puṣpo'pi tāṃ samādāya māhikākhyāṃ varāṃganām
sūta uvāca
puṣpo'pi tāṃ samādāya māhikākhyāṃ varāṃganām ||
sa tadā prayayau hṛṣṭo maṇibhadrasya maṃdiram
||1||पुष्पोऽपि तां समादाय माहिकाख्यां वरांगनाम् ॥
स तदा प्रययौ हृष्टो मणिभद्रस्य मंदिरम्
śaṃkhatūryaninādena sarvaistaiḥ svajanairvṛtaḥ ||
na kasya tatra saṃbhūto vikalpastatsamudbhavaḥ
||2||शंखतूर्यनिनादेन सर्वैस्तैः स्वजनैर्वृतः ॥
न कस्य तत्र संभूतो विकल्पस्तत्समुद्भवः
bhāskarasya prasādena tathaivānyasya karhicit ||
so'pi maṃdiramāsādya yathātmapitṛsaṃbhavam
||3||भास्करस्य प्रसादेन तथैवान्यस्य कर्हिचित् ॥
सोऽपि मंदिरमासाद्य यथात्मपितृसंभवम्
upaviśya tato madhye bandhūnsarvānsamāhvayat ||
adya tāvaddine mahyaṃ tulāgraṃ kamalā śritā
||4||उपविश्य ततो मध्ये बन्धून्सर्वान्समाह्वयत् ॥
अद्य तावद्दिने मह्यं तुलाग्रं कमला श्रिता
calitāpi punaścāsyāḥ supatnyā vākyataḥ sthitā ||
kiyaṃtaṃ caiva kālaṃ me kārpaṇyaṃ mahadāsthitam
||5||चलितापि पुनश्चास्याः सुपत्न्या वाक्यतः स्थिता ॥
कियंतं चैव कालं मे कार्पण्यं महदास्थितम्
jñātamadya calā lakṣmīstena tyaktaṃ sudūrataḥ ||
tasmādbaṃdhujanaiḥ sārdhaṃ devairvipraiśca kṛtsnaśaḥ ||
saṃvibhaktāṃ kariṣyāmi satyenātmānamālabhe
||6||ज्ञातमद्य चला लक्ष्मीस्तेन त्यक्तं सुदूरतः ॥
तस्माद्बंधुजनैः सार्धं देवैर्विप्रैश्च कृत्स्नशः ॥
संविभक्तां करिष्यामि सत्येनात्मानमालभे
evamuktvā tataḥ sarvānsamāhūya pṛthakpṛthak ||
sa nāmabhirdadau vastraṃ bhūṣaṇāni yathārhataḥ
||7||एवमुक्त्वा ततः सर्वान्समाहूय पृथक्पृथक् ॥
स नामभिर्ददौ वस्त्रं भूषणानि यथार्हतः
tato vedavido viprānsamāhūya sa nāmabhiḥ ||
ekaikasya dadau vittaṃ savastraṃ śraddhayānvitaḥ
||8||ततो वेदविदो विप्रान्समाहूय स नामभिः ॥
एकैकस्य ददौ वित्तं सवस्त्रं श्रद्धयान्वितः
tatastu nartakebhyaśca dīnāṃdhebhyo viśeṣataḥ ||
dadau bhojyaṃ sami ṣṭānnaṃ savastraṃ ca dvijottamāḥ
||9||ततस्तु नर्तकेभ्यश्च दीनांधेभ्यो विशेषतः ॥
ददौ भोज्यं समि ष्टान्नं सवस्त्रं च द्विजोत्तमाः
tatastu svayamevānnaṃ bubhuje bhāryayā saha ||
visṛjya tānsamāyātānsvajanānbrāhmaṇaiḥ saha
||10||ततस्तु स्वयमेवान्नं बुभुजे भार्यया सह ॥
विसृज्य तान्समायातान्स्वजनान्ब्राह्मणैः सह
evaṃ tena tadā prāptaṃ vittaṃ ca parasaṃbhavam ||
bubhuje svecchayā nityaṃ tadā bhāryāsamanvitaḥ
||11||एवं तेन तदा प्राप्तं वित्तं च परसंभवम् ॥
बुभुजे स्वेच्छया नित्यं तदा भार्यासमन्वितः
iti śrīskāṃde mahāpurāṇa ekāśīti sāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye puṣpavibhavaprāptivarṇanaṃnāmaikonaṣaṣṭyuttaraśatatamo'dhyāyaḥ || 159 ||