायातस्तेन नो दह्यसे द्विज
tasmādatraiva kuṃḍe ca maṃtrānsārasvatāñchubhān ||
vedoktānkṣepayiṣyāmi svayameva dvijottama
||60||तस्मादत्रैव कुंडे च मंत्रान्सारस्वताञ्छुभान् ॥
वेदोक्तान्क्षेपयिष्यामि स्वयमेव द्विजोत्तम
tatra snātvā śucirbhūtvā yatkiṃcidvedasaṃbhavam ||
paṭhiṣyasi sakṛttatte kaṃṭhasthaṃ saṃbhaviṣyati
||61||तत्र स्नात्वा शुचिर्भूत्वा यत्किंचिद्वेदसंभवम् ॥
पठिष्यसि सकृत्तत्ते कंठस्थं संभविष्यति
tattvārthaṃ prakaṭaṃ kṛtsnaṃ viditaṃ te bhaviṣyati ||
matprasādānna saṃdehaḥ satyametanmayoditam
||62||तत्त्वार्थं प्रकटं कृत्स्नं विदितं ते भविष्यति ॥
मत्प्रसादान्न संदेहः सत्यमेतन्मयोदितम्
adyādi mānavaḥ prātaḥ snātvā tvatra hrade ca yaḥ ||
sāvitreṇa ca sūktena māṃ dṛṣṭvā prapaṭhiṣyati ||
tasmai tatsyādasaṃdigdhaṃ yattavoktaṃ mayā dvija
||63||अद्यादि मानवः प्रातः स्नात्वा त्वत्र ह्रदे च यः ॥
सावित्रेण च सूक्तेन मां दृष्ट्वा प्रपठिष्यति ॥
तस्मै तत्स्यादसंदिग्धं यत्तवोक्तं मया द्विज
yājñavalkya uvāca
evaṃ bhavatu deveśa yattvayoktaṃ vaco'khilam ||
paraṃ mama vaco'nyacca tacchṛṇuṣva bravīmi te
||64||एवं भवतु देवेश यत्त्वयोक्तं वचोऽखिलम् ॥
परं मम वचोऽन्यच्च तच्छृणुष्व ब्रवीमि ते
nāhaṃ manuṣyadharmāṇamupādhyāyaṃ kathaṃcana ||
kariṣyāmi jagannātha kṛpāṃ kuru mamopari
||65||नाहं मनुष्यधर्माणमुपाध्यायं कथंचन ॥
करिष्यामि जगन्नाथ कृपां कुरु ममोपरि
tatastasyā dadau sūryo laghimā nāma śobhanām ||
vidyāṃ hi tatprabhāvāya sutuṣṭenāṃtarātmanā
||66||ततस्तस्या ददौ सूर्यो लघिमा नाम शोभनाम् ॥
विद्यां हि तत्प्रभावाय सुतुष्टेनांतरात्मना
tatastaṃ prāha karṇāṃte mamāśvānāṃ praviśya vai ||
abhyāsaṃ kuru vidyānāṃ vedādhyayanamācara
||67||ततस्तं प्राह कर्णांते ममाश्वानां प्रविश्य वै ॥
अभ्यासं कुरु विद्यानां वेदाध्ययनमाचर
manmukhādbrāhmaṇaśreṣṭha yadyetattava vāṃchitam ||
na te syādyena doṣo'yaṃ mama raśmisamudbhavaḥ
||68||मन्मुखाद्ब्राह्मणश्रेष्ठ यद्येतत्तव वांछितम् ॥
न ते स्याद्येन दोषोऽयं मम रश्मिसमुद्भवः
evamuktaḥ sa tenātha vājikarṇaṃ samāśritaḥ ||
laghurbhūtvā'paṭhadvedānbhāskarasya mukhāttataḥ
||69||एवमुक्तः स तेनाथ वाजिकर्णं समाश्रितः ॥
लघुर्भूत्वाऽपठद्वेदान्भास्करस्य मुखात्ततः
evaṃ siddhiṃ samāpanno yājñavalkyo dvijottamāḥ ||
kṛtvopaniṣadaṃ cāru vedārthaiḥ sakalairyutam
||70||एवं सिद्धिं समापन्नो याज्ञवल्क्यो द्विजोत्तमाः ॥
कृत्वोपनिषदं चारु वेदार्थैः सकलैर्युतम्
janakāya nareṃdrāya vyākhyāya ca tataḥ param ||
kātyāyanaṃ sutaṃ prāpya vedasūtrasya kārakam
||71||जनकाय नरेंद्राय व्याख्याय च ततः परम् ॥
कात्यायनं सुतं प्राप्य वेदसूत्रस्य कारकम्
tyaktvā kalevaraṃ tatra brahmadvāri vinirmite ||
tattejo brahmaṇo gātre yojayāmāsa śaktitaḥ
||72||त्यक्त्वा कलेवरं तत्र ब्रह्मद्वारि विनिर्मिते ॥
तत्तेजो ब्रह्मणो गात्रे योजयामास शक्तितः
tasya tīrthe naraḥ snātvā dṛṣṭvā taṃ ca divākaram ||
nādabiṃduṃ paṭhitvā ca tadagre muktimāpnuyāt
||73||तस्य तीर्थे नरः स्नात्वा दृष्ट्वा तं च दिवाकरम् ॥
नादबिंदुं पठित्वा च तदग्रे मुक्तिमाप्नुयात्
iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye yājñavalkyāśramamāhātmyavarṇanaṃnāmaikonatriṃśaduttaraśatatamo'dhyāyaḥ || 129 ||